Read Roman Urdu Geo paidāish 27 Bible Online

paidāish 27 - Roman Urdu Geo bible

paidāish 27

¹is'hāq būṛhā ho gayā to us kī nazar dhundlā gaī. us ne apne baṛe beṭe ko bulā kar kahā, “beṭā.” esau ne jawāb diyā, “jī, maiṅ hāzir hūṅ.”

²is'hāq ne kahā, “maiṅ būṛhā ho gayā hūṅ aur ḳhudā jāne kab mar jāūṅ.

³is lie apnā tīr kamān le kar jangal meṅ nikal jā aur mere lie kisī jānwar kā shikār kar.

⁴use tayyār karke aisā lazīz khānā pakā jo mujhe pasand hai. phir use mere pās le ā. marne se pahle maiṅ wuh khānā khā kar tujhe barkat denā chāhtā hūṅ.”

⁵ribqā ne is'hāq kī esau ke sāth bātchīt sun lī thī. jab esau shikār karne ke lie chalā gayā to us ne yāqūb se kahā,

⁶“abhī abhī maiṅ ne tumhāre abbū ko esau se yih bāt karte hue sunā ki

⁷‘mere lie kisī jānwar kā shikār karke le ā. use tayyār karke mere lie lazīz khānā pakā. marne se pahle maiṅ yih khānā khā kar tujhe rab ke sāmne barkat denā chāhtā hūṅ.’

⁸ab suno, mere beṭe! jo kuchh maiṅ batātī hūṅ wuh karo.

⁹jā kar rewaṛ meṅ se bakriyoṅ ke do achchhe achchhe bachche chun lo. phir maiṅ wuhī lazīz khānā pakāūṅgī jo tumhāre abbū ko pasand hai.

¹⁰tum yih khānā us ke pās le jāoge to wuh use khā kar marne se pahle tumheṅ barkat degā.”

¹¹lekin yāqūb ne etirāz kiyā, “āp jāntī haiṅ ki esau ke jism par ghane bāl haiṅ jabki mere bāl kam haiṅ.

¹²kahīṅ mujhe chhūne se mere bāp ko patā na chal jāe ki maiṅ use fareb de rahā hūṅ. phir mujh par barkat nahīṅ balki lānat āegī.”

¹³us kī māṅ ne kahā, “tum par āne wālī lānat mujh par āe, beṭā. bas merī bāt mān lo. jāo aur bakriyoṅ ke wuh bachche le āo.”

¹⁴chunāṅche wuh gayā aur unheṅ apnī māṅ ke pās le āyā. ribqā ne aisā lazīz khānā pakāyā jo yāqūb ke bāp ko pasand thā.

¹⁵esau ke ḳhās mauqoṅ ke lie achchhe libās ribqā ke pās ghar meṅ the. us ne un meṅ se behtarīn libās chun kar apne chhoṭe beṭe ko pahnā diyā.

¹⁶sāth sāth us ne bakriyoṅ kī khāleṅ us ke hāthoṅ aur gardan par jahāṅ bāl na the lapeṭ dīṅ.

¹⁷phir us ne apne beṭe yāqūb ko roṭī aur wuh lazīz khānā diyā jo us ne pakāyā thā.

¹⁸yāqūb ne apne bāp ke pās jā kar kahā, “abbū jī.” is'hāq ne kahā, “jī, beṭā. tū kaun hai?”

¹⁹us ne kahā, “maiṅ āp kā pahlauṭhā esau hūṅ. maiṅ ne wuh kiyā hai jo āp ne mujhe kahā thā. ab zarā uṭheṅ aur baiṭh kar mere shikār kā khānā khāeṅ tāki āp bād meṅ mujhe barkat deṅ.”

²⁰is'hāq ne pūchhā, “beṭā, tujhe yih shikār itnī jaldī kis tarah mil gayā?” us ne jawāb diyā, “rab āp ke ḳhudā ne use mere sāmne se guzarne diyā.”

²¹is'hāq ne kahā, “beṭā, mere qarīb ā tāki maiṅ tujhe chhū lūṅ ki tū wāqaī merā beṭā esau hai ki nahīṅ.”

²²yāqūb apne bāp ke nazdīk āyā. is'hāq ne use chhū kar kahā, “terī āwāz to yāqūb kī hai lekin tere hāth esau ke haiṅ.”

²³yūṅ us ne fareb khāyā. chūṅki yāqūb ke hāth esau ke hāth kī mānind the is lie us ne use barkat dī.

²⁴to bhī us ne dubārā pūchhā, “kyā tū wāqaī merā beṭā esau hai?” yāqūb ne jawāb diyā, “jī, maiṅ wuhī hūṅ.”

²⁵āḳhirkār is'hāq ne kahā, “shikār kā khānā mere pās le ā, beṭā. use khāne ke bād maiṅ tujhe barkat dūṅgā.” yāqūb khānā aur mai le āyā. is'hāq ne khāyā aur piyā,

²⁶phir kahā, “beṭā, mere pās ā aur mujhe bosā de.”

