Read Roman Urdu Geo paidāish 23 Bible Online

paidāish 23 - Roman Urdu Geo bible

paidāish 23

¹sārā 127 sāl kī umr meṅ habrūn meṅ intiqāl kar gaī.

²us zamāne meṅ habrūn kā nām qiryat-arbā thā, aur wuh mulk-e-kan'ān meṅ thā. ibrāhīm ne us ke pās ā kar mātam kiyā.

³phir wuh janāze ke pās se uṭhā aur hittiyoṅ se bāt kī. us ne kahā,

⁴“maiṅ āp ke darmiyān pardesī aur ġhairshahrī kī haisiyat se rahtā hūṅ. mujhe qabr ke lie zamīn becheṅ tāki apnī bīwī ko apne ghar se le jā kar dafn kar sakūṅ.”

⁵hittiyoṅ ne jawāb diyā, “hamāre āqā, hamārī bāt suneṅ! āp hamāre darmiyān allāh ke raīs haiṅ. apnī bīwī ko hamārī behtarīn qabr meṅ dafn kareṅ. ham meṅ se koī nahīṅ jo āp se apnī qabr kā inkār karegā.”

⁷ibrāhīm uṭhā aur mulk ke bāshindoṅ yānī hittiyoṅ ke sāmne tāzīman jhuk gayā.

⁸us ne kahā, “agar āp is ke lie tayyār haiṅ ki maiṅ apnī bīwī ko apne ghar se le jā kar dafn karūṅ to suhar ke beṭe ifron se merī sifārish kareṅ

⁹ki wuh mujhe makfīlā kā ġhār bech de. wuh us kā hai aur us ke khet ke kināre par hai. maiṅ us kī pūrī qīmat dene ke lie tayyār hūṅ tāki āp ke darmiyān rahte hue mere pās qabr bhī ho.”

¹⁰ifron hittiyoṅ kī jamā'at meṅ maujūd thā. ibrāhīm kī darḳhwāst par us ne un tamām hittiyoṅ ke sāmne jo shahr ke darwāze par jamā the jawāb diyā,

¹¹“nahīṅ, mere āqā! merī bāt suneṅ. maiṅ āp ko yih khet aur us meṅ maujūd ġhār de detā hūṅ. sab jo hāzir haiṅ mere gawāh haiṅ, maiṅ yih āp ko detā hūṅ. apnī bīwī ko wahāṅ dafn kar deṅ.”

¹²ibrāhīm dubārā mulk ke bāshindoṅ ke sāmne adaban jhuk gayā.

¹³us ne sab ke sāmne ifron se kahā, “mehrbānī karke merī bāt par ġhaur kareṅ. maiṅ khet kī pūrī qīmat adā karūṅga. use qabūl kareṅ tāki wahāṅ apnī bīwī ko dafn kar sakūṅ.”

¹⁴ifron ne jawāb diyā, “mere āqā, suneṅ. is zamīn kī qīmat sirf 400 chāṅdī ke sikke hai. [4] āp ke aur mere darmiyān yih kyā hai? apnī bīwī ko dafn kar deṅ.”

¹⁶ibrāhīm ne ifron kī matlūbā qīmat mān lī aur sab ke sāmne chāṅdī ke 400 sikke tol kar ifron ko de die. is ke lie us ne us waqt ke rāij bāṭ istemāl kie.

¹⁷chunāṅche makfīlā meṅ ifron kī zamīn ibrāhīm kī milkiyat ho gaī. yih zamīn mamre ke mashriq meṅ thī. us meṅ khet, khet kā ġhār aur khet kī hudūd meṅ maujūd tamām daraḳht shāmil the.

¹⁸hittiyoṅ kī pūrī jamā'at ne jo shahr ke darwāze par jamā thī zamīn ke intiqāl kī tasdīq kī.

¹⁹phir ibrāhīm ne apnī bīwī sārā ko mulk-e-kan'ān ke us ġhār meṅ dafn kiyā jo mamre yānī habrūn ke mashriq meṅ wāqe makfīlā ke khet meṅ thā.

²⁰is tarīqe se yih khet aur us kā ġhār hittiyoṅ se ibrāhīm ke nām par muntaqil kar diyā gayā tāki us ke pās qabr ho.