Read Roman Urdu Geo paidāish 34 Bible Online

paidāish 34 - Roman Urdu Geo bible

paidāish 34

¹ek din yāqūb aur liyāh kī beṭī dīnā kan'ānī auratoṅ se milne ke lie ghar se niklī.

²shahr meṅ ek ādmī banām sikam rahtā thā. us kā wālid hamor us ilāqe kā hukmrān thā aur hiwwī qaum se tālluq rakhtā thā. jab sikam ne dīnā ko dekhā to us ne use pakaṛ kar us kī ismatdarī kī.

³lekin us kā dil dīnā se lag gayā. wuh us se muhabbat karne lagā aur pyār se us se bāteṅ kartā rahā.

⁴us ne apne bāp se kahā, “is laṛkī ke sāth merī shādī karā deṅ.”

⁵jab yāqūb ne apnī beṭī kī ismatdarī kī ḳhabar sunī to us ke beṭe maweshiyoṅ ke sāth khule maidān meṅ the. is lie wuh un ke wāpas āne tak ḳhāmosh rahā.

⁶sikam kā bāp hamor shahr se nikal kar yāqūb se bāt karne ke lie āyā.

⁷jab yāqūb ke beṭoṅ ko dīnā kī ismatdarī kī ḳhabar milī to un ke dil ranjish aur ġhusse se bhar gae ki sikam ne yāqūb kī beṭī kī ismatdarī se isrāīl kī itnī be'izzatī kī hai. wuh sīdhe khule maidān se wāpas āe.

⁸hamor ne yāqūb se kahā, “mere beṭe kā dil āp kī beṭī se lag gayā hai. mehrbānī karke us kī shādī mere beṭe ke sāth kar deṅ.

⁹hamāre sāth rishtā bāndheṅ, hamāre beṭe-beṭiyoṅ ke sāth shādiyāṅ karāeṅ.

¹⁰phir āp hamāre sāth is mulk meṅ rah sakeṅge aur pūrā mulk āp ke lie khulā hogā. āp jahāṅ bhī chāheṅ ābād ho sakeṅge, tijārat kar sakeṅge aur zamīn ḳharīd sakeṅge.”

¹¹sikam ne ḳhud bhī dīnā ke bāp aur bhāiyoṅ se minnat kī, “agar merī yih darḳhwāst manzūr ho to maiṅ jo kuchh āp kaheṅge adā kar dūṅgā.

¹²jitnā bhī mahr aur tohfe āp muqarrar kareṅ maiṅ de dūṅgā. sirf merī yih ḳhwāhish pūrī kareṅ ki yih laṛkī mere aqd meṅ ā jāe.”

¹³lekin dīnā kī ismatdarī ke sabab se yāqūb ke beṭoṅ ne sikam aur us ke bāp hamor se chālākī karke

¹⁴kahā, “ham aisā nahīṅ kar sakte. ham apnī bahan kī shādī kisī aise ādmī se nahīṅ karā sakte jis kā ḳhatnā nahīṅ huā. is se hamārī be'izzatī hotī hai.

¹⁵ham sirf is shart par rāzī hoṅge ki āp apne tamām laṛkoṅ aur mardoṅ kā ḳhatnā karwāne se hamārī mānind ho jāeṅ.

¹⁶phir āp ke beṭe-beṭiyoṅ ke sāth hamārī shādiyāṅ ho sakeṅgī aur ham āp ke sāth ek qaum ban jāeṅge.

¹⁷lekin agar āp ḳhatnā karāne ke lie tayyār nahīṅ haiṅ to ham apnī bahan ko le kar chale jāeṅge.”

¹⁸yih bāteṅ hamor aur us ke beṭe sikam ko achchhī lagīṅ.

¹⁹naujawān sikam ne fauran un par amal kiyā, kyūṅki wuh dīnā ko bahut pasand kartā thā. sikam apne ḳhāndān meṅ sab se muazzaz thā.

²⁰hamor apne beṭe sikam ke sāth shahr ke darwāze par gayā jahāṅ shahr ke faisle kie jāte the. wahāṅ unhoṅ ne bāqī shahriyoṅ se bāt kī.

²¹“yih ādmī ham se jhagaṛne wāle nahīṅ haiṅ, is lie kyūṅ na wuh is mulk meṅ hamāre sāth raheṅ aur hamāre darmiyān tijārat kareṅ? hamāre mulk meṅ un ke lie bhī kāfī jagah hai. āo, ham un kī beṭiyoṅ aur beṭoṅ se shādiyāṅ kareṅ.

²²lekin yih ādmī sirf is shart par hamāre darmiyān rahne aur ek hī qaum banane ke lie tayyār haiṅ ki ham un kī tarah apne tamām laṛkoṅ aur mardoṅ kā ḳhatnā karāeṅ.

²³agar ham aisā kareṅ to un ke tamām maweshī aur sārā māl hamārā hī hogā. chunāṅche āo, ham muttafiq ho kar faislā kar leṅ tāki wuh hamāre darmiyān raheṅ.”

²⁴sikam ke shahrī hamor aur sikam ke mashware par rāzī hue. tamām laṛkoṅ aur mardoṅ kā ḳhatnā karāyā gayā.

²⁵tīn din ke bād jab ḳhatne ke sabab se logoṅ kī hālat burī thī to dīnā ke do bhāī shamāūn aur lāwī apnī talwāreṅ le kar shahr meṅ dāḳhil hue. kisī ko shak tak nahīṅ thā ki kyā kuchh hogā. andar jā kar unhoṅ ne bachchoṅ se le kar būṛhoṅ tak tamām mardoṅ ko qatl kar diyā

²⁶jin meṅ hamor aur us kā beṭā sikam bhī shāmil the. phir wuh dīnā ko sikam ke ghar se le kar chale gae.

²⁷is qatl-e-ām ke bād yāqūb ke bāqī beṭe shahr par ṭūṭ paṛe aur use lūṭ liyā. yūṅ unhoṅ ne apnī bahan kī ismatdarī kā badlā liyā.

²⁸wuh bheṛ-bakriyāṅ, gāy-bail, gadhe aur shahr ke andar aur bāhar kā sab kuchh le kar chalte bane.

²⁹unhoṅ ne sāre māl par qabzā kiyā, auratoṅ aur bachchoṅ ko qaidī banā liyā aur tamām gharoṅ kā sāmān bhī le gae.

³⁰phir yāqūb ne shamāūn aur lāwī se kahā, “tum ne mujhe musībat meṅ ḍāl diyā hai. ab kan'ānī, farizzī aur mulk ke bāqī bāshindoṅ meṅ merī badnāmī huī hai. mere sāth kam ādmī haiṅ. agar dūsre mil kar ham par hamlā kareṅ to hamāre pūre ḳhāndān kā satyānās ho jāegā.”

³¹lekin unhoṅ ne kahā, “kyā yih ṭhīk thā ki us ne hamārī bahan ke sāth kasbī kā sā sulūk kiyā?”