Read Roman Urdu Geo paidāish 6 Bible Online

paidāish 6 - Roman Urdu Geo bible

paidāish 6

¹duniyā meṅ logoṅ kī tādād baṛhne lagī. un ke hāṅ beṭiyāṅ paidā huīṅ.

²tab āsmānī hastiyoṅ ne dekhā ki banī nau insān kī beṭiyāṅ ḳhūbsūrat haiṅ, aur unhoṅ ne un meṅ se kuchh chun kar un se shādī kī.

³phir rab ne kahā, “merī rūh hameshā ke lie insān meṅ na rahe kyūṅki wuh fānī maḳhlūq hai. ab se wuh 120 sāl se zyādā zindā nahīṅ rahegā.”

⁴un dinoṅ meṅ aur bād meṅ bhī duniyā meṅ deoqāma tafrād the jo insānī auratoṅ aur un āsmānī hastiyoṅ kī shādiyoṅ se paidā hue the. yih deoqāma tafrād qadīm zamāne ke mashhūr sūrmā the.

⁵rab ne dekhā ki insān nihāyat bigaṛ gayā hai, ki us ke tamām ḳhayālāt lagātār burāī kī taraf māil rahte haiṅ.

⁶wuh pachhtāyā ki maiṅ ne insān ko banā kar duniyā meṅ rakh diyā hai, aur use saḳht dukh huā.

⁷us ne kahā, “go maiṅ hī ne insān ko ḳhalaq kiyā maiṅ use rū-e-zamīn par se miṭā ḍālūṅgā. maiṅ na sirf logoṅ ko balki zamīn par chalne phirne aur reṅgne wāle jānwaroṅ aur hawā ke parindoṅ ko bhī halāk kar dūṅgā, kyūṅki maiṅ pachhtātā hūṅ ki maiṅ ne un ko banāyā.”

⁸sirf nūh par rab kī nazar-e-karm thī.

⁹yih us kī zindagī kā bayān hai. nūh rāstbāz thā. us zamāne ke logoṅ meṅ sirf wuhī bequsūr thā. wuh allāh ke sāth sāth chaltā thā.

¹⁰nūh ke tīn beṭe the, sim, hām aur yāfat.

¹¹lekin duniyā allāh kī nazar meṅ bigaṛī huī aur zulm-o-tashaddud se bharī huī thī.

¹²jahāṅ bhī allāh deḳhtā duniyā ḳharāb thī, kyūṅki tamām jāndāroṅ ne zamīn par apnī rawish ko bigāṛ diyā thā.

¹³tab allāh ne nūh se kahā, “maiṅ ne tamām jāndāroṅ ko ḳhatm karne kā faislā kiyā hai, kyūṅki un ke sabab se pūrī duniyā zulm-o-tashaddud se bhar gaī hai. chunāṅche maiṅ un ko zamīn samet tabāh kar dūṅgā.

¹⁴ab apne lie sarw [3] kī lakaṛī kī kashtī banā le. us meṅ kamre hoṅ aur use andar aur bāhar tārkol lagā.

¹⁵us kī lambāī 450 fuṭ, chauṛāī 75 fuṭ aur ūṅchāī 45 fuṭ ho.

¹⁶kashtī kī chhat ko yūṅ banānā ki us ke nīche 18 inch khulā rahe. ek taraf darwāzā ho, aur us kī tīn manzileṅ hoṅ.

¹⁷maiṅ pānī kā itnā baṛā sailāb lāūṅgā ki wuh zamīn ke tamām jāndāroṅ ko halāk kar ḍālegā. zamīn par sab kuchh fanā ho jāegā.

¹⁸lekin tere sāth maiṅ ahd bāndhūṅgā jis ke taht tū apne beṭoṅ, apnī bīwī aur bahū'oṅ ke sāth kashtī meṅ jāegā.

¹⁹har qism ke jānwar kā ek nar aur ek mādā bhī apne sāth kashtī meṅ le jānā tāki wuh tere sāth jīte bacheṅ.

²⁰har qism ke par rakhne wāle jānwar aur har qism ke zamīn par phirne yā reṅgne wāle jānwar do do ho kar tere pās āeṅge tāki jīte bach jāeṅ.

²¹jo bhī ḳhurāk darkār hai use apne aur un ke lie jamā karke kashtī meṅ mahfūz kar lenā.”

²²nūh ne sab kuchh waisā hī kiyā jaisā allāh ne use batāyā.