Read Roman Urdu Geo paidāish 21 Bible Online

paidāish 21 - Roman Urdu Geo bible

paidāish 21

¹tab rab ne sārā ke sāth waisā hī kiyā jaisā us ne farmāyā thā. jo wādā us ne sārā ke bāre meṅ kiyā thā use us ne pūrā kiyā.

²wuh hāmilā huī aur beṭā paidā huā. ain us waqt būṛhe ibrāhīm ke hāṅ beṭā paidā huā jo allāh ne muqarrar karke use batāyā thā.

³ibrāhīm ne apne is beṭe kā nām is'hāq yānī ‘wuh haṅstā hai’ rakhā.

⁴jab is'hāq āṭh din kā thā to ibrāhīm ne us kā ḳhatnā karāyā, jis tarah allāh ne use hukm diyā thā.

⁵jab is'hāq paidā huā us waqt ibrāhīm 100 sāl kā thā.

⁶sārā ne kahā, “allāh ne mujhe haṅsāyā, aur har koī jo mere bāre meṅ yih sunegā haṅsegā.

⁷is se pahle kaun ibrāhīm se yih kahne kī jur'at kar saktā thā ki sārā apne bachchoṅ ko dūdh pilāegī? aur ab mere hāṅ beṭā paidā huā hai, agarche ibrāhīm būṛhā ho gayā hai.”

⁸is'hāq baṛā hotā gayā. jab us kā dūdh chhuṛāyā gayā to ibrāhīm ne us ke lie baṛī ziyāfat kī.

⁹ek din sārā ne dekhā ki misrī launḍī hājirā kā beṭā ismāīl is'hāq kā mazāq uṛā rahā hai.

¹⁰us ne ibrāhīm se kahā, “is launḍī aur us ke beṭe ko ghar se nikāl deṅ, kyūṅki wuh mere beṭe is'hāq ke sāth mīrās nahīṅ pāegā.”

¹¹ibrāhīm ko yih bāt bahut burī lagī. āḳhir ismāīl bhī us kā beṭā thā.

¹²lekin allāh ne us se kahā, “jo bāt sārā ne apnī launḍī aur us ke beṭe ke bāre meṅ kahī hai wuh tujhe burī na lage. sārā kī bāt mān le, kyūṅki terī nasl is'hāq hī se qāim rahegī.

¹³lekin maiṅ ismāīl se bhī ek qaum banāūṅgā, kyūṅki wuh terā beṭā hai.”

¹⁴ibrāhīm subhsawere uṭhā. us ne roṭī aur pānī kī mashk hājirā ke kandhoṅ par rakh kar use laṛke ke sāth ghar se nikāl diyā. hājirā chalte chalte bair-sabā ke registān meṅ idhar udhar phirne lagī.

¹⁵phir pānī ḳhatm ho gayā. hājirā laṛke ko kisī jhāṛī ke nīche chhoṛ kar

¹⁶koī 300 fuṭ dūr baiṭh gaī. kyūṅki us ne dil meṅ kahā, “maiṅ use marte nahīṅ dekh saktī.” wuh wahāṅ baiṭh kar rone lagī.

¹⁷lekin allāh ne beṭe kī rotī huī āwāz sun lī. allāh ke farishte ne āsmān par se pukār kar hājirā se bāt kī, “hājirā, kyā bāt hai? mat ḍar, kyūṅki allāh ne laṛke kā jo wahāṅ paṛā hai ronā sun liyā hai.

¹⁸uṭh, laṛke ko uṭhā kar us kā hāth thām le, kyūṅki maiṅ us se ek baṛī qaum banāūṅgā.”

¹⁹phir allāh ne hājirā kī āṅkheṅ khol dīṅ, aur us kī nazar ek kueṅ par paṛī. wuh wahāṅ gaī aur mashk ko pānī se bhar kar laṛke ko pilāyā.

²⁰allāh laṛke ke sāth thā. wuh jawān huā aur tīrandāz ban kar bayābān meṅ rahne lagā.

²¹jab wuh fārān ke registān meṅ rahtā thā to us kī māṅ ne use ek misrī aurat se byāh diyā.

²²un dinoṅ meṅ abīmalik aur us ke sipāhsālār fīkul ne ibrāhīm se kahā, “jo kuchh bhī āp karte haiṅ allāh āp ke sāth hai.

²³ab mujh se allāh kī qasam khāeṅ ki āp mujhe aur merī āl-o-aulād ko dhokā nahīṅ deṅge. mujh par aur is mulk par jis meṅ āp pardesī haiṅ wuhī mehrbānī kareṅ jo maiṅ ne āp par kī hai.”

²⁴ibrāhīm ne jawāb diyā, “maiṅ qasam khātā hūṅ.”

²⁵phir us ne abīmalik se shikāyat karte hue kahā, “āp ke bandoṅ ne hamāre ek kueṅ par qabzā kar liyā hai.”

²⁶abīmalik ne kahā, “mujhe nahīṅ mālūm ki kis ne aisā kiyā hai. āp ne bhī mujhe nahīṅ batāyā. āj maiṅ pahlī dafā yih bāt sun rahā hūṅ.”

²⁷tab ibrāhīm ne abīmalik ko bheṛ-bakriyāṅ aur gāy-bail die, aur donoṅ ne ek dūsre ke sāth ahd bāndhā.

²⁸phir ibrāhīm ne bheṛ ke sāt mādā bachchoṅ ko alag kar liyā.

²⁹abīmalik ne pūchhā, “āp ne yih kyūṅ kiyā?”

³⁰ibrāhīm ne jawāb diyā, “bheṛ ke in sāt bachchoṅ ko mujh se le leṅ. yih is ke gawāh hoṅ ki maiṅ ne is kueṅ ko khodā hai.”

³¹is lie us jagah kā nām bair-sabā yānī ‘qasam kā kuāṅ’ rakhā gayā, kyūṅki wahāṅ un donoṅ mardoṅ ne qasam khāī.

³²yūṅ unhoṅ ne bair-sabā meṅ ek dūsre se ahd bāndhā. phir abīmalik aur fīkul filistiyoṅ ke mulk wāpas chale gae.

³³is ke bād ibrāhīm ne bair-sabā meṅ jhāo kā daraḳht lagāyā. wahāṅ us ne rab kā nām le kar us kī ibādat kī jo abadī ḳhudā hai.

³⁴ibrāhīm bahut arse tak filistiyoṅ ke mulk meṅ ābād rahā, lekin ajnabī kī haisiyat se.