Read Roman Urdu Geo paidāish 41 Bible Online

paidāish 41 - Roman Urdu Geo bible

paidāish 41

¹do sāl guzar gae ki ek rāt bādshāh ne ḳhwāb dekhā. wuh daryā-e-nīl ke kināre khaṛā thā.

²achānak daryā meṅ se sāt ḳhūbsūrat aur moṭī gāeṅ nikal kar sarkanḍoṅ meṅ charne lagīṅ.

³un ke bād sāt aur gāeṅ nikal āīṅ. lekin wuh badsūrat aur dublī-patlī thīṅ. wuh daryā ke kināre dūsrī gāyoṅ ke pās khaṛī ho kar

⁴pahlī sāt ḳhūbsūrat aur moṭī moṭī gāyoṅ ko khā gaīṅ. is ke bād misr kā bādshāh jāg uṭhā.

⁵phir wuh dubārā so gayā. is dafā us ne ek aur ḳhwāb dekhā. anāj ke ek paude par sāt moṭī moṭī aur achchhī achchhī bāleṅ lagī thīṅ.

⁶phir sāt aur bāleṅ phūṭ niklīṅ jo dublī-patlī aur mashriqī hawā se jhulsī huī thīṅ.

⁷anāj kī sāt dublī-patlī bāloṅ ne sāt moṭī aur ḳhūbsūrat bāloṅ ko nigal liyā. phir fir'aun jāg uṭhā to mālūm huā ki maiṅ ne ḳhwāb hī dekhā hai.

⁸subh huī to wuh pareshān thā, is lie us ne misr ke tamām jādūgaroṅ aur ālimoṅ ko bulāyā. us ne unheṅ apne ḳhwāb sunāe, lekin koī bhī un kī tābīr na kar sakā.

⁹phir sardār sāqī ne fir'aun se kahā, “āj mujhe apnī ḳhatāeṅ yād ātī haiṅ.

¹⁰ek din fir'aun apne ḳhādimoṅ se nārāz hue. huzūr ne mujhe aur bekarī ke inchārj ko qaidḳhāne meṅ ḍalwā diyā jis par shāhī muhāfizoṅ kā kaptān muqarrar thā.

¹¹ek hī rāt meṅ ham donoṅ ne muḳhtalif ḳhwāb dekhe jin kā matlab farq farq thā.

¹²wahāṅ jel meṅ ek ibrānī naujawān thā. wuh muhāfizoṅ ke kaptān kā ġhulām thā. ham ne use apne ḳhwāb sunāe to us ne hameṅ un kā matlab batā diyā.

¹³aur jo kuchh bhī us ne batāyā sab kuchh waisā hī huā. mujhe apnī zimmādārī wāpas mil gaī jabki bekarī ke inchārj ko sazā-e-maut de kar daraḳht se laṭkā diyā gayā.”

¹⁴yih sun kar fir'aun ne yūsuf ko bulāyā, aur use jaldī se qaidḳhāne se lāyā gayā. us ne shew karwā kar apne kapṛe badle aur sīdhe bādshāh ke huzūr pahuṅchā.

¹⁵bādshāh ne kahā, “maiṅ ne ḳhwāb dekhā hai, aur yahāṅ koī nahīṅ jo us kī tābīr kar sake. lekin sunā hai ki tū ḳhwāb ko sun kar us kā matlab batā saktā hai.”

¹⁶yūsuf ne jawāb diyā, “yih mere iḳhtiyār meṅ nahīṅ hai. lekin allāh hī bādshāh ko salāmatī kā paiġhām degā.”

¹⁷fir'aun ne yūsuf ko apne ḳhwāb sunāe, “maiṅ ḳhwāb meṅ daryā-e-nīl ke kināre khaṛā thā.

¹⁸achānak daryā meṅ se sāt moṭī moṭī aur ḳhūbsūrat gāeṅ nikal kar sarkanḍoṅ meṅ charne lagīṅ.

