Read Roman Urdu Geo paidāish 20 Bible Online

paidāish 20 - Roman Urdu Geo bible

paidāish 20

¹ibrāhīm wahāṅ se junūb kī taraf dasht-e-najab meṅ chalā gayā aur qādis aur shūr ke darmiyān jā basā. kuchh der ke lie wuh jirār meṅ ṭhahrā, lekin ajnabī kī haisiyat se.

²wahāṅ us ne logoṅ ko batāyā, “sārā merī bahan hai.” is lie jirār ke bādshāh abīmalik ne kisī ko bhijwā diyā ki use mahal meṅ le āe.

³lekin rāt ke waqt allāh ḳhwāb meṅ abīmalik par zāhir huā aur kahā, “maut tere sar par khaṛī hai, kyūṅki jo aurat tū apne ghar le āyā hai wuh shādīshudā hai.”

⁴asal meṅ abīmalik abhī tak sārā ke qarīb nahīṅ gayā thā. us ne kahā, “mere āqā, kyā tū ek bequsūr qaum ko bhī halāk karegā?

⁵kyā ibrāhīm ne mujh se nahīṅ kahā thā ki sārā merī bahan hai? aur sārā ne us kī hāṅ meṅ hāṅ milāī. merī nīyat achchhī thī aur maiṅ ne ġhalat kām nahīṅ kiyā.”

⁶allāh ne kahā, “hāṅ, maiṅ jāntā hūṅ ki is meṅ terī nīyat achchhī thī. is lie maiṅ ne tujhe merā gunāh karne aur use chhūne se rok diyā.

⁷ab us aurat ko us ke shauhar ko wāpas kar de, kyūṅki wuh nabī hai aur tere lie duā karegā. phir tū nahīṅ maregā. lekin agar tū use wāpas nahīṅ karegā to jān le ki terī aur tere logoṅ kī maut yaqīnī hai.”

⁸abīmalik ne subhsawere uṭh kar apne tamām kārindoṅ ko yih sab kuchh batāyā. yih sun kar un par dahshat chhā gaī.

⁹phir abīmalik ne ibrāhīm ko bulā kar kahā, “āp ne hamāre sāth kyā kiyā hai? maiṅ ne āp ke sāth kyā ġhalat kām kiyā ki āp ne mujhe aur merī saltanat ko itne sangīn jurm meṅ phaṅsā diyā hai? jo sulūk āp ne hamāre sāth kar dikhāyā hai wuh kisī bhī shaḳhs ke sāth nahīṅ karnā chāhie.

¹⁰āp ne yih kyūṅ kiyā?”

¹¹ibrāhīm ne jawāb diyā, “maiṅ ne apne dil meṅ kahā ki yahāṅ ke log allāh kā ḳhauf nahīṅ rakhte hoṅge, is lie wuh merī bīwī ko hāsil karne ke lie mujhe qatl kar deṅge.

¹²haqīqat meṅ wuh merī bahan bhī hai. wuh mere bāp kī beṭī hai agarche us kī aur merī māṅ farq haiṅ. yūṅ maiṅ us se shādī kar sakā.

¹³phir jab allāh ne hone diyā ki maiṅ apne bāp ke gharāne se nikal kar idhar udhar phirūṅ to maiṅ ne apnī bīwī se kahā, ‘mujh par yih mehrbānī kar ki jahāṅ bhī ham jāeṅ mere bāre meṅ kah denā ki wuh merā bhāī hai’.”

¹⁴phir abīmalik ne ibrāhīm ko bheṛ-bakriyāṅ, gāy-bail, ġhulām aur launḍiyāṅ de kar us kī bīwī sārā ko use wāpas kar diyā.

¹⁵us ne kahā, “merā mulk āp ke lie khulā hai. jahāṅ jī chāhe us meṅ jā baseṅ.”

¹⁶sārā se us ne kahā, “maiṅ āp ke bhāī ko chāṅdī ke hazār sikke detā hūṅ. is se āp aur āp ke logoṅ ke sāmne āp ke sāth kie gae nārawā sulūk kā izālā ho aur āp ko bequsūr qarār diyā jāe.”

¹⁷tab ibrāhīm ne allāh se duā kī aur allāh ne abīmalik, us kī bīwī aur us kī launḍiyoṅ ko shifā dī, kyūṅki rab ne abīmalik ke gharāne kī tamām auratoṅ ko sārā ke sabab se bāṅjh banā diyā thā. lekin ab un ke hāṅ dubārā bachche paidā hone lage.