Read Roman Urdu Geo paidāish 15 Bible Online

paidāish 15 - Roman Urdu Geo bible

paidāish 15

¹is ke bād rab royā meṅ abrām se hamkalām huā, “abrām, mat ḍar. maiṅ hī terī sipar hūṅ, maiṅ hī terā bahut baṛā ajr hūṅ.”

²lekin abrām ne etirāz kiyā, “ai rab qādir-e-mutlaq, tū mujhe kyā degā jabki abhī tak mere hāṅ koī bachchā nahīṅ hai aur ilīazar damishqī merī mīrās pāegā.

³tū ne mujhe aulād nahīṅ baḳhshī, is lie mere gharāne kā naukar merā wāris hogā.”

⁴tab abrām ko allāh se ek aur kalām milā. “yih ādmī ilīazar terā wāris nahīṅ hogā balki terā apnā hī beṭā terā wāris hogā.”

⁵rab ne use bāhar le jā kar kahā, “āsmān kī taraf dekh aur sitāroṅ ko ginane kī koshish kar. terī aulād itnī hī beshumār hogī.”

⁶abrām ne rab par bharosā rakhā. is binā par allāh ne use rāstbāz qarār diyā.

⁷phir rab ne us se kahā, “maiṅ rab hūṅ jo tujhe kasdiyoṅ ke ūr se yahāṅ le āyā tāki tujhe yih mulk mīrās meṅ de dūṅ.”

⁸abrām ne pūchhā, “ai rab qādir-e-mutlaq, maiṅ kis tarah jānūṅ ki is mulk par qabzā karūṅga?”

⁹jawāb meṅ rab ne kahā, “mere huzūr ek tīnsālā gāy, ek tīnsālā bakrī aur ek tīnsālā menḍhā le ā. ek qumrī aur ek kabūtar kā bachchā bhī le ānā.”

¹⁰abrām ne aisā hī kiyā aur phir har ek jānwar ko do hissoṅ meṅ kāṭ kar un ko ek dūsre ke āmne-sāmne rakh diyā. lekin parindoṅ ko us ne sālim rahne diyā.

¹¹shikārī parinde un par utarne lage, lekin abrām unheṅ bhagātā rahā.

¹²jab sūraj ḍūbne lagā to abrām par gahrī nīnd tārī huī. us par dahshat aur andherā hī andherā chhā gayā.

¹³phir rab ne us se kahā, “jān le ki terī aulād aise mulk meṅ rahegī jo us kā nahīṅ hogā. wahāṅ wuh ajnabī aur ġhulām hogī, aur us par 400 sāl tak bahut zulm kiyā jāegā.

¹⁴lekin maiṅ us qaum kī adālat karūṅga jis ne use ġhulām banāyā hogā. is ke bād wuh baṛī daulat pā kar us mulk se nikleṅge.

¹⁵tū ḳhud umrrasīdā ho kar salāmatī ke sāth intiqāl karke apne bāpdādā se jā milegā aur dafnāyā jāegā.

¹⁶terī aulād kī chauthī pusht ġhairwatan se wāpas āegī, kyūṅki us waqt tak maiṅ amoriyoṅ ko bardāsht karūṅga. lekin āḳhirkār un ke gunāh itne sangīn ho jāeṅge ki maiṅ unheṅ mulk-e-kan'ān se nikāl dūṅgā.”

¹⁷sūraj ġhurūb huā. andherā chhā gayā. achānak ek dhuāṅdār tanūr aur ek bhaṛaktī huī mash'al nazar āī aur jānwaroṅ ke do do ṭukṛoṅ ke bīch meṅ se guzare.

¹⁸us waqt rab ne abrām ke sāth ahd kiyā. us ne kahā, “maiṅ yih mulk misr kī sarhad se furāt tak terī aulād ko dūṅgā,

¹⁹agarche abhī tak is meṅ qīnī, qanizzī, kadmūnī,

²⁰hittī, farizzī, rafāī,

²¹amorī, kan'ānī, jirjāsī aur yabūsī ābād haiṅ.”