²⁷yāqūb ne pās ā kar use bosā diyā. is'hāq ne us ke libās ko sūṅgh kar use barkat dī. us ne kahā, “mere beṭe kī ḳhushbū us khule maidān kī ḳhushbū kī mānind hai jise rab ne barkat dī hai.

²⁸allāh tujhe āsmān kī os aur zamīn kī zarḳhezī de. wuh tujhe kasrat kā anāj aur angūr kā ras de.

²⁹qaumeṅ terī ḳhidmat kareṅ, aur ummateṅ tere sāmne jhuk jāeṅ. apne bhāiyoṅ kā hukmrān ban, aur terī māṅ kī aulād tere sāmne ghuṭne ṭeke. jo tujh par lānat kare wuh ḳhud lānatī ho aur jo tujhe barkat de wuh ḳhud barkat pāe.”

³⁰is'hāq kī barkat ke bād yāqūb abhī ruḳhsat hī huā thā ki us kā bhāī esau shikār karke wāpas āyā.

³¹wuh bhī lazīz khānā pakā kar use apne bāp ke pās le āyā. us ne kahā, “abbū jī, uṭheṅ aur mere shikār kā khānā khāeṅ tāki āp mujhe barkat deṅ.”

³²is'hāq ne pūchhā, “tū kaun hai?” us ne jawāb diyā, “maiṅ āp kā baṛā beṭā esau hūṅ.”

³³is'hāq ghabrā kar shiddat se kāṅpne lagā. us ne pūchhā, “phir wuh kaun thā jo kisī jānwar kā shikār karke mere pās le āyā? tere āne se zarā pahle maiṅ ne us shikār kā khānā khā kar us shaḳhs ko barkat dī. ab wuh barkat usī par rahegī.”

³⁴yih sun kar esau zordār aur talḳh chīḳheṅ mārne lagā. “abbū, mujhe bhī barkat deṅ,” us ne kahā.

³⁵lekin is'hāq ne jawāb diyā, “tere bhāī ne ā kar mujhe fareb diyā. us ne terī barkat tujh se chhīn lī hai.”

³⁶esau ne kahā, “us kā nām yāqūb ṭhīk hī rakhā gayā hai, kyūṅki ab us ne mujhe dūsrī bār dhokā diyā hai. pahle us ne pahlauṭhe kā haq mujh se chhīn liyā aur ab merī barkat bhī zabardastī le lī. kyā āp ne mere lie koī barkat mahfūz nahīṅ rakhī?”

³⁷lekin is'hāq ne kahā, “maiṅ ne use terā hukmrān aur us ke tamām bhāiyoṅ ko us ke ḳhādim banā diyā hai. maiṅ ne use anāj aur angūr kā ras muhayyā kiyā hai. ab mujhe batā beṭā, kyā kuchh rah gayā hai jo maiṅ tujhe dūṅ?”

³⁸lekin esau ḳhāmosh na huā balki kahā, “abbū, kyā āp ke pās wāqaī sirf yihī barkat thī? abbū, mujhe bhī barkat deṅ.” wuh zār-o-qatār rone lagā.

³⁹phir is'hāq ne kahā, “tū zamīn kī zarḳhezī aur āsmān kī os se mahrūm rahegā.

⁴⁰tū sirf apnī talwār ke sahāre zindā rahegā aur apne bhāī kī ḳhidmat karegā. lekin ek din tū bechain ho kar us kā jūā apnī gardan par se utār phaiṅkegā.”

⁴¹bāp kī barkat ke sabab se esau yāqūb kā dushman ban gayā. us ne dil meṅ kahā, “wuh din qarīb ā gae haiṅ ki abbū intiqāl kar jāeṅge aur ham un kā mātam kareṅge. phir maiṅ apne bhāī ko mār ḍālūṅgā.”

⁴²ribqā ko apne baṛe beṭe esau kā yih irādā mālūm huā. us ne yāqūb ko bulā kar kahā, “tumhārā bhāī badlā lenā chāhtā hai. wuh tumheṅ qatl karne kā irādā rakhtā hai.

⁴³beṭā, ab merī suno, yahāṅ se hijrat kar jāo. hārān shahr meṅ mere bhāī lāban ke pās chale jāo.

⁴⁴wahāṅ kuchh din ṭhahre rahnā jab tak tumhāre bhāī kā ġhussā ṭhanḍā na ho jāe

⁴⁵jab us kā ġhussā ṭhanḍā ho jāegā aur wuh tumhāre us ke sāth kie gae sulūk ko bhūl jāegā, tab maiṅ ittilā dūṅgī ki tum wahāṅ se wāpas ā sakte ho. maiṅ kyūṅ ek hī din meṅ tum donoṅ se mahrūm ho jāūṅ?”

⁴⁶phir ribqā ne is'hāq se bāt kī, “maiṅ esau kī bīwiyoṅ ke sabab se apnī zindagī se tang hūṅ. agar yāqūb bhī is mulk kī auratoṅ meṅ se kisī se shādī kare to behtar hai ki maiṅ pahle hī mar jāūṅ.”