Read Roman Urdu Geo paidāish 37 Bible Online

paidāish 37 - Roman Urdu Geo bible

paidāish 37

¹yāqūb mulk-e-kan'ān meṅ rahtā thā jahāṅ pahle us kā bāp bhī pardesī thā.

²yih yāqūb ke ḳhāndān kā bayān hai. us waqt yāqūb kā beṭā yūsuf 17 sāl kā thā. wuh apne bhāiyoṅ yānī bilhāh aur zilfā ke beṭoṅ ke sāth bheṛ-bakriyoṅ kī dekh-bhāl kartā thā. yūsuf apne bāp ko apne bhāiyoṅ kī burī harkatoṅ kī ittilā diyā kartā thā.

³yāqūb yūsuf ko apne tamām beṭoṅ kī nisbat zyādā pyār kartā thā. wajah yih thī ki wuh tab paidā huā jab bāp būṛhā thā. is lie yāqūb ne us ke lie ek ḳhās rangdār libās banwāyā.

⁴jab us ke bhāiyoṅ ne dekhā ki hamārā bāp yūsuf ko ham se zyādā pyār kartā hai to wuh us se nafrat karne lage aur adab se us se bāt nahīṅ karte the.

⁵ek rāt yūsuf ne ḳhwāb dekhā. jab us ne apne bhāiyoṅ ko ḳhwāb sunāyā to wuh us se aur bhī nafrat karne lage.

⁶us ne kahā, “suno, maiṅ ne ḳhwāb dekhā.

⁷ham sab khet meṅ pūle bāndh rahe the ki merā pūlā khaṛā ho gayā. āp ke pūle mere pūle ke irdgird jamā ho kar us ke sāmne jhuk gae.”

⁸us ke bhāiyoṅ ne kahā, “achchhā, tū bādshāh ban kar ham par hukūmat karegā?” us ke ḳhwāboṅ aur us kī bātoṅ ke sabab se un kī us se nafrat mazīd baṛh gaī.

⁹kuchh der ke bād yūsuf ne ek aur ḳhwāb dekhā. us ne apne bhāiyoṅ se kahā, “maiṅ ne ek aur ḳhwāb dekhā hai. us meṅ sūraj, chāṅd aur gyārah sitāre mere sāmne jhuk gae.”

¹⁰us ne yih ḳhwāb apne bāp ko bhī sunāyā to us ne use ḍānṭā. us ne kahā, “yih kaisā ḳhwāb hai jo tū ne dekhā! yih kaisī bāt hai ki maiṅ, terī māṅ aur tere bhāī ā kar tere sāmne zamīn tak jhuk jāeṅ?”

¹¹natīje meṅ us ke bhāī us se bahut hasad karne lage. lekin us ke bāp ne dil meṅ yih bāt mahfūz rakhī.

¹²ek din jab yūsuf ke bhāī apne bāp ke rewaṛ charāne ke lie sikam tak pahuṅch gae the

¹³to yāqūb ne yūsuf se kahā, “tere bhāī sikam meṅ rewaṛoṅ ko charā rahe haiṅ. ā, maiṅ tujhe un ke pās bhej detā hūṅ.” yūsuf ne jawāb diyā, “ṭhīk hai.”

¹⁴yāqūb ne kahā, “jā kar mālūm kar ki tere bhāī aur un ke sāth ke rewaṛ ḳhairiyat se haiṅ ki nahīṅ. phir wāpas ā kar mujhe batā denā.” chunāṅche us ke bāp ne use wādī-e-habrūn se bhej diyā, aur yūsuf sikam pahuṅch gayā.

¹⁵wahāṅ wuh idhar udhar phirtā rahā. āḳhirkār ek ādmī us se milā aur pūchhā, “āp kyā ḍhūnḍ rahe haiṅ?”

¹⁶yūsuf ne jawāb diyā, “maiṅ apne bhāiyoṅ ko talāsh kar rahā hūṅ. mujhe batāeṅ ki wuh apne jānwaroṅ ko kahāṅ charā rahe haiṅ.”

¹⁷ādmī ne kahā, “wuh yahāṅ se chale gae haiṅ. maiṅ ne unheṅ yih kahte sunā ki āo, ham dūtain jāeṅ.” yih sun kar yūsuf apne bhāiyoṅ ke pīchhe dūtain chalā gayā. wahāṅ use wuh mil gae.

