Read Roman Urdu Geo paidāish 42 Bible Online

paidāish 42 - Roman Urdu Geo bible

paidāish 42

¹jab yāqūb ko mālūm huā ki misr meṅ anāj hai to us ne apne beṭoṅ se kahā, “tum kyūṅ ek dūsre kā muṅh takte ho?

²sunā hai ki misr meṅ anāj hai. wahāṅ jā kar hamāre lie kuchh ḳharīd lāo tāki ham bhūke na mareṅ.”

³tab yūsuf ke das bhāī anāj ḳharīdne ke lie misr gae.

⁴lekin yāqūb ne yūsuf ke sage bhāī binyamīn ko sāth na bhejā, kyūṅki us ne kahā, “aisā na ho ki use jānī nuqsān pahuṅche.”

⁵yūṅ yāqūb ke beṭe bahut sāre aur logoṅ ke sāth misr gae. kyūṅki mulk-e-kan'ān bhī kāl kī girift meṅ thā.

⁶yūsuf misr ke hākim kī haisiyat se logoṅ ko anāj bechtā thā, is lie us ke bhāī ā kar us ke sāmne muṅh ke bal jhuk gae.

⁷jab yūsuf ne apne bhāiyoṅ ko dekhā to us ne unheṅ pahchān liyā lekin aisā kiyā jaisā un se nāwāqif ho aur saḳhtī se un se bāt kī, “tum kahāṅ se āe ho?” unhoṅ ne jawāb diyā, “ham mulk-e-kan'ān se anāj ḳharīdne ke lie āe haiṅ.”

⁸go yūsuf ne apne bhāiyoṅ ko pahchān liyā, lekin unhoṅ ne use na pahchānā.

⁹use wuh ḳhwāb yād āe jo us ne un ke bāre meṅ dekhe the. us ne kahā, “tum jāsūs ho. tum yih deḳhne āe ho ki hamārā mulk kin kin jaghoṅ par ġhairmahfūz hai.”

¹⁰unhoṅ ne kahā, “janāb, hargiz nahīṅ. āp ke ġhulām ġhallā ḳharīdne āe haiṅ.

¹¹ham sab ek hī mard ke beṭe haiṅ. āp ke ḳhādim sharīf log haiṅ, jāsūs nahīṅ haiṅ.”

¹²lekin yūsuf ne isrār kiyā, “nahīṅ, tum deḳhne āe ho ki hamārā mulk kin kin jaghoṅ par ġhairmahfūz hai.”

¹³unhoṅ ne arz kī, “āp ke ḳhādim kul bārah bhāī haiṅ. ham ek hī ādmī ke beṭe haiṅ jo kan'ān meṅ rahtā hai. sab se chhoṭā bhāī is waqt hamāre bāp ke pās hai jabki ek mar gayā hai.”

¹⁴lekin yūsuf ne apnā ilzām dohrāyā, “aisā hī hai jaisā maiṅ ne kahā hai ki tum jāsūs ho.

¹⁵maiṅ tumhārī bāteṅ jāṅch lūṅgā. fir'aun kī hayāt kī qasam, pahle tumhārā sab se chhoṭā bhāī āe, warnā tum is jagah se kabhī nahīṅ jā sakoge.

¹⁶ek bhāī ko use lāne ke lie bhej do. bāqī sab yahāṅ giriftār raheṅge. phir patā chalegā ki tumhārī bāteṅ sach haiṅ ki nahīṅ. agar nahīṅ to fir'aun kī hayāt kī qasam, is kā matlab yih hogā ki tum jāsūs ho.”

¹⁷yih kah kar yūsuf ne unheṅ tīn din ke lie qaidḳhāne meṅ ḍāl diyā.

¹⁸tīsre din us ne un se kahā, “maiṅ allāh kā ḳhauf māntā hūṅ, is lie tum ko ek shart par jītā chhoṛūṅgā.

¹⁹agar tum wāqaī sharīf log ho to aisā karo ki tum meṅ se ek yahāṅ qaidḳhāne meṅ rahe jabki bāqī sab anāj le kar apne bhūke ghar wāloṅ ke pās wāpas jāeṅ.

²⁰lekin lāzim hai ki tum apne sab se chhoṭe bhāī ko mere pās le āo. sirf is se tumhārī bāteṅ sach sābit hoṅgī aur tum maut se bach jāoge.” yūsuf ke bhāī rāzī ho gae.

