Read Roman Urdu Geo paidāish 40 Bible Online

paidāish 40 - Roman Urdu Geo bible

paidāish 40

¹kuchh der ke bād yūṅ huā ki misr ke bādshāh ke sardār sāqī aur bekarī ke inchārj ne apne mālik kā gunāh kiyā.

²fir'aun ko donoṅ afsaroṅ par ġhussā ā gayā.

³us ne unheṅ us qaidḳhāne meṅ ḍāl diyā jo shāhī muhāfizoṅ ke kaptān ke sapurd thā aur jis meṅ yūsuf thā.

⁴muhāfizoṅ ke kaptān ne unheṅ yūsuf ke hawāle kiyā tāki wuh un kī ḳhidmat kare. wahāṅ wuh kāfī der tak rahe.

⁵ek rāt bādshāh ke sardār sāqī aur bekarī ke inchārj ne ḳhwāb dekhā. donoṅ kā ḳhwāb farq farq thā, aur un kā matlab bhī farq farq thā.

⁶jab yūsuf subh ke waqt un ke pās āyā to wuh dabe hue nazar āe.

⁷us ne un se pūchhā, “āj āp kyūṅ itne pareshān haiṅ?”

⁸unhoṅ ne jawāb diyā, “ham donoṅ ne ḳhwāb dekhā hai, aur koī nahīṅ jo hameṅ un kā matlab batāe.” yūsuf ne kahā, “ḳhwāboṅ kī tābīr to allāh kā kām hai. zarā mujhe apne ḳhwāb to sunāeṅ.”

⁹sardār sāqī ne shurū kiyā, “maiṅ ne ḳhwāb meṅ apne sāmne angūr kī bel dekhī.

¹⁰us kī tīn shāḳheṅ thīṅ. us ke patte lage, koṅpleṅ phūṭ niklīṅ aur angūr pak gae.

¹¹mere hāth meṅ bādshāh kā pyālā thā, aur maiṅ ne angūroṅ ko toṛ kar yūṅ bhīṅch diyā ki un kā ras bādshāh ke pyāle meṅ ā gayā. phir maiṅ ne pyālā bādshāh ko pesh kiyā.”

¹²yūsuf ne kahā, “tīn shāḳhoṅ se murād tīn din haiṅ.

¹³tīn din ke bād fir'aun āp ko bahāl kar legā. āp ko pahlī zimmādārī wāpas mil jāegī. āp pahle kī tarah sardār sāqī kī haisiyat se bādshāh kā pyālā saṅbhāleṅge.

¹⁴lekin jab āp bahāl ho jāeṅ to merā ḳhayāl kareṅ. mehrbānī karke bādshāh ke sāmne merā zikr kareṅ tāki maiṅ yahāṅ se rihā ho jāūṅ.

¹⁵kyūṅki mujhe ibrāniyoṅ ke mulk se aġhwā karke yahāṅ lāyā gayā hai, aur yahāṅ bhī mujh se koī aisī ġhaltī nahīṅ huī ki mujhe is gaṛhe meṅ phaiṅkā jātā.”

¹⁶jab shāhī bekarī ke inchārj ne dekhā ki sardār sāqī ke ḳhwāb kā achchhā matlab niklā to us ne yūsuf se kahā, “merā ḳhwāb bhī suneṅ. maiṅ ne sar par tīn ṭokriyāṅ uṭhā rakhī thīṅ jo bekarī kī chīzoṅ se bharī huī thīṅ.

¹⁷sab se ūpar wālī ṭokrī meṅ wuh tamām chīzeṅ thīṅ jo bādshāh kī mez ke lie banāī jātī haiṅ. lekin parinde ā kar unheṅ khā rahe the.”

¹⁸yūsuf ne kahā, “tīn ṭokriyoṅ se murād tīn din haiṅ.

¹⁹tīn din ke bād hī fir'aun āp ko qaidḳhāne se nikāl kar daraḳht se laṭkā degā. parinde āp kī lāsh ko khā jāeṅge.”

²⁰tīn din ke bād bādshāh kī sālgirah thī. us ne apne tamām afsaroṅ kī ziyāfat kī. is mauqe par us ne sardār sāqī aur bekarī ke inchārj ko jel se nikāl kar apne huzūr lāne kā hukm diyā.

²¹sardār sāqī ko pahle wālī zimmādārī sauṅp dī gaī,

²²lekin bekarī ke inchārj ko sazā-e-maut de kar daraḳht se laṭkā diyā gayā. sab kuchh waisā hī huā jaisā yūsuf ne kahā thā.

²³lekin sardār sāqī ne yūsuf kā ḳhayāl na kiyā balki use bhūl hī gayā.