¹⁹is ke bād sāt aur gāeṅ niklīṅ. wuh nihāyat badsūrat aur dublī-patlī thīṅ. maiṅ ne itnī badsūrat gāeṅ misr meṅ kahīṅ bhī nahīṅ dekhīṅ.

²⁰dublī aur badsūrat gāeṅ pahlī moṭī gāyoṅ ko khā gaīṅ.

²¹aur nigalne ke bād bhī mālūm nahīṅ hotā thā ki unhoṅ ne moṭī gāyoṅ ko khāyā hai. wuh pahle kī tarah badsūrat hī thīṅ. is ke bād maiṅ jāg uṭhā.

²²phir maiṅ ne ek aur ḳhwāb dekhā. sāt moṭī aur achchhī bāleṅ ek hī paude par lagī thīṅ.

²³is ke bād sāt aur bāleṅ niklīṅ jo ḳharāb, dublī-patlī aur mashriqī hawā se jhulsī huī thīṅ.

²⁴sāt dublī-patlī bāleṅ sāt achchhī bāloṅ ko nigal gaīṅ. maiṅ ne yih sab kuchh apne jādūgaroṅ ko batāyā, lekin wuh is kī tābīr na kar sake.”

²⁵yūsuf ne bādshāh se kahā, “donoṅ ḳhwāboṅ kā ek hī matlab hai. in se allāh ne huzūr par zāhir kiyā hai ki wuh kyā kuchh karne ko hai.

²⁶sāt achchhī gāyoṅ se murād sāt sāl haiṅ. isī tarah sāt achchhī bāloṅ se murād bhī sāt sāl haiṅ. donoṅ ḳhwāb ek hī bāt bayān karte haiṅ.

²⁷jo sāt dublī aur badsūrat gāeṅ bād meṅ nikleṅ un se murād sāt aur sāl haiṅ. yihī sāt dublī-patlī aur mashriqī hawā se jhulsī huī bāloṅ kā matlab bhī hai. wuh ek hī bāt bayān kartī haiṅ ki sāt sāl tak kāl paṛegā.

²⁸yih wuhī bāt hai jo maiṅ ne huzūr se kahī ki allāh ne huzūr par zāhir kiyā hai ki wuh kyā karegā.

²⁹sāt sāl āeṅge jin ke daurān misr ke pūre mulk meṅ kasrat se paidāwār hogī.

³⁰us ke bād sāt sāl kāl paṛegā. kāl itnā shadīd hogā ki log bhūl jāeṅge ki pahle itnī kasrat thī. kyūṅki kāl mulk ko tabāh kar degā.

³¹kāl kī shiddat ke bāis achchhe sāloṅ kī kasrat yād hī nahīṅ rahegī.

³²huzūr ko is lie ek hī paiġhām do muḳhtalif ḳhwāboṅ kī sūrat meṅ milā ki allāh is kā pakkā irādā rakhtā hai, aur wuh jald hī is par amal karegā.

³³ab bādshāh kisī samajhdār aur dānishmand ādmī ko mulk-e-misr kā intizām sauṅpeṅ.

³⁴is ke ilāwā wuh aise ādmī muqarrar kareṅ jo sāt achchhe sāloṅ ke daurān har fasal kā pāṅchwāṅ hissā leṅ.

³⁵wuh un achchhe sāloṅ ke daurān ḳhurāk jamā kareṅ. bādshāh unheṅ iḳhtiyār deṅ ki wuh shahroṅ meṅ godām banā kar anāj ko mahfūz kar leṅ.

³⁶yih ḳhurāk kāl ke un sāt sāloṅ ke lie maḳhsūs kī jāe jo misr meṅ āne wāle haiṅ. yūṅ mulk tabāh nahīṅ hogā.”

³⁷yih mansūbā bādshāh aur us ke afsarān ko achchhā lagā.

³⁸us ne un se kahā, “hameṅ is kām ke lie yūsuf se zyādā lāiq ādmī nahīṅ milegā. us meṅ allāh kī rūh hai.”

