Read Roman Urdu Geo paidāish 44 Bible Online

paidāish 44 - Roman Urdu Geo bible

paidāish 44

¹yūsuf ne ghar par muqarrar mulāzim ko hukm diyā, “un mardoṅ kī boriyāṅ ḳhurāk se itnī bhar denā jitnī wuh uṭhā kar le jā sakeṅ. har ek ke paise us kī apnī borī ke muṅh meṅ rakh denā.

²sab se chhoṭe bhāī kī borī meṅ na sirf paise balki mere chāṅdī ke pyāle ko bhī rakh denā.” mulāzim ne aisā hī kiyā.

³aglī subh jab pau phaṭne lagī to bhāiyoṅ ko un ke gadhoṅ samet ruḳhsat kar diyā gayā.

⁴wuh abhī shahr se nikal kar dūr nahīṅ gae the ki yūsuf ne apne ghar par muqarrar mulāzim se kahā, “jaldī karo. un ādmiyoṅ kā tāqqub karo. un ke pās pahuṅch kar yih pūchhnā, ‘āp ne hamārī bhalāī ke jawāb meṅ ġhalat kām kyūṅ kiyā hai?

⁵āp ne mere mālik kā chāṅdī kā pyālā kyūṅ churāyā hai? us se wuh na sirf pīte haiṅ balki use ġhaibdānī ke lie bhī istemāl karte haiṅ. āp ek nihāyat sangīn jurm ke murtakib hue haiṅ’.”

⁶jab mulāzim bhāiyoṅ ke pās pahuṅchā to us ne un se yihī bāteṅ kīṅ.

⁷jawāb meṅ unhoṅ ne kahā, “hamāre mālik aisī bāteṅ kyūṅ karte haiṅ? kabhī nahīṅ ho saktā ki āp ke ḳhādim aisā kareṅ.

⁸āp to jānte haiṅ ki ham mulk-e-kan'ān se wuh paise wāpas le āe jo hamārī boriyoṅ meṅ the. to phir ham kyūṅ āp ke mālik ke ghar se chāṅdī yā sonā churāeṅge?

⁹agar wuh āp ke ḳhādimoṅ meṅ se kisī ke pās mil jāe to use mār ḍālā jāe aur bāqī sab āp ke ġhulām baneṅ.”

¹⁰mulāzim ne kahā, “ṭhīk hai aisā hī hogā. lekin sirf wuhī merā ġhulām banegā jis ne pyālā churāyā hai. bāqī sab āzād haiṅ.”

¹¹unhoṅ ne jaldī se apnī boriyāṅ utār kar zamīn par rakh dīṅ. har ek ne apnī borī khol dī.

¹²mulāzim boriyoṅ kī talāshī lene lagā. wuh baṛe bhāī se shurū karke āḳhirkār sab se chhoṭe bhāī tak pahuṅch gayā. aur wahāṅ binyamīn kī borī meṅ se pyālā niklā.

¹³bhāiyoṅ ne yih dekh kar pareshānī meṅ apne libās phāṛ lie. wuh apne gadhoṅ ko dubārā lād kar shahr wāpas ā gae.

¹⁴jab yahūdāh aur us ke bhāī yūsuf ke ghar pahuṅche to wuh abhī wahīṅ thā. wuh us ke sāmne muṅh ke bal gir gae.

¹⁵yūsuf ne kahā, “yih tum ne kyā kiyā hai? kyā tum nahīṅ jānte ki mujh jaisā ādmī ġhaib kā ilm rakhtā hai?”

¹⁶yahūdāh ne kahā, “janāb-e-ālī, ham kyā kaheṅ? ab ham apne difā meṅ kyā kaheṅ? allāh hī ne hameṅ qusūrwār ṭhahrāyā hai. ab ham sab āp ke ġhulām haiṅ, na sirf wuh jis ke pās se pyālā mil gayā.”

