Read Roman Urdu Geo paidāish 19 Bible Online

paidāish 19 - Roman Urdu Geo bible

paidāish 19

¹shām ke waqt yih do farishte sadūm pahuṅche. lūt shahr ke darwāze par baiṭhā thā. jab us ne unheṅ dekhā to khaṛe ho kar un se milne gayā aur muṅh ke bal gir kar sijdā kiyā.

²us ne kahā, “sāhibo, apne bande ke ghar tashrīf lāeṅ tāki apne pāoṅ dho kar rāt ko ṭhahreṅ aur phir kal subhsawere uṭh kar apnā safar jārī rakheṅ.” unhoṅ ne kahā, “koī bāt nahīṅ, ham chauk meṅ rāt guzāreṅge.”

³lekin lūt ne unheṅ bahut majbūr kiyā, aur āḳhirkār wuh us ke sāth us ke ghar āe. us ne un ke lie khānā pakāyā aur beḳhamīrī roṭī banāī. phir unhoṅ ne khānā khāyā.

⁴wuh abhī sone ke lie leṭe nahīṅ the ki shahr ke jawānoṅ se le kar būṛhoṅ tak tamām mardoṅ ne lūt ke ghar ko gher liyā.

⁵unhoṅ ne āwāz de kar lūt se kahā, “wuh ādmī kahāṅ haiṅ jo rāt ke waqt tere pās āe? un ko bāhar le ā tāki ham un ke sāth harāmkārī kareṅ.”

⁶lūt un se milne bāhar gayā. us ne apne pīchhe darwāzā band kar liyā

⁷aur kahā, “mere bhāiyo, aisā mat karo, aisī badkārī na karo.

⁸dekho, merī do kuṅwārī beṭiyāṅ haiṅ. unheṅ maiṅ tumhāre pās bāhar le ātā hūṅ. phir jo jī chāhe un ke sāth karo. lekin in ādmiyoṅ ko chhoṛ do, kyūṅki wuh mere mehmān haiṅ.”

⁹unhoṅ ne kahā, “rāste se haṭ jā! dekho, yih shaḳhs jab hamāre pās āyā thā to ajnabī thā, aur ab yih ham par hākim bananā chāhtā hai. ab tere sāth un se zyādā burā sulūk kareṅge.” wuh use majbūr karte karte darwāze ko toṛne ke lie āge baṛhe.

¹⁰lekin ain waqt par andar ke ādmī lūt ko pakaṛ kar andar le āe, phir darwāzā dubārā band kar diyā.

¹¹unhoṅ ne chhoṭoṅ se le kar baṛoṅ tak bāhar ke tamām ādmiyoṅ ko andhā kar diyā, aur wuh darwāze ko ḍhūṅḍte ḍhūṅḍte thak gae.

¹²donoṅ ādmiyoṅ ne lūt se kahā, “kyā terā koī aur rishtedār is shahr meṅ rahtā hai, masalan koī dāmād yā beṭā-beṭī? sab ko sāth le kar yahāṅ se chalā jā,

¹³kyūṅki ham yih maqām tabāh karne ko haiṅ. is ke bāshindoṅ kī badī ke bāis logoṅ kī āheṅ buland ho kar rab ke huzūr pahuṅch gaī haiṅ, is lie us ne hameṅ is ko tabāh karne ke lie bhejā hai.”

¹⁴lūt ghar se niklā aur apne dāmādoṅ se bāt kī jin kā us kī beṭiyoṅ ke sāth rishtā ho chukā thā. us ne kahā, “jaldī karo, is jagah se niklo, kyūṅki rab is shahr ko tabāh karne ko hai.” lekin us ke dāmādoṅ ne ise mazāq hī samjhā.

¹⁵jab pau phaṭne lagī to donoṅ ādmiyoṅ ne lūt ko bahut samjhāyā aur kahā, “jaldī kar! apnī bīwī aur donoṅ beṭiyoṅ ko sāth le kar chalā jā, warnā jab shahr ko sazā dī jāegī to tū bhī halāk ho jāegā.”

¹⁶to bhī wuh jhijaktā rahā. āḳhirkār donoṅ ne lūt, us kī bīwī aur beṭiyoṅ ke hāth pakaṛ kar unheṅ shahr ke bāhar tak pahuṅchā diyā, kyūṅki rab ko lūt par tars ātā thā.

¹⁷jūṅ hī wuh unheṅ bāhar le āe un meṅ se ek ne kahā, “apnī jān bachā kar chalā jā. pīchhe muṛ kar na deḳhnā. maidān meṅ kahīṅ na ṭhaharnā balki pahāṛoṅ meṅ panāh lenā, warnā tū halāk ho jāegā.”

