Read Roman Urdu Geo paidāish 47 Bible Online

paidāish 47 - Roman Urdu Geo bible

paidāish 47

¹yūsuf fir'aun ke pās gayā aur use ittilā de kar kahā, “merā bāp aur bhāī apnī bheṛ-bakriyoṅ, gāy-bailoṅ aur sāre māl samet mulk-e-kan'ān se ā kar jushan meṅ ṭhahre hue haiṅ.”

²us ne apne bhāiyoṅ meṅ se pāṅch ko chun kar fir'aun ke sāmne pesh kiyā.

³fir'aun ne bhāiyoṅ se pūchhā, “tum kyā kām karte ho?” unhoṅ ne jawāb diyā, “āp ke ḳhādim bheṛ-bakriyoṅ ke charwāhe haiṅ. yih hamāre bāpdādā kā peshā thā aur hamārā bhī hai.

⁴ham yahāṅ āe haiṅ tāki kuchh der ajnabī kī haisiyat se āp ke pās ṭhahreṅ, kyūṅki kāl ne kan'ān meṅ bahut zor pakaṛā hai. wahāṅ āp ke ḳhādimoṅ ke jānwaroṅ ke lie charāgāheṅ ḳhatm ho gaī haiṅ. is lie hameṅ jushan meṅ rahne kī ijāzat deṅ.”

⁵bādshāh ne yūsuf se kahā, “terā bāp aur bhāī tere pās ā gae haiṅ.

⁶mulk-e-misr tere sāmne khulā hai. unheṅ behtarīn jagah par ābād kar. wuh jushan meṅ raheṅ. aur agar un meṅ se kuchh haiṅ jo ḳhās qābiliyat rakhte haiṅ to unheṅ mere maweshiyoṅ kī nigahdāsht par rakh.”

⁷phir yūsuf apne bāp yāqūb ko le āyā aur fir'aun ke sāmne pesh kiyā. yāqūb ne bādshāh ko barkat dī.

⁸bādshāh ne us se pūchhā, “tumhārī umr kyā hai?”

⁹yāqūb ne jawāb diyā, “maiṅ 130 sāl se is duniyā kā mehmān hūṅ. merī zindagī muḳhtasar aur taqlīfdih thī, aur mere bāpdādā mujh se zyādā umrrasīdā hue the jab wuh is duniyā ke mehmān the.”

¹⁰yih kah kar yāqūb fir'aun ko dubārā barkat de kar chalā gayā.

¹¹phir yūsuf ne apne bāp aur bhāiyoṅ ko misr meṅ ābād kiyā. us ne unheṅ rāmsīs ke ilāqe meṅ behtarīn zamīn dī jis tarah bādshāh ne hukm diyā thā.

¹²yūsuf apne bāp ke pūre gharāne ko ḳhurāk muhayyā kartā rahā. har ḳhāndān ko us ke bachchoṅ kī tādād ke mutābiq ḳhurāk miltī rahī.

¹³kāl itnā saḳht thā ki kahīṅ bhī roṭī nahīṅ miltī thī. misr aur kan'ān meṅ log niḍhāl ho gae.

¹⁴misr aur kan'ān ke tamām paise anāj ḳharīdne ke lie sarf ho gae. yūsuf unheṅ jamā karke fir'aun ke mahal meṅ le āyā.

¹⁵jab misr aur kan'ān ke paise ḳhatm ho gae to misriyoṅ ne yūsuf ke pās ā kar kahā, “hameṅ roṭī deṅ! ham āp ke sāmne kyūṅ mareṅ? hamāre paise ḳhatm ho gae haiṅ.”

¹⁶yūsuf ne jawāb diyā, “agar āp ke paise ḳhatm haiṅ to mujhe apne maweshī deṅ. maiṅ un ke iwaz roṭī detā hūṅ.”

