Read Roman Urdu Geo paidāish 30 Bible Online

paidāish 30 - Roman Urdu Geo bible

paidāish 30

¹lekin rāḳhil beaulād hī rahī, is lie wuh apnī bahan se hasad karne lagī. us ne yāqūb se kahā, “mujhe bhī aulād deṅ warnā maiṅ mar jāūṅgī.”

²yāqūb ko ġhussā āyā. us ne kahā, “kyā maiṅ allāh hūṅ jis ne tujhe aulād se mahrūm rakhā hai?”

³rāḳhil ne kahā, “yahāṅ merī launḍī bilhāh hai. us ke sāth hambistar hoṅ tāki wuh mere lie bachche ko janm de aur maiṅ us kī mārifat māṅ ban jāūṅ.”

⁴yūṅ us ne apne shauhar ko bilhāh dī, aur wuh us se hambistar huā.

⁵bilhāh hāmilā huī aur beṭā paidā huā.

⁶rāḳhil ne kahā, “allāh ne mere haq meṅ faislā diyā hai. us ne merī duā sun kar mujhe beṭā de diyā hai.” us ne us kā nām dān yānī ‘kisī ke haq meṅ faislā karne wālā’ rakhā.

⁷bilhāh dubārā hāmilā huī aur ek aur beṭā paidā huā.

⁸rāḳhil ne kahā, “maiṅ ne apnī bahan se saḳht kushtī laṛī hai, lekin jīt gaī hūṅ.” us ne us kā nām naftālī yānī ‘kushtī meṅ mujh se jītā gayā’ rakhā.

⁹jab liyāh ne dekhā ki mere aur bachche paidā nahīṅ ho rahe to us ne yāqūb ko apnī launḍī zilfā de dī tāki wuh bhī us kī bīwī ho.

¹⁰zilfā ke bhī ek beṭā paidā huā.

¹¹liyāh ne kahā, “maiṅ kitnī ḳhushqismat hūṅ!” chunāṅche us ne us kā nām jad yānī ḳhushqismatī rakhā.

¹²phir zilfā ke dūsrā beṭā paidā huā.

¹³liyāh ne kahā, “maiṅ kitnī mubārak hūṅ. ab ḳhawātīn mujhe mubārak kaheṅgī.” us ne us kā nām āshar yānī mubārak rakhā.

¹⁴ek din anāj kī fasal kī kaṭāī ho rahī thī ki rūbin bāhar nikal kar khetoṅ meṅ chalā gayā. wahāṅ use mardumgayāh [5] mil gae. wuh unheṅ apnī māṅ liyāh ke pās le āyā. yih dekh kar rāḳhil ne liyāh se kahā, “mujhe zarā apne beṭe ke mardumgayāh meṅ se kuchh de do.”

¹⁵liyāh ne jawāb diyā, “kyā yihī kāfī nahīṅ ki tum ne mere shauhar ko mujh se chhīn liyā hai? ab mere beṭe ke mardumgayāh ko bhī chhīnanā chāhtī ho.” rāḳhil ne kahā, “agar tum mujhe apne beṭe ke mardumgayāh meṅ se do to āj rāt yāqūb ke sāth so saktī ho.”

¹⁶shām ko yāqūb khetoṅ se wāpas ā rahā thā ki liyāh āge se us se milne ko gaī aur kahā, “āj rāt āp ko mere sāth sonā hai, kyūṅki maiṅ ne apne beṭe ke mardumgayāh ke iwaz āp ko ujrat par liyā hai.” chunāṅche yāqūb ne liyāh ke pās rāt guzārī.

¹⁷us waqt allāh ne liyāh kī duā sunī aur wuh hāmilā huī. us ke pāṅchwāṅ beṭā paidā huā.

¹⁸liyāh ne kahā, “allāh ne mujhe is kā ajr diyā hai ki maiṅ ne apne shauhar ko apnī launḍī dī.” us ne us kā nām ishkār yānī ajr rakhā.

¹⁹is ke bād wuh ek aur dafā hāmilā huī. us ke chhaṭā beṭā paidā huā.

²⁰us ne kahā, “allāh ne mujhe ek achchhā-ḳhāsā tohfā diyā hai. ab merā ḳhāwand mere sāth rahegā, kyūṅki mujh se us ke chhih beṭe paidā hue haiṅ.” us ne us kā nām zabūlūn yānī rihāish rakhā.

²¹is ke bād beṭī paidā huī. us ne us kā nām dīnā rakhā.

²²phir allāh ne rāḳhil ko bhī yād kiyā. us ne us kī duā sun kar use aulād baḳhshī.

²³wuh hāmilā huī aur ek beṭā paidā huā. us ne kahā, “mujhe beṭā atā karne se allāh ne merī izzat bahāl kar dī hai.

²⁴rab mujhe ek aur beṭā de.” us ne us kā nām yūsuf yānī ‘wuh aur de’ rakhā.

²⁵yūsuf kī paidāish ke bād yāqūb ne lāban se kahā, “ab mujhe ijāzat deṅ ki maiṅ apne watan aur ghar ko wāpas jāūṅ.

