Read Roman Urdu Geo paidāish 17 Bible Online

paidāish 17 - Roman Urdu Geo bible

paidāish 17

¹jab abrām 99 sāl kā thā to rab us par zāhir huā. us ne kahā, “maiṅ allāh qādir-e-mutlaq hūṅ. mere huzūr chaltā rah aur be'ilzām ho.

²maiṅ tere sāth apnā ahd bāndhūṅgā aur terī aulād ko bahut hī zyādā baṛhā dūṅgā.”

³abrām muṅh ke bal gir gayā, aur allāh ne us se kahā,

⁴“merā tere sāth ahd hai ki tū bahut qaumoṅ kā bāp hogā.

⁵ab se tū abrām yānī ‘azīm bāp’ nahīṅ kahlāegā balki terā nām ibrāhīm yānī ‘bahut qaumoṅ kā bāp’ hogā. kyūṅki maiṅ ne tujhe bahut qaumoṅ kā bāp banā diyā hai.

⁶maiṅ tujhe bahut hī zyādā aulād baḳhsh dūṅgā, itnī ki qaumeṅ baneṅgī. tujh se bādshāh bhī nikleṅge.

⁷maiṅ apnā ahd tere aur terī aulād ke sāth nasl-dar-nasl qāim karūṅga, ek abadī ahd jis ke mutābiq maiṅ terā aur terī aulād kā ḳhudā hūṅgā.

⁸tū is waqt mulk-e-kan'ān meṅ pardesī hai, lekin maiṅ is pūre mulk ko tujhe aur terī aulād ko detā hūṅ. yih hameshā tak un kā hī rahegā, aur maiṅ un kā ḳhudā hūṅgā.”

⁹allāh ne ibrāhīm se yih bhī kahā, “tujhe aur terī aulād ko nasl-dar-nasl mere ahd kī sharāit pūrī karnī haiṅ.

¹⁰is kī ek shart yih hai ki har ek mard kā ḳhatnā kiyā jāe

¹¹apnā ḳhatnā karāo. yih hamāre āpas ke ahd kā zāhirī nishān hogā.

¹²lāzim hai ki tū aur terī aulād nasl-dar-nasl apne har ek beṭe kā āṭhweṅ din ḳhatnā karwāeṅ. yih usūl us par bhī lāgū hai jo tere ghar meṅ rahtā hai lekin tujh se rishtā nahīṅ rakhtā, chāhe wuh ghar meṅ paidā huā ho yā kisī ajnabī se ḳharīdā gayā ho.

¹³ghar ke har ek mard kā ḳhatnā karnā lāzim hai, ḳhwāh wuh ghar meṅ paidā huā ho yā kisī ajnabī se ḳharīdā gayā ho. yih is bāt kā nishān hogā ki merā tere sāth ahd hameshā tak qāim rahegā.

¹⁴jis mard kā ḳhatnā na kiyā gayā use us kī qaum meṅ se miṭāyā jāegā, kyūṅki us ne mere ahd kī sharāit pūrī na kīṅ.”

¹⁵allāh ne ibrāhīm se yih bhī kahā, “apnī bīwī sāray kā nām bhī badal denā. ab se us kā nām sāray nahīṅ balki sārā yānī shahzādī hogā.

¹⁶maiṅ use barkat baḳhshūṅgā aur tujhe us kī mārifat beṭā dūṅgā. maiṅ use yahāṅ tak barkat dūṅgā ki us se qaumeṅ balki qaumoṅ ke bādshāh nikleṅge.”

¹⁷ibrāhīm muṅh ke bal gir gayā. lekin dil hī dil meṅ wuh haṅs paṛā aur sochā, “yih kis tarah ho saktā hai? maiṅ to 100 sāl kā hūṅ. aise ādmī ke hāṅ bachchā kis tarah paidā ho saktā hai? aur sārā jaisī umrrasīdā aurat ke bachchā kis tarah paidā ho saktā hai? us kī umr to 90 sāl hai.”

¹⁸us ne allāh se kahā, “hāṅ, ismāīl hī tere sāmne jītā rahe.”

¹⁹allāh ne kahā, “nahīṅ, terī bīwī sārā ke hāṅ beṭā paidā hogā. tū us kā nām is'hāq yānī ‘wuh haṅstā hai’ rakhnā. maiṅ us ke aur us kī aulād ke sāth abadī ahd bāndhūṅgā.

²⁰maiṅ ismāīl ke silsile meṅ bhī terī darḳhwāst pūrī karūṅga. maiṅ use bhī barkat de kar phalne phūlne dūṅgā aur us kī aulād bahut hī zyādā baṛhā dūṅgā. wuh bārah raīsoṅ kā bāp hogā, aur maiṅ us kī mārifat ek baṛī qaum banāūṅgā.

²¹lekin merā ahd is'hāq ke sāth hogā, jo ain ek sāl ke bād sārā ke hāṅ paidā hogā.”

²²allāh kī ibrāhīm ke sāth bāt ḳhatm huī, aur wuh us ke pās se āsmān par chalā gayā.

²³usī din ibrāhīm ne allāh kā hukm pūrā kiyā. us ne ghar ke har ek mard kā ḳhatnā karwāyā, apne beṭe ismāīl kā bhī aur un kā bhī jo us ke ghar meṅ rahte lekin us se rishtā nahīṅ rakhte the, chāhe wuh us ke ghar meṅ paidā hue the yā ḳharīde gae the.

²⁴ibrāhīm 99 sāl kā thā jab us kā ḳhatnā huā,

²⁵jabki us kā beṭā ismāīl 13 sāl kā thā.

²⁶donoṅ kā ḳhatnā usī din huā.

²⁷sāth sāth gharāne ke tamām bāqī mardoṅ kā ḳhatnā bhī huā, bashamūl un ke jin kā ibrāhīm ke sāth rishtā nahīṅ thā, chāhe wuh ghar meṅ paidā hue yā kisī ajnabī se ḳharīde gae the.