Read Roman Urdu Geo paidāish 38 Bible Online

paidāish 38 - Roman Urdu Geo bible

paidāish 38

¹un dinoṅ meṅ yahūdāh apne bhāiyoṅ ko chhoṛ kar ek ādmī ke pās rahne lagā jis kā nām hīrā thā aur jo adullām shahr se thā.

²wahāṅ yahūdāh kī mulāqāt ek kan'ānī aurat se huī jis ke bāp kā nām sūa thā. us ne us se shādī kī.

³beṭā paidā huā jis kā nām yahūdāh ne er rakhā.

⁴ek aur beṭā paidā huā jis kā nām bīwī ne onān rakhā.

⁵us ke tīsrā beṭā bhī paidā huā. us ne us kā nām selā rakhā. yahūdāh qazīb meṅ thā jab wuh paidā huā.

⁶yahūdāh ne apne baṛe beṭe er kī shādī ek laṛkī se karāī jis kā nām tamr thā.

⁷rab ke nazdīk er sharīr thā, is lie us ne use halāk kar diyā.

⁸is par yahūdāh ne er ke chhoṭe bhāī onān se kahā, “apne baṛe bhāī kī bewā ke pās jāo aur us se shādī karo tāki tumhāre bhāī kī nasl qāim rahe.”

⁹onān ne aisā kiyā, lekin wuh jāntā thā ki jo bhī bachche paidā hoṅge wuh qānūn ke mutābiq mere baṛe bhāī ke hoṅge. is lie jab bhī wuh tamr se hambistar hotā to nutfā ko zamīn par girā detā, kyūṅki wuh nahīṅ chāhtā thā ki merī mārifat mere bhāī ke bachche paidā hoṅ.

¹⁰yih bāt rab ko burī lagī, aur us ne use bhī sazā-e-maut dī.

¹¹tab yahūdāh ne apnī bahū tamr se kahā, “apne bāp ke ghar wāpas chalī jāo aur us waqt tak bewā raho jab tak merā beṭā selā baṛā na ho jāe.” us ne yih is lie kahā ki use ḍar thā ki kahīṅ selā bhī apne bhāiyoṅ kī tarah mar na jāe chunāṅche tamr apne maike chalī gaī.

¹²kāfī dinoṅ ke bād yahūdāh kī bīwī jo sūa kī beṭī thī mar gaī. mātam kā waqt guzar gayā to yahūdāh apne adullāmī dost hīrā ke sāth timnat gayā jahāṅ yahūdāh kī bheṛoṅ kī pashm katrī jā rahī thī.

¹³tamr ko batāyā gayā, “āp kā susar apnī bheṛoṅ kī pashm katarne ke lie timnat jā rahā hai.”

¹⁴yih sun kar tamr ne bewā ke kapṛe utār kar ām kapṛe pahan lie. phir wuh apnā muṅh chādar se lapeṭ kar ainīm shahr ke darwāze par baiṭh gaī jo timnat ke rāste meṅ thā. tamr ne yih harkat is lie kī ki yahūdāh kā beṭā selā ab bāliġh ho chukā thā to bhī us kī us ke sāth shādī nahīṅ kī gaī thī.

¹⁵jab yahūdāh wahāṅ se guzarā to us ne use dekh kar sochā ki yih kasbī hai, kyūṅki us ne apnā muṅh chhupāyā huā thā.

¹⁶wuh rāste se haṭ kar us ke pās gayā aur kahā, “zarā mujhe apne hāṅ āne deṅ.” (us ne nahīṅ pahchānā ki yih merī bahū hai). tamr ne kahā, “āp mujhe kyā deṅge?”

¹⁷us ne jawāb diyā, “maiṅ āp ko bakrī kā bachchā bhej dūṅgā.” tamr ne kahā, “ṭhīk hai, lekin use bhejne tak mujhe zamānat deṅ.”

¹⁸us ne pūchhā, “maiṅ āp ko kyā dūṅ?” tamr ne kahā, “apnī muhr aur use gale meṅ laṭkāne kī ḍorī. wuh lāṭhī bhī deṅ jo āp pakaṛe hue haiṅ.” chunāṅche yahūdāh use yih chīzeṅ de kar us ke sāth hambistar huā. natīje meṅ tamr ummīd se huī.

¹⁹phir tamr uṭh kar apne ghar wāpas chalī gaī. us ne apnī chādar utār kar dubārā bewā ke kapṛe pahan lie.

²⁰yahūdāh ne apne dost hīrā adullāmī ke hāth bakrī kā bachchā bhej diyā tāki wuh chīzeṅ wāpas mil jāeṅ jo us ne zamānat ke taur par dī thīṅ. lekin hīrā ko patā na chalā ki aurat kahāṅ hai.

²¹us ne ainīm ke bāshindoṅ se pūchhā, “wuh kasbī kahāṅ hai jo yahāṅ saṛak par baiṭhī thī?” unhoṅ ne jawāb diyā, “yahāṅ aisī koī kasbī nahīṅ thī.”

²²us ne yahūdāh ke pās wāpas jā kar kahā, “wuh mujhe nahīṅ milī balki wahāṅ ke rahne wāloṅ ne kahā ki yahāṅ koī aisī kasbī thī nahīṅ.”

²³yahūdāh ne kahā, “phir wuh zamānat kī chīzeṅ apne pās hī rakhe. use chhoṛ do warnā log hamārā mazāq uṛāeṅge. ham ne to pūrī koshish kī ki use bakrī kā bachchā mil jāe, lekin khoj lagāne ke bāwujūd āp ko patā na chalā ki wuh kahāṅ hai.”

²⁴tīn māh ke bād yahūdāh ko ittilā dī gaī, “āp kī bahū tamr ne zinā kiyā hai, aur ab wuh hāmilā hai.” yahūdāh ne hukm diyā, “use bāhar lā kar jalā do.”

²⁵tamr ko jalāne ke lie bāhar lāyā gayā to us ne apne susar ko ḳhabar bhej dī, “yih chīzeṅ dekheṅ. yih us ādmī kī haiṅ jis kī mārifat maiṅ ummīd se hūṅ. patā kareṅ ki yih muhr, us kī ḍorī aur yih lāṭhī kis kī haiṅ.”

²⁶yahūdāh ne unheṅ pahchān liyā. us ne kahā, “maiṅ nahīṅ balki yih aurat haq par hai, kyūṅki maiṅ ne us kī apne beṭe selā se shādī nahīṅ karāī.” lekin bād meṅ yahūdāh kabhī bhī tamr se hambistar na huā.

²⁷jab janm dene kā waqt āyā to mālūm huā ki juṛwāṅ bachche haiṅ.

²⁸ek bachche kā hāth niklā to dāī ne use pakaṛ kar us meṅ surḳh dhāgā bāndh diyā aur kahā, “yih pahle paidā huā.”

²⁹lekin us ne apnā hāth wāpas khaiṅch liyā, aur us kā bhāī pahle paidā huā. yih dekh kar dāī bol uṭhī, “tū kis tarah phūṭ niklā hai!” us ne us kā nām fāras yānī phūṭ rakhā.

³⁰phir us kā bhāī paidā huā jis ke hāth meṅ surḳh dhāgā bandhā huā thā. us kā nām zārah yānī chamak rakhā gayā.