Read Roman Urdu Geo paidāish 9 Bible Online

paidāish 9 - Roman Urdu Geo bible

paidāish 9

¹phir allāh ne nūh aur us ke beṭoṅ ko barkat de kar kahā, “phalo phūlo aur tādād meṅ baṛhte jāo. duniyā tum se bhar jāe

²zamīn par phirne aur reṅgne wāle jānwar, parinde aur machhliyāṅ sab tum se ḍareṅge. unheṅ tumhāre iḳhtiyār meṅ kar diyā gayā hai.

³jis tarah maiṅ ne tumhāre khāne ke lie paudoṅ kī paidāwār muqarrar kī hai usī tarah ab se tumheṅ har qism ke jānwar khāne kī ijāzat bhī hai.

⁴lekin ḳhabardār! aisā gosht na khānā jis meṅ ḳhūn hai, kyūṅki ḳhūn meṅ us kī jān hai.

⁵kisī kī jān lenā manā hai. jo aisā karegā use apnī jān denī paṛegī, ḳhwāh wuh insān ho yā haiwān. maiṅ ḳhud is kā mutālabā karūṅga.

⁶jo bhī kisī kā ḳhūn bahāe us kā ḳhūn bhī bahāyā jāegā. kyūṅki allāh ne insān ko apnī sūrat par banāyā hai.

⁷ab phalo phūlo aur tādād meṅ baṛhte jāo. duniyā meṅ phail jāo.”

⁸tab allāh ne nūh aur us ke beṭoṅ se kahā,

⁹“ab maiṅ tumhāre aur tumhārī aulād ke sāth ahd qāim kartā hūṅ.

¹⁰yih ahd un tamām jānwaroṅ ke sāth bhī hogā jo kashtī meṅ se nikle haiṅ yānī parindoṅ, maweshiyoṅ aur zamīn par ke tamām jānwaroṅ ke sāth.

¹¹maiṅ tumhāre sāth ahd bāndh kar wādā kartā hūṅ ki ab se aisā kabhī nahīṅ hogā ki zamīn kī tamām zindagī sailāb se ḳhatm kar dī jāegī. ab se aisā sailāb kabhī nahīṅ āegā jo pūrī zamīn ko tabāh kar de.

¹²is abadī ahd kā nishān jo maiṅ tumhāre aur tamām jāndāroṅ ke sāth qāim kar rahā hūṅ yih hai ki

¹³maiṅ apnī kamān bādaloṅ meṅ rakhtā hūṅ. wuh mere duniyā ke sāth ahd kā nishān hogā.

¹⁴jab kabhī mere kahne par āsmān par bādal chhā jāeṅge aur qaus-e-quzah un meṅ se nazar āegī

¹⁵to maiṅ yih ahd yād karūṅga jo tumhāre aur tamām jāndāroṅ ke sāth kiyā gayā hai. ab kabhī bhī aisā sailāb nahīṅ āegā jo tamām zindagī ko halāk kar de.

¹⁶qaus-e-quzah nazar āegī to maiṅ use dekh kar us dāimī ahd ko yād karūṅga jo mere aur duniyā kī tamām jāndār maḳhlūqāt ke darmiyān hai.

¹⁷yih us ahd kā nishān hai jo maiṅ ne duniyā ke tamām jāndāroṅ ke sāth kiyā hai.”

¹⁸nūh ke jo beṭe us ke sāth kashtī se nikle sim, hām aur yāfat the. hām kan'ān kā bāp thā.

¹⁹duniyā bhar ke tamām log in tīnoṅ kī aulād haiṅ.

²⁰nūh kisān thā. shurū meṅ us ne angūr kā bāġh lagāyā.

²¹angūr se mai banā kar us ne itnī pī lī ki wuh nashe meṅ dhut apne ḍere meṅ nangā paṛā rahā.

²²kan'ān ke bāp hām ne use yūṅ paṛā huā dekhā to bāhar jā kar apne donoṅ bhāiyoṅ ko us ke bāre meṅ batāyā.

²³yih sun kar sim aur yāfat ne apne kandhoṅ par kapṛā rakhā. phir wuh ulṭe chalte hue ḍere meṅ dāḳhil hue aur kapṛā apne bāp par ḍāl diyā. un ke muṅh dūsrī taraf muṛe rahe tāki bāp kī barahnagī nazar na āe.

²⁴jab nūh hosh meṅ āyā to us ko patā chalā ki sab se chhoṭe beṭe ne kyā kiyā hai.

²⁵us ne kahā, “kan'ān par lānat! wuh apne bhāiyoṅ kā zalīltarīn ġhulām hogā.

²⁶mubārak ho rab jo sim kā ḳhudā hai. kan'ān sim kā ġhulām ho.

²⁷allāh kare ki yāfat kī hudūd baṛh jāeṅ. yāfat sim ke ḍeroṅ meṅ rahe aur kan'ān us kā ġhulām ho.”

²⁸sailāb ke bād nūh mazīd 350 sāl zindā rahā.

²⁹wuh 950 sāl kī umr meṅ faut huā.