¹⁸lekin lūt ne un se kahā, “nahīṅ mere āqā, aisā na ho.

¹⁹tere bande ko terī nazar-e-karm hāsil huī hai aur tū ne merī jān bachāne meṅ bahut mehrbānī kar dikhāī hai. lekin maiṅ pahāṛoṅ meṅ panāh nahīṅ le saktā. wahāṅ pahuṅchne se pahle yih musībat mujh par ān paṛegī aur maiṅ halāk ho jāūṅgā.

²⁰dekh, qarīb hī ek chhoṭā qasbā hai. wuh itnā nazdīk hai ki maiṅ us taraf hijrat kar saktā hūṅ. mujhe wahāṅ panāh lene de. wuh chhoṭā hī hai, nā? phir merī jān bachegī.”

²¹us ne kahā, “chalo, ṭhīk hai. terī yih darḳhwāst bhī manzūr hai. maiṅ yih qasbā tabāh nahīṅ karūṅga.

²²lekin bhāg kar wahāṅ panāh le, kyūṅki jab tak tū wahāṅ pahuṅch na jāe maiṅ kuchh nahīṅ kar saktā.” is lie qasbe kā nām zuġhar yānī chhoṭā hai.

²³jab lūt zuġhar pahuṅchā to sūraj niklā huā thā.

²⁴tab rab ne āsmān se sadūm aur amūrā par gandhak aur āg barsāī.

²⁵yūṅ us ne us pūre maidān ko us ke shahroṅ, bāshindoṅ aur tamām hariyālī samet tabāh kar diyā.

²⁶lekin farār hote waqt lūt kī bīwī ne pīchhe muṛ kar dekhā to wuh fauran namak kā satūn ban gaī.

²⁷ibrāhīm subhsawere uṭh kar us jagah wāpas āyā jahāṅ wuh kal rab ke sāmne khaṛā huā thā.

²⁸jab us ne nīche sadūm, amūrā aur pūrī wādī kī taraf nazar kī to wahāṅ se bhaṭṭe kā sā dhuāṅ uṭh rahā thā.

²⁹yūṅ allāh ne ibrāhīm ko yād kiyā jab us ne us maidān ke shahr tabāh kie. kyūṅki wuh unheṅ tabāh karne se pahle lūt ko jo un meṅ ābād thā wahāṅ se nikāl lāyā.

³⁰lūt aur us kī beṭiyāṅ zyādā der tak zuġhar meṅ na ṭhahre. wuh rawānā ho kar pahāṛoṅ meṅ ābād hue, kyūṅki lūt zuġhar meṅ rahne se ḍartā thā. wahāṅ unhoṅ ne ek ġhār ko apnā ghar banā liyā.

³¹ek din baṛī beṭī ne chhoṭī se kahā, “abbū būṛhā hai aur yahāṅ koī mard hai nahīṅ jis ke zarī'e hamāre bachche paidā ho sakeṅ.

³²āo, ham abbū ko mai pilāeṅ. jab wuh nashe meṅ dhut ho to ham us ke sāth hambistar ho kar apne lie aulād paidā kareṅ tāki hamārī nasl qāim rahe.”

³³us rāt unhoṅ ne apne bāp ko mai pilāī. jab wuh nashe meṅ thā to baṛī beṭī andar jā kar us ke sāth hambistar huī. chūṅki lūt hosh meṅ nahīṅ thā is lie use kuchh bhī mālūm na huā.

³⁴agle din baṛī bahan ne chhoṭī bahan se kahā, “pichhlī rāt maiṅ abbū se hambistar huī. āo, āj rāt ko ham use dubārā mai pilāeṅ. jab wuh nashe meṅ dhut ho to tum us ke sāth hambistar ho kar apne lie aulād paidā karnā tāki hamārī nasl qāim rahe.”

³⁵chunāṅche unhoṅ ne us rāt bhī apne bāp ko mai pilāī. jab wuh nashe meṅ thā to chhoṭī beṭī uṭh kar us ke sāth hambistar huī. is bār bhī wuh hosh meṅ nahīṅ thā, is lie use kuchh bhī mālūm na huā.

³⁶yūṅ lūt kī beṭiyāṅ apne bāp se ummīd se huīṅ.

³⁷baṛī beṭī ke hāṅ beṭā paidā huā. us ne us kā nām moāb rakhā. us se moābī nikle haiṅ.

³⁸chhoṭī beṭī ke hāṅ bhī beṭā paidā huā. us ne us kā nām bin-ammī rakhā. us se ammonī nikle haiṅ.