Read Roman Urdu Geo 2-samūel 14 Bible Online

2-samūel 14 - Roman Urdu Geo bible

2-samūel 14

¹yoāb bin zarūyāh ko mālūm huā ki bādshāh apne beṭe abīsalūm ko chāhtā hai,

²is lie us ne taqūa se ek dānishmand aurat ko bulāyā. yoāb ne use hidāyat dī, “mātam kā rūp bhareṅ jaise āp der se kisī kā mātam kar rahī hoṅ. mātam ke kapṛe pahan kar ḳhushbūdār tel mat lagānā.

³bādshāh ke pās jā kar us se bāt kareṅ.” phir yoāb ne aurat ko lafz-ba-lafz wuh kuchh sikhāyā jo use bādshāh ko batānā thā.

⁴dāūd ke darbār meṅ ā kar aurat ne aundhe muṅh jhuk kar iltimās kī, “ai bādshāh, merī madad kareṅ!”

⁵dāūd ne daryāft kiyā, “kyā maslā hai?” aurat ne jawāb diyā, “maiṅ bewā hūṅ, merā shauhar faut ho gayā hai.

⁶aur mere do beṭe the. ek din wuh bāhar khet meṅ ek dūsre se ulajh paṛe. aur chūṅki koī maujūd nahīṅ thā jo donoṅ ko alag kartā is lie ek ne dūsre ko mār ḍālā.

⁷us waqt se pūrā kumbā mere ḳhilāf uṭh khaṛā huā hai. wuh taqāzā karte haiṅ ki maiṅ apne beṭe ko un ke hawāle karūṅ. wuh kahte haiṅ, ‘us ne apne bhāī ko mār diyā hai, is lie ham badle meṅ use sazā-e-maut deṅge. is tarah wāris bhī nahīṅ rahegā.’ yūṅ wuh merī ummīd kī āḳhirī kiran ko ḳhatm karnā chāhte haiṅ. kyūṅki agar merā yih beṭā bhī mar jāe to mere shauhar kā nām qāim nahīṅ rahegā, aur us kā ḳhāndān rū-e-zamīn par se miṭ jāegā.”

⁸bādshāh ne aurat se kahā, “apne ghar chalī jāeṅ aur fikr na kareṅ. maiṅ muāmalā hal kar dūṅgā.”

⁹lekin aurat ne guzārish kī, “ai bādshāh, ḍar hai ki log phir bhī mujhe mujrim ṭhahrāeṅge agar mere beṭe ko sazā-e-maut na dī jāe. āp par to wuh ilzām nahīṅ lagāeṅge.”

¹⁰dāūd ne isrār kiyā, “agar koī āp ko tang kare to use mere pās le āeṅ. phir wuh āindā āp ko nahīṅ satāegā!”

¹¹aurat ko tasallī na huī. us ne guzārish kī, “ai bādshāh, barāh-e-karm rab apne ḳhudā kī qasam khāeṅ ki āp kisī ko bhī maut kā badlā nahīṅ lene deṅge. warnā nuqsān meṅ izāfā hogā aur merā dūsrā beṭā bhī halāk ho jāegā.” dāūd ne jawāb diyā, “rab kī hayāt kī qasam, āp ke beṭe kā ek bāl bhī bīkā nahīṅ hogā.”

¹²phir aurat asal bāt par ā gaī, “mere āqā, barāh-e-karm apnī ḳhādimā ko ek aur bāt karne kī ijāzat deṅ.” bādshāh bolā, “kareṅ bāt.”

¹³tab aurat ne kahā, “āp ḳhud kyūṅ allāh kī qaum ke ḳhilāf aisā irādā rakhte haiṅ jise āp ne abhī abhī ġhalat qarār diyā hai? āp ne ḳhud farmāyā hai ki yih ṭhīk nahīṅ, aur yūṅ āp ne apne āp ko hī mujrim ṭhahrāyā hai. kyūṅki āp ne apne beṭe ko radd karke use wāpas āne nahīṅ diyā.

¹⁴beshak ham sab ko kisī waqt marnā hai. ham sab zamīn par unḍele gae pānī kī mānind haiṅ jise zamīn jazb kar letī hai aur jo dubārā jamā nahīṅ kiyā jā saktā. lekin allāh hamārī zindagī ko bilāwajah miṭā nahīṅ detā balki aise mansūbe tayyār rakhtā hai jin ke zarī'e mardūd shaḳhs bhī us ke pās wāpas ā sake aur us se dūr na rahe.

¹⁵ai bādshāh mere āqā, maiṅ is waqt is lie āp ke huzūr āī hūṅ ki mere log mujhe ḍarāne kī koshish kar rahe haiṅ. maiṅ ne sochā, maiṅ bādshāh se bāt karne kī jur'at karūṅgī, shāyad wuh merī suneṅ

¹⁶aur mujhe us ādmī se bachāeṅ jo mujhe aur mere beṭe ko us maurūsī zamīn se mahrūm rakhnā chāhtā hai jo allāh ne hameṅ de dī hai.