¹⁷chunāṅche wuh apne ghoṛe, bheṛ-bakriyāṅ, gāy-bail aur gadhe yūsuf ke pās le āe. in ke iwaz us ne unheṅ ḳhurāk dī. us sāl us ne unheṅ un ke tamām maweshiyoṅ ke iwaz ḳhurāk muhayyā kī.

¹⁸agle sāl wuh dubārā us ke pās āe. unhoṅ ne kahā, “janāb-e-ālī, ham yih bāt āp se nahīṅ chhupā sakte ki ab ham sirf apne āp aur apnī zamīn ko āp ko de sakte haiṅ. hamāre paise to ḳhatm haiṅ aur āp hamāre maweshī bhī le chuke haiṅ.

¹⁹ham kyūṅ āp kī āṅkhoṅ ke sāmne mar jāeṅ? hamārī zamīn kyūṅ tabāh ho jāe? hameṅ roṭī deṅ to ham aur hamārī zamīn bādshāh kī hogī. ham fir'aun ke ġhulām hoṅge. hameṅ bīj deṅ tāki ham jīte bacheṅ aur zamīn tabāh na ho jāe.”

²⁰chunāṅche yūsuf ne fir'aun ke lie misr kī pūrī zamīn ḳharīd lī. kāl kī saḳhtī ke sabab se tamām misriyoṅ ne apne khet bech die. is tarīqe se pūrā mulk fir'aun kī milkiyat meṅ ā gayā.

²¹yūsuf ne misr ke ek sire se dūsre sire tak ke logoṅ ko shahroṅ meṅ muntaqil kar diyā.

²²sirf pujāriyoṅ kī zamīn āzād rahī. unheṅ apnī zamīn bechne kī zarūrat hī nahīṅ thī, kyūṅki unheṅ fir'aun se itnā wazīfā miltā thā ki guzārā ho jātā thā.

²³yūsuf ne logoṅ se kahā, “ġhaur se suneṅ. āj maiṅ ne āp ko aur āp kī zamīn ko bādshāh ke lie ḳharīd liyā hai. ab yih bīj le kar apne khetoṅ meṅ bonā.

²⁴āp ko fir'aun ko fasal kā pāṅchwāṅ hissā denā hai. bāqī paidāwār āp kī hogī. āp is se bīj bo sakte haiṅ, aur yih āp ke aur āp ke gharānoṅ aur bachchoṅ ke khāne ke lie hogā.”

²⁵unhoṅ ne jawāb diyā, “āp ne hameṅ bachāyā hai. hamāre mālik ham par mehrbānī kareṅ to ham fir'aun ke ġhulām baneṅge.”

²⁶is tarah yūsuf ne misr meṅ yih qānūn nāfiz kiyā ki har fasal kā pāṅchwāṅ hissā bādshāh kā hai. yih qānūn āj tak jārī hai. sirf pujāriyoṅ kī zamīn bādshāh kī milkiyat meṅ na āī.

²⁷isrāīlī misr meṅ jushan ke ilāqe meṅ ābād hue. wahāṅ unheṅ zamīn milī, aur wuh phale phūle aur tādād meṅ bahut baṛh gae.

²⁸yāqūb 17 sāl misr meṅ rahā. wuh 147 sāl kā thā jab faut huā.

²⁹jab marne kā waqt qarīb āyā to us ne yūsuf ko bulā kar kahā, “mehrbānī karke apnā hāth merī rān ke nīche rakh kar qasam khā ki tū mujh par shafqat aur wafādārī kā is tarah izhār karegā ki mujhe misr meṅ dafn nahīṅ karegā.

³⁰jab maiṅ mar kar apne bāpdādā se jā milūṅgā to mujhe misr se le jā kar mere bāpdādā kī qabr meṅ dafnānā.” yūsuf ne jawāb diyā, “ṭhīk hai.”

³¹yāqūb ne kahā, “qasam khā ki tū aisā hī karegā.” yūsuf ne qasam khāī. tab isrāīl ne apne bistar ke sirhāne par allāh ko sijdā kiyā.