Read Roman Urdu Geo paidāish 14 Bible Online

paidāish 14 - Roman Urdu Geo bible

paidāish 14

¹kan'ān meṅ jang huī. bairūn-e-mulk ke chār bādshāhoṅ ne kan'ān ke pāṅch bādshāhoṅ se jang kī. bairūn-e-mulk ke bādshāh yih the: sin'ār se amrāfil, illāsar se aryūk, ailām se kidarlāumar aur joim se tid'āl.

²kan'ān ke bādshāh yih the: sadūm se birā, amūrā se birshā, admā se sinyāb, zaboīm se shimebar aur bālā yānī zuġhar kā bādshāh.

³kan'ān ke in pāṅch bādshāhoṅ kā ittihād huā thā aur wuh wādī-e-siddīm meṅ jamā hue the. (ab siddīm nahīṅ hai, kyūṅki us kī jagah bahīrā-e-murdār ā gayā hai).

⁴kidarlāumar ne bārah sāl tak un par hukūmat kī thī, lekin terhweṅ sāl wuh bāġhī ho gae the.

⁵ab ek sāl ke bād kidarlāumar aur us ke ittihādī apnī faujoṅ ke sāth āe. pahle unhoṅ ne astārāt-qarnaim meṅ rafāiyoṅ ko, hām meṅ zūziyoṅ ko, sawī-qiryatāim meṅ aimiyoṅ ko

⁶aur horiyoṅ ko un ke pahāṛī ilāqe saīr meṅ shikast dī. yūṅ wuh el-fārān tak pahuṅch gae jo registān ke kināre par hai.

⁷phir wuh wāpas āe aur ain-misfāt yānī qādis pahuṅche. unhoṅ ne amālīqiyoṅ ke pūre ilāqe ko tabāh kar diyā aur hassūn-tamr meṅ ābād amoriyoṅ ko bhī shikast dī.

⁸us waqt sadūm, amūrā, admā, zaboīm aur bālā yānī zuġhar ke bādshāh un se laṛne ke lie siddīm kī wādī meṅ jamā hue.

⁹in pāṅch bādshāhoṅ ne ailām ke bādshāh kidarlāumar, joim ke bādshāh tid'āl, sin'ār ke bādshāh amrāfil aur illāsar ke bādshāh aryūk kā muqābalā kiyā.

¹⁰is wādī meṅ tārkol ke muta'addid gaṛhe the. jab bāġhī bādshāh shikast khā kar bhāgne lage to sadūm aur amūrā ke bādshāh in gaṛhoṅ meṅ gir gae jabki bāqī tīn bādshāh bach kar pahāṛī ilāqe meṅ farār hue.

¹¹fathmand bādshāh sadūm aur amūrā kā tamām māl tamām khāne wālī chīzoṅ samet lūṭ kar wāpas chal die.

¹²abrām kā bhatījā lūt sadūm meṅ rahtā thā, is lie wuh use bhī us kī milkiyat samet chhīn kar sāth le gae.

¹³lekin ek ādmī ne jo bach niklā thā ibrānī mard abrām ke pās ā kar use sab kuchh batā diyā. us waqt wuh mamre ke daraḳhtoṅ ke pās ābād thā. mamre amorī thā. wuh aur us ke bhāī iskāl aur āner abrām ke ittihādī the.

¹⁴jab abrām ko patā chalā ki bhatīje ko giriftār kar liyā gayā hai to us ne apne ghar meṅ paidā hue tamām jangāzmūdā ġhulāmoṅ ko jamā karke dān tak dushman kā tāqqub kiyā. us ke sāth 318 afrād the.

¹⁵wahāṅ us ne apne bandoṅ ko gurohoṅ meṅ taqsīm karke rāt ke waqt dushman par hamlā kiyā. dushman shikast khā kar bhāg gayā aur abrām ne damishq ke shimāl meṅ wāqe ḳhūbā tak us kā tāqqub kiyā.

¹⁶wuh un se lūṭā huā tamām māl wāpas le āyā. lūt, us kī jāydād, aurateṅ aur bāqī qaidī bhī dushman ke qabze se bach nikle.

¹⁷jab abrām kidarlāumar aur us ke ittihādiyoṅ par fath pāne ke bād wāpas pahuṅchā to sadūm kā bādshāh us se milne ke lie wādī-e-sawī meṅ āyā. (ise ājkal bādshāh kī wādī kahā jātā hai.)

¹⁸sālim kā bādshāh malik-e-sidq bhī wahāṅ pahuṅchā. wuh apne sāth roṭī aur mai le āyā. malik-e-sidq allāh t'ālā kā imām thā.

¹⁹us ne abrām ko barkat de kar kahā, “abrām par allāh t'ālā kī barkat ho, jo āsmān-o-zamīn kā ḳhāliq hai.

²⁰allāh t'ālā mubārak ho jis ne tere dushmanoṅ ko tere hāth meṅ kar diyā hai.” abrām ne use tamām māl kā daswāṅ hissā diyā.

²¹sadūm ke bādshāh ne abrām se kahā, “mujhe mere log wāpas kar deṅ aur bāqī chīzeṅ apne pās rakh leṅ.”

²²lekin abrām ne us se kahā, “maiṅ ne rab se qasam khāī hai, allāh t'ālā se jo āsmān-o-zamīn kā ḳhāliq hai

²³ki maiṅ us meṅ se kuchh nahīṅ lūṅgā jo āp kā hai, chāhe wuh dhāgā yā jūtī kā tasmā hī kyūṅ na ho. aisā na ho ki āp kaheṅ, ‘maiṅ ne abrām ko daulatmand banā diyā hai.’

²⁴siwāe us khāne ke jo mere ādmiyoṅ ne rāste meṅ khāyā hai maiṅ kuchh qabūl nahīṅ karūṅga. lekin mere ittihādī āner, iskāl aur mamre zarūr apnā apnā hissā leṅ.”