Read Roman Urdu Geo paidāish 2 Bible Online

paidāish 2 - Roman Urdu Geo bible

paidāish 2

¹yūṅ āsmān-o-zamīn aur un kī tamām chīzoṅ kī taḳhlīq mukammal huī.

²sātweṅ din allāh kā sārā kām takmīl ko pahuṅchā. is se fāriġh ho kar us ne ārām kiyā.

³allāh ne sātweṅ din ko barkat dī aur use maḳhsūs-o-muqaddas kiyā. kyūṅki us din us ne apne tamām taḳhlīqī kām se fāriġh ho kar ārām kiyā.

⁴yih āsmān-o-zamīn kī taḳhlīq kā bayān hai. jab rab ḳhudā ne āsmān-o-zamīn ko banāyā

⁵to shurū meṅ jhāṛiyāṅ aur paude nahīṅ ugte the. wajah yih thī ki allāh ne bārish kā intizām nahīṅ kiyā thā. aur abhī insān bhī paidā nahīṅ huā thā ki zamīn kī khetībāṛī kartā.

⁶is kī bajāe zamīn meṅ se dhund uṭh kar us kī pūrī satah ko tar kartī thī.

⁷phir rab ḳhudā ne zamīn se miṭṭī le kar insān ko tashkīl diyā aur us ke nathnoṅ meṅ zindagī kā dam phūṅkā to wuh jītī jān huā.

⁸rab ḳhudā ne mashriq meṅ mulk-e-adan meṅ ek bāġh lagāyā. us meṅ us ne us ādmī ko rakhā jise us ne banāyā thā.

⁹rab ḳhudā ke hukm par zamīn meṅ se tarah tarah ke daraḳht phūṭ nikle, aise daraḳht jo deḳhne meṅ dilkash aur khāne ke lie achchhe the. bāġh ke bīch meṅ do daraḳht the. ek kā phal zindagī baḳhshtā thā jabki dūsre kā phal achchhe aur bure kī pahchān dilātā thā.

¹⁰adan meṅ se ek daryā nikal kar bāġh kī ābpāshī kartā thā. wahāṅ se bah kar wuh chār shāḳhoṅ meṅ taqsīm huā.

¹¹pahlī shāḳh kā nām fīsūn hai. wuh mulk-e-hawīlā ko ghere hue bahtī hai jahāṅ ḳhālis sonā, gūgal kā gūṅd aur aqīq-e-ahmar [1] pāe jāte haiṅ.

¹³dūsrī kā nām jaihūn hai jo kūsh ko ghere hue bahtī hai.

¹⁴tīsrī kā nām dijlā hai jo asūr ke mashriq ko jātī hai aur chauthī kā nām furāt hai.

¹⁵rab ḳhudā ne pahle ādmī ko bāġh-e-adan meṅ rakhā tāki wuh us kī bāġhbānī aur hifāzat kare.

¹⁶lekin rab ḳhudā ne use āgāh kiyā, “tujhe har daraḳht kā phal khāne kī ijāzat hai.

¹⁷lekin jis daraḳht kā phal achchhe aur bure kī pahchān dilātā hai us kā phal khānā manā hai. agar use khāe to yaqīnan maregā.”

¹⁸rab ḳhudā ne kahā, “achchhā nahīṅ ki ādmī akelā rahe. maiṅ us ke lie ek munāsib madadgār banātā hūṅ.”

¹⁹rab ḳhudā ne miṭṭī se zamīn par chalne phirne wāle jānwar aur hawā ke parinde banāe the. ab wuh unheṅ ādmī ke pās le āyā tāki mālūm ho jāe ki wuh un ke kyā kyā nām rakhegā. yūṅ har jānwar ko ādam kī taraf se nām mil gayā.

²⁰ādmī ne tamām maweshiyoṅ, parindoṅ aur zamīn par phirne wāle jāndāroṅ ke nām rakhe. lekin use apne lie koī munāsib madadgār na milā.

²¹tab rab ḳhudā ne use sulā diyā. jab wuh gahrī nīnd so rahā thā to us ne us kī pasliyoṅ meṅ se ek nikāl kar us kī jagah gosht bhar diyā.

²²paslī se us ne aurat banāī aur use ādmī ke pās le āyā.

²³use dekh kar wuh pukār uṭhā, “wāh! yih to mujh jaisī hī hai, merī haḍḍiyoṅ meṅ se haḍḍī aur mere gosht meṅ se gosht hai. is kā nām nārī rakhā jāe kyūṅki wuh nar se nikālī gaī hai.”

²⁴is lie mard apne māṅ-bāp ko chhoṛ kar apnī bīwī ke sāth paiwast ho jātā hai, aur wuh donoṅ ek ho jāte haiṅ.

²⁵donoṅ, ādmī aur aurat nange the, lekin yih un ke lie sharm kā bāis nahīṅ thā.