²⁶mujhe mere bāl-bachche deṅ jin ke iwaz maiṅ ne āp kī ḳhidmat kī hai. phir maiṅ chalā jāūṅgā. āp to ḳhud jānte haiṅ ki maiṅ ne kitnī mehnat ke sāth āp ke lie kām kiyā hai.”

²⁷lekin lāban ne kahā, “mujh par mehrbānī kareṅ aur yihīṅ raheṅ. mujhe ġhaibdānī se patā chalā hai ki rab ne mujhe āp ke sabab se barkat dī hai.

²⁸apnī ujrat ḳhud muqarrar kareṅ to maiṅ wuhī diyā karūṅga.”

²⁹yāqūb ne kahā, “āp jānte haiṅ ki maiṅ ne kis tarah āp ke lie kām kiyā, ki mere wasīle se āp ke maweshī kitne baṛh gae haiṅ.

³⁰jo thoṛā bahut mere āne se pahle āp ke pās thā wuh ab bahut zyādā baṛh gayā hai. rab ne mere kām se āp ko bahut barkat dī hai. ab wuh waqt ā gayā hai ki maiṅ apne ghar ke lie kuchh karūṅ.”

³¹lāban ne kahā, “maiṅ āp ko kyā dūṅ?” yāqūb ne kahā, “mujhe kuchh na deṅ. maiṅ is shart par āp kī bheṛ-bakriyoṅ kī dekh-bhāl jārī rakhūṅgā ki

³²āj maiṅ āp ke rewaṛ meṅ se guzar kar un tamām bheṛoṅ ko alag kar lūṅgā jin ke jism par chhoṭe yā baṛe dhabbe hoṅ yā jo safed na hoṅ. isī tarah maiṅ un tamām bakriyoṅ ko bhī alag kar lūṅgā jin ke jism par chhoṭe yā baṛe dhabbe hoṅ. yihī merī ujrat hogī.

³³āindā jin bakriyoṅ ke jism par chhoṭe yā baṛe dhabbe hoṅge yā jin bheṛoṅ kā rang safed nahīṅ hogā wuh merā ajr hoṅgī. jab kabhī āp un kā muāinā kareṅge to āp mālūm kar sakeṅge ki maiṅ diyānatdār rahā hūṅ. kyūṅki mere jānwaroṅ ke rang se hī zāhir hogā ki maiṅ ne āp kā kuchh churāyā nahīṅ hai.”

³⁴lāban ne kahā, “ṭhīk hai. aisā hī ho jaisā āp ne kahā hai.”

³⁵usī din lāban ne un bakroṅ ko alag kar liyā jin ke jism par dhāriyāṅ yā dhabbe the aur un tamām bakriyoṅ ko jin ke jism par chhoṭe yā baṛe dhabbe the. jis ke bhī jism par safed nishān thā use us ne alag kar liyā. isī tarah us ne un tamām bheṛoṅ ko bhī alag kar liyā jo pūre taur par safed na the. phir lāban ne unheṅ apne beṭoṅ ke sapurd kar diyā

³⁶jo un ke sāth yāqūb se itnā dūr chale gae ki un ke darmiyān tīn din kā fāsilā thā. tab yāqūb lāban kī bāqī bheṛ-bakriyoṅ kī dekh-bhāl kartā gayā.

³⁷yāqūb ne safedā, bādām aur chanār kī harī harī shāḳheṅ le kar un se kuchh chhilkā yūṅ utār diyā ki us par safed dhāriyāṅ nazar āīṅ.

³⁸us ne unheṅ bheṛ-bakriyoṅ ke sāmne un hauzoṅ meṅ gāṛ diyā jahāṅ wuh pānī pīte the, kyūṅki wahāṅ yih jānwar mast ho kar milāp karte the.

³⁹jab wuh in shāḳhoṅ ke sāmne milāp karte to jo bachche paidā hote un ke jism par chhoṭe aur baṛe dhabbe aur dhāriyāṅ hotī thīṅ.

⁴⁰phir yāqūb ne bheṛ ke bachchoṅ ko alag karke apne rewaṛoṅ ko lāban ke un jānwaroṅ ke sāmne charne diyā jin ke jism par dhāriyāṅ thīṅ aur jo safed na the. yūṅ us ne apne zātī rewaṛoṅ ko alag kar liyā aur unheṅ lāban ke rewaṛ ke sāth charne na diyā.

⁴¹lekin us ne yih shāḳheṅ sirf us waqt hauzoṅ meṅ khaṛī kīṅ jab tāqatwar jānwar mast ho kar milāp karte the.

⁴²kamzor jānwaroṅ ke sāth us ne aisā na kiyā. isī tarah lāban ko kamzor jānwar aur yāqūb ko tāqatwar jānwar mil gae.

⁴³yūṅ yāqūb bahut amīr ban gayā. us ke pās bahut se rewaṛ, ġhulām aur launḍiyāṅ, ūṅṭ aur gadhe the.