Read Roman Urdu Geo 2-samūel 13 Bible Online

2-samūel 13 - Roman Urdu Geo bible

2-samūel 13

¹dāūd ke beṭe abīsalūm kī ḳhūbsūrat bahan thī jis kā nām tamr thā. us kā sautelā bhāī amnon tamr se shadīd muhabbat karne lagā.

²wuh tamr ko itnī shiddat se chāhne lagā ki ranjish ke bāis bīmār ho gayā, kyūṅki tamr kuṅwārī thī, aur amnon ko us ke qarīb āne kā koī rāstā nazar na āyā.

³amnon kā ek dost thā jis kā nām yūnadab thā. wuh dāūd ke bhāī sim'ā kā beṭā thā aur baṛā zahīn thā.

⁴us ne amnon se pūchhā, “bādshāh ke beṭe, kyā maslā hai? roz-ba-roz āp zyādā bujhe hue nazar ā rahe haiṅ. kyā āp mujhe nahīṅ batāeṅge ki bāt kyā hai?” amnon bolā, “maiṅ abīsalūm kī bahan tamr se shadīd muhabbat kartā hūṅ.”

⁵yūnadab ne apne dost ko mashwarā diyā, “bistar par leṭ jāeṅ aur aisā zāhir kareṅ goyā bīmār haiṅ. jab āp ke wālid āp kā hāl pūchhne āeṅge to un se darḳhwāst karnā, ‘merī bahan tamr ā kar mujhe marīzoṅ kā khānā khilāe. wuh mere sāmne khānā tayyār kare tāki maiṅ use dekh kar us ke hāth se khānā khāūṅ’.”

⁶chunāṅche amnon ne bistar par leṭ kar bīmār hone kā bahānā kiyā. jab bādshāh us kā hāl pūchhne āyā to amnon ne guzārish kī, “merī bahan tamr mere pās āe aur mere sāmne marīzoṅ kā khānā banā kar mujhe apne hāth se khilāe.”

⁷dāūd ne tamr ko ittilā dī, “āp kā bhāī amnon bīmār hai. us ke pās jā kar us ke lie marīzoṅ kā khānā tayyār kareṅ.”

⁸tamr ne amnon ke pās ā kar us kī maujūdagī meṅ maidā gūṅdhā aur khānā tayyār karke pakāyā. amnon bistar par leṭā use deḳhtā rahā.

⁹jab khānā pak gayā to tamr ne use amnon ke pās lā kar pesh kiyā. lekin us ne khāne se inkār kar diyā. us ne hukm diyā, “tamām naukar kamre se bāhar nikal jāeṅ!” jab sab chale gae

¹⁰to us ne tamr se kahā, “khāne ko mere sone ke kamre meṅ le āeṅ tāki maiṅ āp ke hāth se khā sakūṅ.” tamr khāne ko le kar sone ke kamre meṅ apne bhāī ke pās āī.

¹¹jab wuh use khānā khilāne lagī to amnon ne use pakaṛ kar kahā, “ā merī bahan, mere sāth hambistar ho!”

¹²wuh pukārī, “nahīṅ, mere bhāī! merī ismatdarī na kareṅ. aisā amal isrāīl meṅ manā hai. aisī bedīn harkat mat karnā!

¹³aur aisī behurmatī ke bād maiṅ kahāṅ jāūṅ? jahāṅ tak āp kā tālluq hai isrāīl meṅ āp kī burī tarah badnāmī ho jāegī, aur sab samjheṅge ki āp nihāyat sharīr ādmī haiṅ. āp bādshāh se bāt kyūṅ nahīṅ karte? yaqīnan wuh āp ko mujh se shādī karne se nahīṅ rokeṅge.”

¹⁴lekin amnon ne us kī na sunī balki use pakaṛ kar us kī ismatdarī kī.

¹⁵lekin phir achānak us kī muhabbat saḳht nafrat meṅ badal gaī. pahle to wuh tamr se shadīd muhabbat kartā thā, lekin ab wuh is se baṛh kar us se nafrat karne lagā. us ne hukm diyā, “uṭh, dafā ho jā!”

¹⁶tamr ne iltimās kī, “hāy, aisā mat karnā. agar āp mujhe nikāleṅge to yih pahle gunāh se zyādā sangīn jurm hogā.” lekin amnon us kī sunane ke lie tayyār na thā.

¹⁷us ne apne naukar ko bulā kar hukm diyā, “is aurat ko yahāṅ se nikāl do aur is ke pīchhe darwāzā band karke kunḍī lagāo!”

¹⁸naukar tamr ko bāhar le gayā aur phir us ke pīchhe darwāzā band karke kunḍī lagā dī. tamr ek lambe bāzū'oṅ wālā frāk pahne hue thī. bādshāh kī tamām kuṅwārī beṭiyāṅ yihī libās pahnā kartī thīṅ.

¹⁹baṛī ranjish ke ālam meṅ us ne apnā yih libās phāṛ kar apne sar par rākh ḍāl lī. phir apnā hāth sar par rakh kar wuh chīḳhtī chillātī wahāṅ se chalī gaī.