¹⁷yūsuf ne kahā, “allāh na kare ki maiṅ aisā karūṅ, balki sirf wuhī merā ġhulām hogā jis ke pās pyālā thā. bāqī sab salāmatī se apne bāp ke pās wāpas chale jāeṅ.”

¹⁸lekin yahūdāh ne yūsuf ke qarīb ā kar kahā, “mere mālik, mehrbānī karke apne bande ko ek bāt karne kī ijāzat deṅ. mujh par ġhussā na kareṅ agarche āp misr ke bādshāh jaise haiṅ.

¹⁹janāb-e-ālī, āp ne ham se pūchhā, ‘kyā tumhārā bāp yā koī aur bhāī hai?’

²⁰ham ne jawāb diyā, ‘hamārā bāp hai. wuh būṛhā hai. hamārā ek chhoṭā bhāī bhī hai jo us waqt paidā huā jab hamārā bāp umrrasīdā thā. us laṛke kā bhāī mar chukā hai. us kī māṅ ke sirf yih do beṭe paidā hue. ab wuh akelā hī rah gayā hai. us kā bāp use shiddat se pyār kartā hai.’

²¹janāb-e-ālī, āp ne hameṅ batāyā, ‘use yahāṅ le āo tāki maiṅ ḳhud use dekh sakūṅ.’

²²ham ne jawāb diyā, ‘yih laṛkā apne bāp ko chhoṛ nahīṅ saktā, warnā us kā bāp mar jāegā.’

²³phir āp ne kahā, ‘tum sirf is sūrat meṅ mere pās ā sakoge ki tumhārā sab se chhoṭā bhāī tumhāre sāth ho.’

²⁴jab ham apne bāp ke pās wāpas pahuṅche to ham ne unheṅ sab kuchh batāyā jo āp ne kahā thā.

²⁵phir unhoṅ ne ham se kahā, ‘misr lauṭ kar kuchh ġhallā ḳharīd lāo.’

²⁶ham ne jawāb diyā, ‘ham jā nahīṅ sakte. ham sirf is sūrat meṅ us mard ke pās jā sakte haiṅ ki hamārā sab se chhoṭā bhāī sāth ho. ham tab hī jā sakte haiṅ jab wuh bhī hamāre sāth chale.’

²⁷hamāre bāp ne ham se kahā, ‘tum jānte ho ki merī bīwī rāḳhil se mere do beṭe paidā hue.

²⁸pahlā mujhe chhoṛ chukā hai. kisī janglī jānwar ne use phāṛ khāyā hogā, kyūṅki usī waqt se maiṅ ne use nahīṅ dekhā.

²⁹agar is ko bhī mujh se le jāne kī wajah se jānī nuqsān pahuṅche to tum mujh būṛhe ko ġham ke māre pātāl meṅ pahuṅchāoge’.”

³⁰yahūdāh ne apnī bāt jārī rakhī, “janāb-e-ālī, ab agar maiṅ apne bāp ke pās jāūṅ aur wuh dekheṅ ki laṛkā mere sāth nahīṅ hai to wuh dam toṛ deṅge. un kī zindagī is qadar laṛke kī zindagī par munhasir hai aur wuh itne būṛhe haiṅ ki ham aisī harkat se unheṅ qabr tak pahuṅchā deṅge.

³²na sirf yih balki maiṅ ne bāp se kahā, ‘maiṅ ḳhud is kā zāmin hūṅgā. agar maiṅ ise salāmatī se wāpas na pahuṅchāūṅ to phir maiṅ zindagī ke āḳhir tak qusūrwār ṭhahrūṅga.’

³³ab apne ḳhādim kī guzārish suneṅ. maiṅ yahāṅ rah kar is laṛke kī jagah ġhulām ban jātā hūṅ, aur wuh dūsre bhāiyoṅ ke sāth wāpas chalā jāe

³⁴agar laṛkā mere sāth na huā to maiṅ kis tarah apne bāp ko muṅh dikhā saktā hūṅ? maiṅ bardāsht nahīṅ kar sakūṅgā ki wuh is musībat meṅ mubtalā ho jāeṅ.”