Read Roman Urdu Geo paidāish 46 Bible Online

paidāish 46 - Roman Urdu Geo bible

paidāish 46

¹yāqūb sab kuchh le kar rawānā huā aur bair-sabā pahuṅchā. wahāṅ us ne apne bāp is'hāq ke ḳhudā ke huzūr qurbāniyāṅ chaṛhāīṅ.

²rāt ko allāh royā meṅ us se hamkalām huā. us ne kahā, “yāqūb, yāqūb!” yāqūb ne jawāb diyā, “jī, maiṅ hāzir hūṅ.”

³allāh ne kahā, “maiṅ allāh hūṅ, tere bāp is'hāq kā ḳhudā. misr jāne se mat ḍar, kyūṅki wahāṅ maiṅ tujh se ek baṛī qaum banāūṅgā.

⁴maiṅ tere sāth misr jāūṅgā aur tujhe is mulk meṅ wāpas bhī le āūṅgā. jab tū maregā to yūsuf ḳhud terī āṅkheṅ band karegā.”

⁵is ke bād yāqūb bair-sabā se rawānā huā. us ke beṭoṅ ne use aur apne bāl-bachchoṅ ko un gāṛiyoṅ meṅ biṭhā diyā jo misr ke bādshāh ne bhijwāī thīṅ.

⁶yūṅ yāqūb aur us kī tamām aulād apne maweshī aur kan'ān meṅ hāsil kiyā huā māl le kar misr chale gae.

⁷yāqūb ke beṭe-beṭiyāṅ, pote-potiyāṅ aur bāqī aulād sab sāth gae.

⁸isrāīl kī aulād ke nām jo misr chalī gaī yih haiṅ: yāqūb ke pahlauṭhe rūbin

⁹ke beṭe hanūk, fallū, hasron aur karmī the.

¹⁰shamāūn ke beṭe āshrūel, yamīn, uhad, yakīn, suhar aur sāūl the (sāūl kan'ānī aurat kā bachchā thā).

¹¹lāwī ke beṭe jairson, qihāt aur mirārī the.

¹²yahūdāh ke beṭe er, onān, selā, fāras aur zārah the (er aur onān kan'ān meṅ mar chuke the). fāras ke do beṭe hasron aur hamūl the.

¹³ishkār ke beṭe tolā, fuwwā, yob aur simron the.

¹⁴zabūlūn ke beṭe sard, ailon aur yahlī'el the.

¹⁵in beṭoṅ kī māṅ liyāh thī, aur wuh masoputāmiyā meṅ paidā hue. in ke ilāwā dīnā us kī beṭī thī. kul 33 mard liyāh kī aulād the.

¹⁶jad ke beṭe sifyān, hajjī, sūnī, isbūn, erī, arūdī aur arelī the.

¹⁷āshar ke beṭe yimnā, iswāh, iswī aur barīā the. āshar kī beṭī sirah thī, aur barīā ke do beṭe the, hibar aur malkī'el.

¹⁸kul 16 afrād zilfā kī aulād the jise lāban ne apnī beṭī liyāh ko diyā thā.

¹⁹rāḳhil ke beṭe yūsuf aur binyamīn the.

²⁰yūsuf ke do beṭe manassī aur ifrāīm misr meṅ paidā hue. un kī māṅ on ke pujārī fotīfirā kī beṭī āsanat thī.

²¹binyamīn ke beṭe bālā, bakar, ashbel, jīrā, nāmān, iḳhī, ros, muffīm, huffīm aur ard the.

²²kul 14 mard rāḳhil kī aulād the.

²³dān kā beṭā hushīm thā.

²⁴naftālī ke beṭe yahsī'el, jūnī, yisar aur sillīm the.

²⁵kul 7 mard bilhāh kī aulād the jise lāban ne apnī beṭī rāḳhil ko diyā thā.

²⁶yāqūb kī aulād ke 66 afrād us ke sāth misr chale gae. is tādād meṅ beṭoṅ kī bīwiyāṅ shāmil nahīṅ thīṅ.

²⁷jab ham yāqūb, yūsuf aur us ke do beṭe in meṅ shāmil karte haiṅ to yāqūb ke gharāne ke 70 afrād misr gae.

²⁸yāqūb ne yahūdāh ko apne āge yūsuf ke pās bhejā tāki wuh jushan meṅ un se mile. jab wuh wahāṅ pahuṅche

²⁹to yūsuf apne rath par sawār ho kar apne bāp se milne ke lie jushan gayā. use dekh kar wuh us ke gale lag kar kāfī der rotā rahā.

³⁰yāqūb ne yūsuf se kahā, “ab maiṅ marne ke lie tayyār hūṅ, kyūṅki maiṅ ne ḳhud dekhā hai ki tū zindā hai.”

³¹phir yūsuf ne apne bhāiyoṅ aur apne bāp ke ḳhāndān ke bāqī afrād se kahā, “zarūrī hai ki maiṅ jā kar bādshāh ko ittilā dūṅ ki mere bhāī aur mere bāp kā pūrā ḳhāndān jo kan'ān ke rahne wāle haiṅ mere pās ā gae haiṅ.

³²maiṅ us se kahūṅgā, ‘yih ādmī bheṛ-bakriyoṅ ke charwāhe haiṅ. wuh maweshī pālte haiṅ, is lie apnī bheṛ-bakriyāṅ, gāy-bail aur bāqī sārā māl apne sāth le āe haiṅ.’

³³bādshāh tumheṅ bulā kar pūchhegā ki tum kyā kām karte ho?

³⁴phir tum ko jawāb denā hai, ‘āp ke ḳhādim bachpan se maweshī pālte āe haiṅ. yih hamāre bāpdādā kā peshā thā aur hamārā bhī hai.’ agar tum yih kaho to tumheṅ jushan meṅ rahne kī ijāzat milegī. kyūṅki bheṛ-bakriyoṅ ke charwāhe misriyoṅ kī nazar meṅ qābil-e-nafrat haiṅ.”