³⁹bādshāh ne yūsuf se kahā, “allāh ne yih sab kuchh tujh par zāhir kiyā hai, is lie koī bhī tujh se zyādā samajhdār aur dānishmand nahīṅ hai.

⁴⁰maiṅ tujhe apne mahal par muqarrar kartā hūṅ. merī tamām riāyā tere tābe rahegī. terā iḳhtiyār sirf mere iḳhtiyār se kam hogā.

⁴¹ab maiṅ tujhe pūre mulk-e-misr par hākim muqarrar kartā hūṅ.”

⁴²bādshāh ne apnī unglī se wuh angūṭhī utārī jis se muhr lagātā thā aur use yūsuf kī unglī meṅ pahnā diyā. us ne use katān kā bārīk libās pahnāyā aur us ke gale meṅ sone kā gulūband pahnā diyā.

⁴³phir us ne use apne dūsre rath meṅ sawār kiyā aur log us ke āge āge pukārte rahe, “ghuṭne ṭeko! ghuṭne ṭeko!” yūṅ yūsuf pūre misr kā hākim banā.

⁴⁴fir'aun ne us se kahā, “maiṅ to bādshāh hūṅ, lekin terī ijāzat ke baġhair pūre mulk meṅ koī bhī apnā hāth yā pāoṅ nahīṅ hilāegā.”

⁴⁵us ne yūsuf kā misrī nām sāfanat-fāneh rakhā aur on ke pujārī fotīfirā kī beṭī āsanat ke sāth us kī shādī karāī. yūsuf 30 sāl kā thā jab wuh misr ke bādshāh fir'aun kī ḳhidmat karne lagā. us ne fir'aun ke huzūr se nikal kar misr kā daurā kiyā.

⁴⁶

⁴⁷sāt achchhe sāloṅ ke daurān mulk meṅ nihāyat achchhī fasleṅ ugīṅ.

⁴⁸yūsuf ne tamām ḳhurāk jamā karke shahroṅ meṅ mahfūz kar lī. har shahr meṅ us ne irdgird ke khetoṅ kī paidāwār mahfūz rakhī.

⁴⁹jamāshudā anāj samundar kī ret kī mānind bakasrat thā. itnā anāj thā ki yūsuf ne āḳhirkār us kī paimāish karnā chhoṛ diyā.

⁵⁰kāl se pahle yūsuf aur āsanat ke do beṭe paidā hue.

⁵¹us ne pahle kā nām manassī yānī ‘jo bhulā detā hai’ rakhā. kyūṅki us ne kahā, “allāh ne merī musībat aur mere bāp kā gharānā merī yāddāsht se nikāl diyā hai.”

⁵²dūsre kā nām us ne ifrāīm yānī ‘dugnā phaldār’ rakhā. kyūṅki us ne kahā, “allāh ne mujhe merī musībat ke mulk meṅ phalne phūlne diyā hai.”

⁵³sāt achchhe sāl jin meṅ kasrat kī fasleṅ ugīṅ guzar gae.

⁵⁴phir kāl ke sāt sāl shurū hue jis tarah yūsuf ne kahā thā. tamām dīgar mamālik meṅ bhī kāl paṛ gayā, lekin misr meṅ wāfir ḳhurāk pāī jātī thī.

⁵⁵jab kāl ne tamām misr meṅ zor pakaṛā to log chīḳh kar khāne ke lie bādshāh se minnat karne lage. tab fir'aun ne un se kahā, “yūsuf ke pās jāo. jo kuchh wuh tumheṅ batāegā wuhī karo.”

⁵⁶jab kāl pūrī duniyā meṅ phail gayā to yūsuf ne anāj ke godām khol kar misriyoṅ ko anāj bech diyā. kyūṅki kāl ke bāis mulk ke hālāt bahut ḳharāb ho gae the.

⁵⁷tamām mamālik se bhī log anāj ḳharīdne ke lie yūsuf ke pās āe, kyūṅki pūrī duniyā saḳht kāl kī girift meṅ thī.