¹⁸jab yūsuf abhī dūr se nazar āyā to us ke bhāiyoṅ ne us ke pahuṅchne se pahle use qatl karne kā mansūbā banāyā.

¹⁹unhoṅ ne kahā, “dekho, ḳhwāb deḳhne wālā ā rahā hai.

²⁰āo, ham use mār ḍāleṅ aur us kī lāsh kisī gaṛhe meṅ phaiṅk deṅ. ham kaheṅge ki kisī wahshī jānwar ne use phāṛ khāyā hai. phir patā chalegā ki us ke ḳhwāboṅ kī kyā haqīqat hai.”

²¹jab rūbin ne un kī bāteṅ sunīṅ to us ne yūsuf ko bachāne kī koshish kī. us ne kahā, “nahīṅ, ham use qatl na kareṅ.

²²us kā ḳhūn na karnā. beshak use is gaṛhe meṅ phaiṅk deṅ jo registān meṅ hai, lekin use hāth na lagāeṅ.” us ne yih is lie kahā ki wuh use bachā kar bāp ke pās wāpas pahuṅchānā chāhtā thā.

²³jūṅ hī yūsuf apne bhāiyoṅ ke pās pahuṅchā unhoṅ ne us kā rangdār libās utār kar

²⁴yūsuf ko gaṛhe meṅ phaiṅk diyā. gaṛhā ḳhālī thā, us meṅ pānī nahīṅ thā.

²⁵phir wuh roṭī khāne ke lie baiṭh gae. achānak ismāīliyoṅ kā ek qāfilā nazar āyā. wuh jiliād se misr jā rahe the, aur un ke ūṅṭ qīmtī masāloṅ yānī lādan, balsān aur mur se lade hue the.

²⁶tab yahūdāh ne apne bhāiyoṅ se kahā, “hameṅ kyā fāidā hai agar apne bhāī ko qatl karke us ke ḳhūn ko chhupā deṅ?

²⁷āo, ham use in ismāīliyoṅ ke hāth faroḳht kar deṅ. phir koī zarūrat nahīṅ hogī ki ham use hāth lagāeṅ. āḳhir wuh hamārā bhāī hai.” us ke bhāī rāzī hue.

²⁸chunāṅche jab midiyānī tājir wahāṅ se guzare to bhāiyoṅ ne yūsuf ko khaiṅch kar gaṛhe se nikālā aur chāṅdī ke 20 sikkoṅ ke iwaz bech ḍālā. ismāīlī use le kar misr chale gae.

²⁹us waqt rūbin maujūd nahīṅ thā. jab wuh gaṛhe ke pās wāpas āyā to yūsuf us meṅ nahīṅ thā. yih dekh kar us ne pareshānī meṅ apne kapṛe phāṛ ḍāle.

³⁰wuh apne bhāiyoṅ ke pās wāpas gayā aur kahā, “laṛkā nahīṅ hai. ab maiṅ kis tarah abbū ke pās jāūṅ?”

³¹tab unhoṅ ne bakrā zabah karke yūsuf kā libās us ke ḳhūn meṅ ḍuboyā,

³²phir rangdār libās is ḳhabar ke sāth apne bāp ko bhijwā diyā ki “hameṅ yih milā hai. ise ġhaur se dekheṅ. yih āp ke beṭe kā libās to nahīṅ?”

³³yāqūb ne use pahchān liyā aur kahā, “beshak usī kā hai. kisī wahshī jānwar ne use phāṛ khāyā hai. yaqīnan yūsuf ko phāṛ diyā gayā hai.”

³⁴yāqūb ne ġham ke māre apne kapṛe phāṛe aur apnī kamr se ṭāṭ oṛh kar baṛī der tak apne beṭe ke lie mātam kartā rahā.

³⁵us ke tamām beṭe-beṭiyāṅ use tasallī dene āe, lekin us ne tasallī pāne se inkār kiyā aur kahā, “maiṅ pātāl meṅ utarte hue bhī apne beṭe ke lie mātam karūṅga.” is hālat meṅ wuh apne beṭe ke lie rotā rahā.

³⁶itne meṅ midiyānī misr pahuṅch kar yūsuf ko bech chuke the. misr ke bādshāh fir'aun ke ek ālā afsar fūtīfār ne use ḳharīd liyā. fūtīfār bādshāh ke muhāfizoṅ par muqarrar thā.