Read Roman Urdu Geo paidāish 16 Bible Online

paidāish 16 - Roman Urdu Geo bible

paidāish 16

¹ab tak abrām kī bīwī sāray ke koī bachchā nahīṅ huā thā. lekin unhoṅ ne ek misrī launḍī rakhī thī jis kā nām hājirā thā,

²aur ek din sāray ne abrām se kahā, “rab ne mujhe bachche paidā karne se mahrūm rakhā hai, is lie merī launḍī ke sāth hambistar hoṅ. shāyad mujhe us kī mārifat bachchā mil jāe.” abrām ne sāray kī bāt mān lī.

³chunāṅche sāray ne apnī misrī launḍī hājirā ko apne shauhar abrām ko de diyā tāki wuh us kī bīwī ban jāe us waqt abrām ko kan'ān meṅ baste hue das sāl ho gae the.

⁴abrām hājirā se hambistar huā to wuh ummīd se ho gaī. jab hājirā ko yih mālūm huā to wuh apnī mālikan ko haqīr jānane lagī.

⁵tab sāray ne abrām se kahā, “jo zulm mujh par kiyā jā rahā hai wuh āp hī par āe. maiṅ ne ḳhud ise āp ke bāzū'oṅ meṅ de diyā thā. ab jab ise mālūm huā hai ki ummīd se hai to mujhe haqīr jānane lagī hai. rab mere aur āp ke darmiyān faislā kare.”

⁶abrām ne jawāb diyā, “dekho, yih tumhārī launḍī hai aur tumhāre iḳhtiyār meṅ hai. jo tumhārā jī chāhe us ke sāth karo.” is par sāray us se itnā burā sulūk karne lagī ki hājirā farār ho gaī.

⁷rab ke farishte ko hājirā registān ke us chashme ke qarīb milī jo shūr ke rāste par hai.

⁸us ne kahā, “sāray kī launḍī hājirā, tū kahāṅ se ā rahī hai aur kahāṅ jā rahī hai?” hājirā ne jawāb diyā, “maiṅ apnī mālikan sāray se farār ho rahī hūṅ.”

⁹rab ke farishte ne us se kahā, “apnī mālikan ke pās wāpas chalī jā aur us ke tābe rah.

¹⁰maiṅ terī aulād itnī baṛhāūṅgā ki use ginā nahīṅ jā sakegā.”

¹¹rab ke farishte ne mazīd kahā, “tū ummīd se hai. ek beṭā paidā hogā. us kā nām ismāīl yānī ‘allāh suntā hai’ rakh, kyūṅki rab ne musībat meṅ terī āwāz sunī.

¹²wuh janglī gadhe kī mānind hogā. us kā hāth har ek ke ḳhilāf aur har ek kā hāth us ke ḳhilāf hogā. to bhī wuh apne tamām bhāiyoṅ ke sāmne ābād rahegā.”

¹³rab ke us ke sāth bāt karne ke bād hājirā ne us kā nām attā-el-roī yānī ‘tū ek mābūd hai jo mujhe deḳhtā hai’ rakhā. us ne kahā, “kyā maiṅ ne wāqaī us ke pīchhe dekhā hai jis ne mujhe dekhā hai?”

¹⁴is lie us jagah ke kueṅ kā nām ‘bair-lahī-roī’ yānī ‘us zindā hastī kā kuāṅ jo mujhe deḳhtā hai’ paṛ gayā. wuh qādis aur barad ke darmiyān wāqe hai.

¹⁵hājirā wāpas gaī, aur us ke beṭā paidā huā. abrām ne us kā nām ismāīl rakhā.

¹⁶us waqt abrām 86 sāl kā thā.