²⁰jab ghar pahuṅch gaī to abīsalūm ne us se pūchhā, “merī bahan, kyā amnon ne āp se ziyādatī kī hai? ab ḳhāmosh ho jāeṅ. wuh to āp kā bhāī hai. is muāmale ko had se zyādā ahmiyat mat denā.” us waqt se tamr akelī hī apne bhāī abīsalūm ke ghar meṅ rahī.

²¹jab dāūd ko is wākie kī ḳhabar milī to use saḳht ġhussā āyā.

²²abīsalūm ne amnon se ek bhī bāt na kī. na us ne us par koī ilzām lagāyā, na koī achchhī bāt kī, kyūṅki tamr kī ismatdarī kī wajah se wuh apne bhāī se saḳht nafrat karne lagā thā.

²³do sāl guzar gae. abīsalūm kī bheṛeṅ ifrāīm ke qarīb ke bāl-hasūr meṅ lāī gaīṅ tāki un ke bāl katre jāeṅ. is mauqe par abīsalūm ne bādshāh ke tamām beṭoṅ ko dāwat dī ki wuh wahāṅ ziyāfat meṅ sharīk hoṅ.

²⁴wuh dāūd bādshāh ke pās bhī gayā aur kahā, “in dinoṅ meṅ maiṅ apnī bheṛoṅ ke bāl katrā rahā hūṅ. bādshāh aur un ke afsaroṅ ko bhī mere sāth ḳhushī manāne kī dāwat hai.”

²⁵lekin dāūd ne inkār kiyā, “nahīṅ, mere beṭe, ham sab to nahīṅ ā sakte. itne log āp ke lie bojh kā bāis ban jāeṅge.” abīsalūm bahut isrār kartā rahā, lekin dāūd ne dāwat ko qabūl na kiyā balki use barkat de kar ruḳhsat karnā chāhtā thā.

²⁶āḳhirkār abīsalūm ne darḳhwāst kī, “agar āp hamāre sāth jā na sakeṅ to phir kam az kam mere bhāī amnon ko āne deṅ.” bādshāh ne pūchhā, “ḳhāskar amnon ko kyūṅ?”

²⁷lekin abīsalūm itnā zor detā rahā ki dāūd ne amnon ko bāqī beṭoṅ samet bāl-hasūr jāne kī ijāzat de dī.

²⁸ziyāfat se pahle abīsalūm ne apne mulāzimoṅ ko hukm diyā, “suneṅ! jab amnon mai pī pī kar ḳhush ho jāegā to maiṅ āp ko amnon ko mārne kā hukm dūṅgā. phir āp ko use mār ḍālnā hai. ḍareṅ mat, kyūṅki maiṅ hī ne āp ko yih hukm diyā hai. mazbūt aur diler hoṅ!”

²⁹mulāzimoṅ ne aisā hī kiyā. unhoṅ ne amnon ko mār ḍālā. yih dekh kar bādshāh ke dūsre beṭe uṭh kar apne ḳhachcharoṅ par sawār hue aur bhāg gae.

³⁰wuh abhī rāste meṅ hī the ki afwāh dāūd tak pahuṅchī, “abīsalūm ne āp ke tamām beṭoṅ ko qatl kar diyā hai. ek bhī nahīṅ bachā.”

³¹bādshāh uṭhā aur apne kapṛe phāṛ kar farsh par leṭ gayā. us ke darbārī bhī dukh meṅ apne kapṛe phāṛ phāṛ kar us ke pās khaṛe rahe.

³²phir dāūd kā bhatījā yūnadab bol uṭhā, “mere āqā, āp na socheṅ ki unhoṅ ne tamām shahzādoṅ ko mār ḍālā hai. sirf amnon mar gayā hogā, kyūṅki jab se us ne tamr kī ismatdarī kī us waqt se abīsalūm kā yihī irādā thā.

³³lihāzā is ḳhabar ko itnī ahmiyat na deṅ ki tamām beṭe halāk hue haiṅ. sirf amnon mar gayā hogā.”

³⁴itne meṅ abīsalūm farār ho gayā thā. phir yarūshalam kī fasīl par khaṛe pahredār ne achānak dekhā ki maġhrib se logoṅ kā baṛā guroh shahr kī taraf baṛh rahā hai. wuh pahāṛī ke dāman meṅ chale ā rahe the.

³⁵tab yūnadab ne bādshāh se kahā, “lo, bādshāh ke beṭe ā rahe haiṅ, jis tarah āp ke ḳhādim ne kahā thā.”

³⁶wuh abhī apnī bāt ḳhatm kar hī rahā thā ki shahzāde andar āe aur ḳhūb ro paṛe. bādshāh aur us ke afsar bhī rone lage.

³⁷dāūd baṛī der tak amnon kā mātam kartā rahā. lekin abīsalūm ne farār ho kar jasūr ke bādshāh talmī bin ammīhūd ke pās panāh lī jo us kā nānā thā.

³⁸wahāṅ wuh tīn sāl tak rahā.

³⁹phir ek waqt ā gayā ki dāūd kā amnon ke lie dukh dūr ho gayā, aur us kā abīsalūm par ġhussā tham gayā.