¹⁷ḳhayāl yih thā ki agar bādshāh muāmalā hal kar deṅ to phir mujhe dubārā sukūn milegā, kyūṅki āp achchhī aur burī bātoṅ kā imtiyāz karne meṅ allāh ke farishte jaise haiṅ. rab āp kā ḳhudā āp ke sāth ho.”

¹⁸yih sab kuchh sun kar dāūd bol uṭhā, “ab mujhe ek bāt batāeṅ. is kā sahīh jawāb deṅ.” aurat ne jawāb diyā, “jī mere āqā, bāt farmāie.” dāūd ne pūchhā, “kyā yoāb ne āp se yih kām karwāyā?”

¹⁹aurat pukārī, “bādshāh kī hayāt kī qasam, jo kuchh bhī mere āqā farmāte haiṅ wuh nishāne par lag jātā hai, ḳhwāh bandā bāīṅ yā dāīṅ taraf haṭne kī koshish kyūṅ na kare. jī hāṅ, āp ke ḳhādim yoāb ne mujhe āp ke huzūr bhej diyā. us ne mujhe lafz-ba-lafz sab kuchh batāyā jo mujhe āp ko arz karnā thā,

²⁰kyūṅki wuh āp ko yih bāt barāh-e-rāst nahīṅ pesh karnā chāhtā thā. lekin mere āqā ko allāh ke farishte kī sī hikmat hāsil hai. jo kuchh bhī mulk meṅ wuqū meṅ ātā hai us kā āp ko patā chal jātā hai.”

²¹dāūd ne yoāb ko bulā kar us se kahā, “ṭhīk hai, maiṅ āp kī darḳhwāst pūrī karūṅga. jāeṅ, mere beṭe abīsalūm ko wāpas le āeṅ.”

²²yoāb aundhe muṅh jhuk gayā aur bolā, “rab bādshāh ko barkat de! mere āqā, āj mujhe mālūm huā hai ki maiṅ āp ko manzūr hūṅ, kyūṅki āp ne apne ḳhādim kī darḳhwāst ko pūrā kiyā hai.”

²³yoāb rawānā ho kar jasūr chalā gayā aur wahāṅ se abīsalūm ko wāpas lāyā.

²⁴lekin jab wuh yarūshalam pahuṅche to bādshāh ne hukm diyā, “use apne ghar meṅ rahne kī ijāzat hai, lekin wuh kabhī mujhe nazar na āe.” chunāṅche abīsalūm apne ghar meṅ dubārā rahne lagā, lekin bādshāh se kabhī mulāqāt na ho sakī.

²⁵pūre isrāīl meṅ abīsalūm jaisā ḳhūbsūrat ādmī nahīṅ thā. sab us kī ḳhās tārīf karte the, kyūṅki sar se le kar pāoṅ tak us meṅ koī nuqs nazar nahīṅ ātā thā.

²⁶sāl meṅ wuh ek hī martabā apne bāl kaṭwātā thā, kyūṅki itne meṅ us ke bāl had se zyādā waznī ho jāte the. jab unheṅ tolā jātā to un kā wazn taqrīban sawā do kilogrām hotā thā.

²⁷abīsalūm ke tīn beṭe aur ek beṭī thī. beṭī kā nām tamr thā aur wuh nihāyat ḳhūbsūrat thī.

²⁸do sāl guzar gae. phir bhī abīsalūm ko bādshāh se milne kī ijāzat na milī.

²⁹phir us ne yoāb ko ittilā bhejī ki wuh us kī sifārish kare. lekin yoāb ne āne se inkār kiyā. abīsalūm ne use dubārā bulāne kī koshish kī, lekin is bār bhī yoāb us ke pās na āyā.

³⁰tab abīsalūm ne apne naukaroṅ ko hukm diyā, “dekho, yoāb kā khet mere khet se mulhiq hai, aur us meṅ jau kī fasal pak rahī hai. jāo, use āg lagā do!” naukar gae aur aisā hī kiyā.

³¹jab khet meṅ āg lag gaī to yoāb bhāg kar abīsalūm ke pās āyā aur shikāyat kī, “āp ke naukaroṅ ne mere khet ko āg kyūṅ lagāī hai?”

³²abīsalūm ne jawāb diyā, “dekheṅ, āp nahīṅ āe jab maiṅ ne āp ko bulāyā. kyūṅki maiṅ chāhtā hūṅ ki āp bādshāh ke pās jā kar un se pūchheṅ ki mujhe jasūr se kyūṅ lāyā gayā. behtar hotā ki maiṅ wahīṅ rahtā. ab bādshāh mujh se mileṅ yā agar wuh ab tak mujhe qusūrwār ṭhahrāte haiṅ to mujhe sazā-e-maut deṅ.”

³³yoāb ne bādshāh ke pās jā kar use yih paiġhām pahuṅchāyā. phir dāūd ne apne beṭe ko bulāyā. abīsalūm andar āyā aur bādshāh ke sāmne aundhe muṅh jhuk gayā. phir bādshāh ne abīsalūm ko bosā diyā.