Read Roman Urdu Geo paidāish 25 Bible Online

paidāish 25 - Roman Urdu Geo bible

paidāish 25

¹ibrāhīm ne ek aur shādī kī. naī bīwī kā nām qatūrā thā.

²qatūrā ke chhih beṭe paidā hue, zimrān, yuqsān, midān, midiyān, isbāq aur sūḳh.

³yuqsān ke do beṭe the, sabā aur dadān. asūrī, latūsī aur lūmī dadān kī aulād haiṅ.

⁴midiyān ke beṭe aifā, ifar, hanūk, abīdā aur ilda'ā the. yih sab qatūrā kī aulād the.

⁵ibrāhīm ne apnī sārī milkiyat is'hāq ko de dī.

⁶apnī maut se pahle us ne apnī dūsrī bīwiyoṅ ke beṭoṅ ko tohfe de kar apne beṭe se dūr mashriq kī taraf bhej diyā.

⁷ibrāhīm 175 sāl kī umr meṅ faut huā. ġharz wuh bahut umrrasīdā aur zindagī se āsūdā ho kar intiqāl karke apne bāpdādā se jā milā.

⁹us ke beṭoṅ is'hāq aur ismāīl ne use makfīlā ke ġhār meṅ dafn kiyā jo mamre ke mashriq meṅ hai. yih wuhī ġhār thā jise khet samet hittī ādmī ifron bin suhar se ḳharīdā gayā thā. ibrāhīm aur us kī bīwī sārā donoṅ ko us meṅ dafn kiyā gayā.

¹¹ibrāhīm kī wafāt ke bād allāh ne is'hāq ko barkat dī. us waqt is'hāq bair-lahī-roī ke qarīb ābād thā.

¹²ibrāhīm kā beṭā ismāīl jo sārā kī misrī launḍī hājirā ke hāṅ paidā huā us kā nasabnāmā yih hai.

¹³ismāīl ke beṭe baṛe se le kar chhoṭe tak yih haiṅ: nabāyot, qīdār, adbiel, mibsām,

¹⁴mishmā, dūmā, massā,

¹⁵hasad, taimā, yatūr, nafīs aur qidmā.

¹⁶yih beṭe bārah qabīloṅ ke bānī ban gae. aur jahāṅ jahāṅ wuh ābād hue un jaghoṅ kā wuhī nām paṛ gayā.

¹⁷ismāīl 137 sāl kā thā jab wuh kūch karke apne bāpdādā se jā milā.

¹⁸us kī aulād us ilāqe meṅ ābād thī jo hawīlā aur shūr ke darmiyān hai aur jo misr ke mashriq meṅ asūr kī taraf hai. yūṅ ismāīl apne tamām bhāiyoṅ ke sāmne hī ābād huā.

¹⁹yih ibrāhīm ke beṭe is'hāq kā bayān hai.

²⁰is'hāq 40 sāl kā thā jab us kī ribqā se shādī huī. ribqā lāban kī bahan aur arāmī mard batūel kī beṭī thī (batūel masoputāmiyā kā thā).

²¹ribqā ke bachche paidā na hue. lekin is'hāq ne apnī bīwī ke lie duā kī to rab ne us kī sunī, aur ribqā ummīd se huī.

²²us ke peṭ meṅ bachche ek dūsre se zorāzmāī karne lage to wuh rab se pūchhne gaī, “agar yih merī hālat rahegī to phir maiṅ yahāṅ tak kyūṅ pahuṅch gaī hūṅ?”

²³rab ne us se kahā, “tere andar do qaumeṅ haiṅ. wuh tujh se nikal kar ek dūsrī se alag alag ho jāeṅgī. un meṅ se ek zyādā tāqatwar hogī, aur baṛā chhoṭe kī ḳhidmat karegā.”

²⁴paidāish kā waqt ā gayā to juṛwāṅ beṭe paidā hue.

²⁵pahlā bachchā niklā to surḳh sā thā, aur aisā lag rahā thā ki wuh ghane bāloṅ kā koṭ hī pahne hue hai. is lie us kā nām esau yānī ‘bāloṅ wālā’ rakhā gayā.

²⁶is ke bād dūsrā bachchā paidā huā. wuh esau kī eṛī pakaṛe hue niklā, is lie us kā nām yāqūb yānī ‘eṛī pakaṛne wālā’ rakhā gayā. us waqt is'hāq 60 sāl kā thā.

²⁷laṛke jawān hue. esau māhir shikārī ban gayā aur khule maidān meṅ ḳhush rahtā thā. us ke muqābale meṅ yāqūb shāistā thā aur ḍere meṅ rahnā pasand kartā thā.

²⁸is'hāq esau ko pyār kartā thā, kyūṅki wuh shikār kā gosht pasand kartā thā. lekin ribqā yāqūb ko pyār kartī thī.

²⁹ek din yāqūb sālan pakā rahā thā ki esau thakāhārā jangal se āyā.

³⁰us ne kahā, “mujhe jaldī se lāl sālan, hāṅ isī lāl sālan se kuchh khāne ko do. maiṅ to bedam ho rahā hūṅ.” (isī lie bād meṅ us kā nām adom yānī surḳh paṛ gayā.)

³¹yāqūb ne kahā, “pahle mujhe pahlauṭhe kā haq bech do.”

³²esau ne kahā, “maiṅ to bhūk se mar rahā hūṅ, pahlauṭhe kā haq mere kis kām kā?”

³³yāqūb ne kahā, “pahle qasam khā kar mujhe yih haq bech do.” esau ne qasam khā kar use pahlauṭhe kā haq muntaqil kar diyā.

³⁴tab yāqūb ne use kuchh roṭī aur dāl de dī, aur esau ne khāyā aur piyā. phir wuh uṭh kar chalā gayā. yūṅ us ne pahlauṭhe ke haq ko haqīr jānā.