Read Roman Urdu Geo paidāish 32 Bible Online

paidāish 32 - Roman Urdu Geo bible

paidāish 32

¹yāqūb ne bhī apnā safar jārī rakhā. rāste meṅ allāh ke farishte us se mile.

²unheṅ dekh kar us ne kahā, “yih allāh kī lashkargāh hai.” us ne us maqām kā nām mahanāim yānī ‘do lashkargāheṅ’ rakhā.

³yāqūb ne apne bhāī esau ke pās apne āge āge qāsid bheje. esau saīr yānī adom ke mulk meṅ ābād thā.

⁴unheṅ esau ko batānā thā, “āp kā ḳhādim yāqūb āp ko ittilā detā hai ki maiṅ pardes meṅ jā kar ab tak lāban kā mehmān rahā hūṅ.

⁵wahāṅ mujhe bail, gadhe, bheṛ-bakriyāṅ, ġhulām aur launḍiyāṅ hāsil hue haiṅ. ab maiṅ apne mālik ko ittilā de rahā hūṅ ki wāpas ā gayā hūṅ aur āp kī nazar-e-karm kā ḳhwāhishmand hūṅ.”

⁶jab qāsid wāpas āe to unhoṅ ne kahā, “ham āp ke bhāī esau ke pās gae. aur wuh 400 ādmī sāth le kar āp se milne ā rahā hai.”

⁷yāqūb ghabrā kar bahut pareshān huā. us ne apne sāth ke tamām logoṅ, bheṛ-bakriyoṅ, gāy-bailoṅ aur ūṅṭoṅ ko do gurohoṅ meṅ taqsīm kiyā.

⁸ḳhayāl yih thā ki agar esau ā kar ek guroh par hamlā kare to bāqī guroh shāyad bach jāe

⁹phir yāqūb ne duā kī, “ai mere dādā ibrāhīm aur mere bāp is'hāq ke ḳhudā, merī duā sun! ai rab, tū ne ḳhud mujhe batāyā, ‘apne mulk aur rishtedāroṅ ke pās wāpas jā, aur maiṅ tujhe kāmyābī dūṅgā.’

¹⁰maiṅ us tamām mehrbānī aur wafādārī ke lāiq nahīṅ jo tū ne apne ḳhādim ko dikhāī hai. jab maiṅ ne lāban ke pās jāte waqt daryā-e-yardan ko pār kiyā to mere pās sirf yih lāṭhī thī, aur ab mere pās yih do guroh haiṅ.

¹¹mujhe apne bhāī esau se bachā, kyūṅki mujhe ḍar hai ki wuh mujh par hamlā karke bāl-bachchoṅ samet sab kuchh tabāh kar degā.

¹²tū ne ḳhud kahā thā, ‘maiṅ tujhe kāmyābī dūṅgā aur terī aulād itnī baṛhāūṅgā ki wuh samundar kī ret kī mānind beshumār hogī’.”

¹³yāqūb ne wahāṅ rāt guzārī. phir us ne apne māl meṅ se esau ke lie tohfe chun lie:

¹⁴200 bakriyāṅ, 20 bakre, 200 bheṛeṅ, 20 menḍhe,

¹⁵30 dūdh dene wālī ūṅṭniyāṅ bachchoṅ samet, 40 gāeṅ, 10 bail, 20 gadhiyāṅ aur 10 gadhe.

¹⁶us ne unheṅ muḳhtalif rewaṛoṅ meṅ taqsīm karke apne muḳhtalif naukaroṅ ke sapurd kiyā aur un se kahā, “mere āge āge chalo lekin har rewaṛ ke darmiyān fāsilā rakho.”

¹⁷jo naukar pahle rewaṛ le kar āge niklā us se yāqūb ne kahā, “merā bhāī esau tum se milegā aur pūchhegā, ‘tumhārā mālik kaun hai? tum kahāṅ jā rahe ho? tumhāre sāmne ke jānwar kis ke haiṅ?’

¹⁸jawāb meṅ tumheṅ kahnā hai, ‘yih āp ke ḳhādim yāqūb ke haiṅ. yih tohfā haiṅ jo wuh apne mālik esau ko bhej rahe haiṅ. yāqūb hamāre pīchhe pīchhe ā rahe haiṅ’.”

¹⁹yāqūb ne yihī hukm har ek naukar ko diyā jise rewaṛ le kar us ke āge āge jānā thā. us ne kahā, “jab tum esau se miloge to us se yihī kahnā hai.

²⁰tumheṅ yih bhī zarūr kahnā hai, āp ke ḳhādim yāqūb hamāre pīchhe ā rahe haiṅ.” kyūṅki yāqūb ne sochā, maiṅ in tohfoṅ se us ke sāth sulah karūṅga. phir jab us se mulāqāt hogī to shāyad wuh mujhe qabūl kar le.

²¹yūṅ us ne yih tohfe apne āge āge bhej die. lekin us ne ḳhud ḳhaimāgāh meṅ rāt guzārī.

²²us rāt wuh uṭhā aur apnī do bīwiyoṅ, do launḍiyoṅ aur gyārah beṭoṅ ko le kar daryā-e-yabboq ko wahāṅ se pār kiyā jahāṅ kam gahrāī thī.

²³phir us ne apnā sārā sāmān bhī wahāṅ bhej diyā.

²⁴lekin wuh ḳhud akelā hī pīchhe rah gayā. us waqt ek ādmī āyā aur pau phaṭne tak us se kushtī laṛtā rahā.

²⁵jab us ne dekhā ki maiṅ yāqūb par ġhālib nahīṅ ā rahā to us ne us ke kūlhe ko chhuā, aur us kā joṛ nikal gayā.

²⁶ādmī ne kahā, “mujhe jāne de, kyūṅki pau phaṭne wālī hai.” yāqūb ne kahā, “pahle mujhe barkat deṅ, phir hī āp ko jāne dūṅgā.”

²⁷ādmī ne pūchhā, “terā kyā nām hai?” us ne jawāb diyā, “yāqūb.”

²⁸ādmī ne kahā, “ab se terā nām yāqūb nahīṅ balki isrāīl yānī ‘wuh allāh se laṛtā hai’ hogā. kyūṅki tū allāh aur ādmiyoṅ ke sāth laṛ kar ġhālib āyā hai.”

²⁹yāqūb ne kahā, “mujhe apnā nām batāeṅ.” us ne kahā, “tū kyūṅ merā nām jānanā chāhtā hai?” phir us ne yāqūb ko barkat dī.

³⁰yāqūb ne kahā, “maiṅ ne allāh ko rū-ba-rū dekhā to bhī bach gayā hūṅ.” is lie us ne us maqām kā nām fanī'el rakhā.

³¹yāqūb wahāṅ se chalā to sūraj tulū ho rahā thā. wuh kūlhe ke sabab se langaṛātā rahā.

³²yihī wajah hai ki āj bhī isrāīl kī aulād kūlhe ke joṛ par kī nas ko nahīṅ khāte, kyūṅki yāqūb kī isī nas ko chhuā gayā thā.