Read Roman Urdu Geo paidāish 13 Bible Online

paidāish 13 - Roman Urdu Geo bible

paidāish 13

¹abrām apnī bīwī, lūt aur tamām jāydād ko sāth le kar misr se niklā aur kan'ān ke junūbī ilāqe dasht-e-najab meṅ wāpas āyā.

²abrām nihāyat daulatmand ho gayā thā. us ke pās bahut se maweshī aur sonā-chāṅdī thī.

³wahāṅ se jagah-ba-jagah chalte hue wuh āḳhirkār bait-el se ho kar us maqām tak pahuṅch gayā jahāṅ us ne shurū meṅ apnā ḍerā lagāyā thā aur jo bait-el aur aī ke darmiyān thā.

⁴wahāṅ jahāṅ us ne qurbāngāh banāī thī us ne rab kā nām le kar us kī ibādat kī.

⁵lūt ke pās bhī bahut sī bheṛ-bakriyāṅ, gāy-bail aur ḳhaime the.

⁶natījā yih niklā ki āḳhirkār wuh mil kar na rah sake, kyūṅki itnī jagah nahīṅ thī ki donoṅ ke rewaṛ ek hī jagah par char sakeṅ.

⁷abrām aur lūt ke charwāhe āpas meṅ jhagaṛne lage. (us zamāne meṅ kan'ānī aur farizzī bhī mulk meṅ ābād the.)

⁸tab abrām ne lūt se bāt kī, “aisā nahīṅ honā chāhie ki tere aur mere darmiyān jhagaṛā ho yā tere charwāhoṅ aur mere charwāhoṅ ke darmiyān. ham to bhāī haiṅ.

⁹kyā zarūrat hai ki ham mil kar raheṅ jabki tū āsānī se is mulk kī kisī aur jagah rah saktā hai. behtar hai ki tū mujh se alag ho kar kahīṅ aur rahe. agar tū bāeṅ hāth jāe to maiṅ dāeṅ hāth jāūṅgā, aur agar tū dāeṅ hāth jāe to maiṅ bāeṅ hāth jāūṅgā.”

¹⁰lūt ne apnī nazar uṭhā kar dekhā ki daryā-e-yardan ke pūre ilāqe meṅ zuġhar tak pānī kī kasrat hai. wuh rab ke bāġh yā mulk-e-misr kī mānind thā, kyūṅki us waqt rab ne sadūm aur amūrā ko tabāh nahīṅ kiyā thā.

¹¹chunāṅche lūt ne daryā-e-yardan ke pūre ilāqe ko chun liyā aur mashriq kī taraf jā basā. yūṅ donoṅ rishtedār ek dūsre se judā ho gae.

¹²abrām mulk-e-kan'ān meṅ rahā jabki lūt yardan ke ilāqe ke shahroṅ ke darmiyān ābād ho gayā. wahāṅ us ne apne ḳhaime sadūm ke qarīb lagā die.

¹³lekin sadūm ke bāshinde nihāyat sharīr the, aur un ke rab ke ḳhilāf gunāh nihāyat makrūh the.

¹⁴lūt abrām se judā huā to rab ne abrām se kahā, “apnī nazar uṭhā kar chāroṅ taraf yānī shimāl, junūb, mashriq aur maġhrib kī taraf dekh.

¹⁵jo bhī zamīn tujhe nazar āe use maiṅ tujhe aur terī aulād ko hameshā ke lie detā hūṅ.

¹⁶maiṅ terī aulād ko ḳhāk kī tarah beshumār hone dūṅgā. jis tarah ḳhāk ke zarre gine nahīṅ jā sakte usī tarah terī aulād bhī ginī nahīṅ jā sakegī.

¹⁷chunāṅche uṭh kar is mulk kī har jagah chal phir, kyūṅki maiṅ ise tujhe detā hūṅ.”

¹⁸abrām rawānā huā. chalte chalte us ne apne ḍere habrūn ke qarīb mamre ke daraḳhtoṅ ke pās lagāe. wahāṅ us ne rab kī tāzīm meṅ qurbāngāh banāī.