²¹wuh āpas meṅ kahne lage, “beshak yih hamāre apne bhāī par zulm kī sazā hai. jab wuh iltijā kar rahā thā ki mujh par rahm kareṅ to ham ne us kī baṛī musībat dekh kar bhī us kī na sunī. is lie yih musībat ham par ā gaī hai.”

²²aur rūbin ne kahā, “kyā maiṅ ne nahīṅ kahā thā ki laṛke par zulm mat karo, lekin tum ne merī ek na mānī. ab us kī maut kā hisāb-kitāb kiyā jā rahā hai.”

²³unheṅ mālūm nahīṅ thā ki yūsuf hamārī bāteṅ samajh saktā hai, kyūṅki wuh mutarjim kī mārifat un se bāt kartā thā.

²⁴yih bāteṅ sun kar wuh unheṅ chhoṛ kar rone lagā. phir wuh saṅbhal kar wāpas āyā. us ne shamāūn ko chun kar use un ke sāmne hī bāndh liyā.

²⁵yūsuf ne hukm diyā ki mulāzim un kī boriyāṅ anāj se bhar kar har ek bhāī ke paise us kī borī meṅ wāpas rakh deṅ aur unheṅ safar ke lie khānā bhī deṅ. unhoṅ ne aisā hī kiyā.

²⁶phir yūsuf ke bhāī apne gadhoṅ par anāj lād kar rawānā ho gae.

²⁷jab wuh rāt ke lie kisī jagah par ṭhahre to ek bhāī ne apne gadhe ke lie chārā nikālne kī ġharz se apnī borī kholī to dekhā ki borī ke muṅh meṅ us ke paise paṛe haiṅ.

²⁸us ne apne bhāiyoṅ se kahā, “mere paise wāpas kar die gae haiṅ! wuh merī borī meṅ haiṅ.” yih dekh kar un ke hosh uṛ gae. kāṅpte hue wuh ek dūsre ko deḳhne aur kahne lage, “yih kyā hai jo allāh ne hamāre sāth kiyā hai?”

²⁹mulk-e-kan'ān meṅ apne bāp ke pās pahuṅch kar unhoṅ ne use sab kuchh sunāyā jo un ke sāth huā thā. unhoṅ ne kahā,

³⁰“us mulk ke mālik ne baṛī saḳhtī se hamāre sāth bāt kī. us ne hameṅ jāsūs qarār diyā.

³¹lekin ham ne us se kahā, ‘ham jāsūs nahīṅ balki sharīf log haiṅ.

³²ham bārah bhāī haiṅ, ek hī bāp ke beṭe. ek to mar gayā jabki sab se chhoṭā bhāī is waqt kan'ān meṅ bāp ke pās hai.’

³³phir us mulk ke mālik ne ham se kahā, ‘is se mujhe patā chalegā ki tum sharīf log ho ki ek bhāī ko mere pās chhoṛ do aur apne bhūke ghar wāloṅ ke lie ḳhurāk le kar chale jāo.

³⁴lekin apne sab se chhoṭe bhāī ko mere pās le āo tāki mujhe mālūm ho jāe ki tum jāsūs nahīṅ balki sharīf log ho. phir maiṅ tum ko tumhārā bhāī wāpas kar dūṅgā aur tum is mulk meṅ āzādī se tijārat kar sakoge’.”

³⁵unhoṅ ne apnī boriyoṅ se anāj nikāl diyā to dekhā ki har ek kī borī meṅ us ke paisoṅ kī thailī rakhī huī hai. yih paise dekh kar wuh ḳhud aur un kā bāp ḍar gae.

³⁶un ke bāp ne un se kahā, “tum ne mujhe mere bachchoṅ se mahrūm kar diyā hai. yūsuf nahīṅ rahā, shamāūn bhī nahīṅ rahā aur ab tum binyamīn ko bhī mujh se chhīnanā chāhte ho. sab kuchh mere ḳhilāf hai.”

³⁷phir rūbin bol uṭhā, “agar maiṅ use salāmatī se āp ke pās wāpas na pahuṅchāūṅ to āp mere do beṭoṅ ko sazā-e-maut de sakte haiṅ. use mere sapurd kareṅ to maiṅ use wāpas le āūṅgā.”

³⁸lekin yāqūb ne kahā, “merā beṭā tumhāre sāth jāne kā nahīṅ. kyūṅki us kā bhāī mar gayā hai aur wuh akelā hī rah gayā hai. agar us ko rāste meṅ jānī nuqsān pahuṅche to tum mujh būṛhe ko ġham ke māre pātāl meṅ pahuṅchāoge.”