Read Roman Urdu Geo paidāish 35 Bible Online

paidāish 35 - Roman Urdu Geo bible

paidāish 35

¹allāh ne yāqūb se kahā, “uṭh, bait-el jā kar wahāṅ ābād ho. wahīṅ allāh ke lie jo tujh par zāhir huā jab tū apne bhāī esau se bhāg rahā thā qurbāngāh banā.”

²chunāṅche yāqūb ne apne ghar wāloṅ aur bāqī sāre sāthiyoṅ se kahā, “jo bhī ajnabī but āp ke pās haiṅ unheṅ phaiṅk deṅ. apne āp ko pāk-sāf karke apne kapṛe badleṅ,

³kyūṅki hameṅ yih jagah chhoṛ kar bait-el jānā hai. wahāṅ maiṅ us ḳhudā ke lie qurbāngāh banāūṅgā jis ne musībat ke waqt merī duā sunī. jahāṅ bhī maiṅ gayā wahāṅ wuh mere sāth rahā hai.”

⁴yih sun kar unhoṅ ne yāqūb ko tamām but de die jo un ke pās the aur tamām bāliyāṅ jo unhoṅ ne tāwīz ke taur par kānoṅ meṅ pahan rakhī thīṅ. us ne sab kuchh sikam ke qarīb balūt ke daraḳht ke nīche zamīn meṅ dabā diyā.

⁵phir wuh rawānā hue. irdgird ke shahroṅ par allāh kī taraf se itnā shadīd ḳhauf chhā gayā ki unhoṅ ne yāqūb aur us ke beṭoṅ kā tāqqub na kiyā.

⁶chalte chalte yāqūb apne logoṅ samet lūz pahuṅch gayā jo mulk-e-kan'ān meṅ thā. āj lūz kā nām bait-el hai.

⁷yāqūb ne wahāṅ qurbāngāh banā kar maqām kā nām bait-el yānī ‘allāh kā ghar’ rakhā. kyūṅki wahāṅ allāh ne apne āp ko us par zāhir kiyā thā jab wuh apne bhāī se farār ho rahā thā.

⁸wahāṅ ribqā kī dāyā daborā mar gaī. wuh bait-el ke junūb meṅ balūt ke daraḳht ke nīche dafn huī, is lie us kā nām allon-bakūt yānī ‘rone kā balūt kā daraḳht’ rakhā gayā.

⁹allāh yāqūb par ek dafā aur zāhir huā aur use barkat dī. yih masoputāmiyā se wāpas āne par dūsrī bār huā.

¹⁰allāh ne us se kahā, “ab se terā nām yāqūb nahīṅ balki isrāīl hogā.” yūṅ us ne us kā nayā nām isrāīl rakhā.

¹¹allāh ne yih bhī us se kahā, “maiṅ allāh qādir-e-mutlaq hūṅ. phal phūl aur tādād meṅ baṛhtā jā. ek qaum nahīṅ balki bahut sī qaumeṅ tujh se nikleṅgī. terī aulād meṅ bādshāh bhī shāmil hoṅge.

¹²maiṅ tujhe wuhī mulk dūṅgā jo ibrāhīm aur is'hāq ko diyā hai. aur tere bād use terī aulād ko dūṅgā.”

¹³phir allāh wahāṅ se āsmān par chalā gayā.

¹⁴jahāṅ allāh yāqūb se hamkalām huā thā wahāṅ us ne patthar kā satūn khaṛā kiyā aur us par mai aur tel unḍel kar use maḳhsūs kiyā.

¹⁵us ne jagah kā nām bait-el rakhā.

¹⁶phir yāqūb apne ghar wāloṅ ke sāth bait-el ko chhoṛ kar ifrātā kī taraf chal paṛā. rāḳhil ummīd se thī, aur rāste meṅ bachche kī paidāish kā waqt ā gayā. bachchā baṛī mushkil se paidā huā.

¹⁷jab dard-e-zah urūj ko pahuṅch gayā to dāī ne us se kahā, “mat ḍaro, kyūṅki ek aur beṭā hai.”

¹⁸lekin wuh dam toṛne wālī thī, aur marte marte us ne us kā nām bin-ūnī yānī ‘merī musībat kā beṭā’ rakhā. lekin us ke bāp ne us kā nām binyamīn yānī ‘dahne hāth yā ḳhushqismatī kā beṭā’ rakhā.

¹⁹rāḳhil faut huī, aur wuh ifrātā ke rāste meṅ dafn huī. ājkal ifrātā ko bait-laham kahā jātā hai.

²⁰yāqūb ne us kī qabr par patthar kā satūn khaṛā kiyā. wuh āj tak rāḳhil kī qabr kī nishāndihī kartā hai.

²¹wahāṅ se yāqūb ne apnā safar jārī rakhā aur mijdal-idar kī parlī taraf apne ḳhaime lagāe.

²²jab wuh wahāṅ ṭhahre the to rūbin yāqūb kī haram bilhāh se hambistar huā. yāqūb ko mālūm ho gayā. yāqūb ke bārah beṭe the.

²³liyāh ke beṭe yih the: us kā sab se baṛā beṭā rūbin, phir shamāūn, lāwī, yahūdāh, ishkār aur zabūlūn.

²⁴rāḳhil ke do beṭe the, yūsuf aur binyamīn.

²⁵rāḳhil kī launḍī bilhāh ke do beṭe the, dān aur naftālī.

²⁶liyāh kī launḍī zilfā ke do beṭe the, jad aur āshar. yāqūb ke yih beṭe masoputāmiyā meṅ paidā hue.

²⁷phir yāqūb apne bāp is'hāq ke pās pahuṅch gayā jo habrūn ke qarīb mamre meṅ ajnabī kī haisiyat se rahtā thā (us waqt habrūn kā nām qiryat-arbā thā). wahāṅ is'hāq aur us se pahle ibrāhīm rahā karte the.

²⁸is'hāq 180 sāl kā thā jab wuh umrrasīdā aur zindagī se āsūdā ho kar apne bāpdādā se jā milā. us ke beṭe esau aur yāqūb ne use dafn kiyā.