Read Roman Urdu Geo paidāish 8 Bible Online

paidāish 8 - Roman Urdu Geo bible

paidāish 8

¹lekin allāh ko nūh aur tamām jānwar yād rahe jo kashtī meṅ the. us ne hawā chalā dī jis se pānī kam hone lagā.

²zamīn ke chashme aur āsmān par ke pānī ke darīche band ho gae. aur bārish ruk gaī.

³pānī ghaṭtā gayā. 150 din ke bād wuh kāfī kam ho gayā thā.

⁴sātweṅ mahīne ke 17weṅ din kashtī arārāt ke ek pahāṛ par ṭik gaī.

⁵dasweṅ mahīne ke pahle din pānī itnā kam ho gayā thā ki pahāṛoṅ kī choṭiyāṅ nazar āne lagī thīṅ.

⁶chālīs din ke bād nūh ne kashtī kī khiṛkī khol kar ek kawwā chhoṛ diyā, aur wuh uṛ kar chalā gayā. lekin jab tak zamīn par pānī thā wuh ātā jātā rahā.

⁸phir nūh ne ek kabūtar chhoṛ diyā tāki patā chale ki zamīn pānī se nikal āī hai yā nahīṅ.

⁹lekin kabūtar ko kahīṅ bhī baiṭhne kī jagah na milī, kyūṅki ab tak pūrī zamīn par pānī hī pānī thā. wuh kashtī aur nūh ke pās wāpas ā gayā, aur nūh ne apnā hāth baṛhāyā aur kabūtar ko pakaṛ kar apne pās kashtī meṅ rakh liyā.

¹⁰us ne ek haftā aur intizār karke kabūtar ko dubārā chhoṛ diyā.

¹¹shām ke waqt wuh lauṭ āyā. is dafā us kī choṅch meṅ zaitūn kā tāzā pattā thā. tab nūh ko mālūm huā ki zamīn pānī se nikal āī hai.

¹²us ne mazīd ek hafte ke bād kabūtar ko chhoṛ diyā. is dafā wuh wāpas na āyā.

¹³jab nūh 601 sāl kā thā to pahle mahīne ke pahle din zamīn kī satah par pānī ḳhatm ho gayā. tab nūh ne kashtī kī chhat khol dī aur dekhā ki zamīn kī satah par pānī nahīṅ hai.

¹⁴dūsre mahīne ke 27weṅ din zamīn bilkul ḳhushk ho gaī.

¹⁵phir allāh ne nūh se kahā,

¹⁶“apnī bīwī, beṭoṅ aur bahū'oṅ ke sāth kashtī se nikal ā.

¹⁷jitne bhī jānwar sāth haiṅ unheṅ nikāl de, ḳhwāh parinde hoṅ, ḳhwāh zamīn par phirne yā reṅgne wāle jānwar. wuh duniyā meṅ phail jāeṅ, nasl baṛhāeṅ aur tādād meṅ baṛhte jāeṅ.”

¹⁸chunāṅche nūh apne beṭoṅ, apnī bīwī aur bahū'oṅ samet nikal āyā.

¹⁹tamām jānwar aur parinde bhī apnī apnī qism ke gurohoṅ meṅ kashtī se nikle.

²⁰us waqt nūh ne rab ke lie qurbāngāh banāī. us ne tamām phirne aur uṛne wāle pāk jānwaroṅ meṅ se kuchh chun kar unheṅ zabah kiyā aur qurbāngāh par pūrī tarah jalā diyā.

²¹yih qurbāniyāṅ dekh kar rab ḳhush huā aur apne dil meṅ kahā, “ab se maiṅ kabhī zamīn par insān kī wajah se lānat nahīṅ bhejūṅgā, kyūṅki us kā dil bachpan hī se burāī kī taraf māil hai. ab se maiṅ kabhī is tarah tamām jān rakhne wālī maḳhlūqāt ko rū-e-zamīn par se nahīṅ miṭāūṅgā.

²²duniyā ke muqarrarā auqāt jārī raheṅge. bīj bone aur fasal kāṭne kā waqt, ṭhanḍ aur tapish, garmiyoṅ aur sardiyoṅ kā mausam, din aur rāt, yih sab kuchh duniyā ke aḳhīr tak qāim rahegā.”