Read Roman Urdu Geo 2-samūel 18 Bible Online

2-samūel 18 - Roman Urdu Geo bible

2-samūel 18

¹dāūd ne apne faujiyoṅ kā muāinā karke hazār hazār aur sau sau afrād par ādmī muqarrar kie.

²phir us ne unheṅ tīn hissoṅ meṅ taqsīm karke ek hisse par yoāb ko, dūsre par us ke bhāī abīshai bin zarūyāh ko aur tīsre par ittī jātī ko muqarrar kiyā. us ne faujiyoṅ ko batāyā, “maiṅ ḳhud bhī āp ke sāth laṛne ke lie niklūṅgā.”

³lekin unhoṅ ne etirāz kiyā, “aisā na kareṅ! agar hameṅ bhāgnā bhī paṛe yā hamārā ādhā hissā mārā bhī jāe to abīsalūm ke faujiyoṅ ke lie itnā koī farq nahīṅ paṛegā. wuh āp hī ko pakaṛnā chāhte haiṅ, kyūṅki āp un ke nazdīk ham meṅ se 10,000 afrād se zyādā aham haiṅ. chunāṅche behtar hai ki āp shahr hī meṅ raheṅ aur wahāṅ se hamārī himāyat kareṅ.”

⁴bādshāh ne jawāb diyā, “ṭhīk hai, jo kuchh āp ko māqūl lagtā hai wuhī karūṅga.” wuh shahr ke darwāze par khaṛā huā, aur tamām mard sau sau aur hazār hazār ke gurohoṅ meṅ us ke sāmne se guzar kar bāhar nikle.

⁵yoāb, abīshai aur ittī ko us ne hukm diyā, “merī ḳhātir jawān abīsalūm se narmī se pesh ānā!” tamām faujiyoṅ ne tīnoṅ kamānḍaroṅ se yih bāt sunī.

⁶dāūd ke log khule maidān meṅ isrāīliyoṅ se laṛne gae. ifrāīm ke jangal meṅ un kī ṭakkar huī,

⁷aur dāūd ke faujiyoṅ ne muḳhālifoṅ ko shikast-e-fāsh dī. un ke 20,000 afrād halāk hue.

⁸laṛāī pūre jangal meṅ phailtī gaī. yih jangal itnā ḳhatarnāk thā ki us din talwār kī nisbat zyādā log us kī zad meṅ ā kar halāk ho gae.

⁹achānak dāūd ke kuchh faujiyoṅ ko abīsalūm nazar āyā. wuh ḳhachchar par sawār balūt ke ek baṛe daraḳht ke sāy meṅ se guzarne lagā to us ke bāl daraḳht kī shāḳhoṅ meṅ ulajh gae. us kā ḳhachchar āge nikal gayā jabki abīsalūm wahīṅ āsmān-o-zamīn ke darmiyān laṭkā rahā.

¹⁰jin ādmiyoṅ ne yih dekhā un meṅ se ek yoāb ke pās gayā aur ittilā dī, “maiṅ ne abīsalūm ko dekhā hai. wuh balūt ke ek daraḳht meṅ laṭkā huā hai.”

¹¹yoāb pukārā, “kyā āp ne use dekhā? to use wahīṅ kyūṅ na mār diyā? phir maiṅ āp ko in'ām ke taur par chāṅdī ke das sikke aur ek kamarband de detā.”

¹²lekin ādmī ne etirāz kiyā, “agar āp mujhe chāṅdī ke hazār sikke bhī dete to bhī maiṅ bādshāh ke beṭe ko hāth na lagātā. hamāre sunte sunte bādshāh ne āp, abīshai aur ittī ko hukm diyā, ‘merī ḳhātir abīsalūm ko nuqsān na pahuṅchāeṅ.’

¹³aur agar maiṅ chupke se bhī use qatl kartā to bhī is kī ḳhabar kisī na kisī waqt bādshāh ke kānoṅ tak pahuṅchtī. kyūṅki koī bhī bāt bādshāh se poshīdā nahīṅ rahtī. agar mujhe is sūrat meṅ pakaṛā jātā to āp merī himāyat na karte.”

¹⁴yoāb bolā, “merā waqt mazīd zāe mat karo.” us ne tīn neze le kar abīsalūm ke dil meṅ ghoṅp die jab wuh abhī zindā hālat meṅ daraḳht se laṭkā huā thā.

¹⁵phir yoāb ke das silāhbardāroṅ ne abīsalūm ko gher kar use halāk kar diyā.

¹⁶tab yoāb ne narsingā bajā diyā, aur us ke faujī dūsroṅ kā tāqqub karne se bāz ā kar wāpas ā gae.

¹⁷bāqī isrāīlī apne apne ghar bhāg gae. yoāb ke ādmiyoṅ ne abīsalūm kī lāsh ko ek gahre gaṛhe meṅ phaiṅk kar us par pattharoṅ kā baṛā ḍher lagā diyā.

¹⁸kuchh der pahle abīsalūm is ḳhayāl se bādshāh kī wādī meṅ apnī yād meṅ ek satūn khaṛā kar chukā thā ki merā koī beṭā nahīṅ hai jo merā nām qāim rakhe. āj tak yih ‘abīsalūm kī yādgār’ kahlātā hai.

¹⁹aḳhīmāz bin sadoq ne yoāb se darḳhwāst kī, “mujhe dauṛ kar bādshāh ko ḳhushḳhabrī sunāne deṅ ki rab ne use dushmanoṅ se bachā liyā hai.”

²⁰lekin yoāb ne inkār kiyā, “jo paiġhām āp ko bādshāh tak pahuṅchānā hai wuh us ke lie ḳhushḳhabrī nahīṅ hai, kyūṅki us kā beṭā mar gayā hai. kisī aur waqt maiṅ zarūr āp ko us ke pās bhej dūṅgā, lekin āj nahīṅ.”

²¹us ne ethūpiyā ke ek ādmī ko hukm diyā, “jāeṅ aur bādshāh ko batāeṅ.” ādmī yoāb ke sāmne aundhe muṅh jhuk gayā aur phir dauṛ kar chalā gayā.

²²lekin aḳhīmāz ḳhush nahīṅ thā. wuh isrār kartā rahā, “kuchh bhī ho jāe, mehrbānī karke mujhe us ke pīchhe dauṛne deṅ!” ek aur bār yoāb ne use rokne kī koshish kī, “beṭe, āp jāne ke lie kyūṅ taṛapte haiṅ? jo ḳhabar pahuṅchānī hai us ke lie āp ko in'ām nahīṅ milegā.”

²³aḳhīmāz ne jawāb diyā, “koī bāt nahīṅ. kuchh bhī ho jāe, maiṅ har sūrat meṅ dauṛ kar bādshāh ke pās jānā chāhtā hūṅ.” tab yoāb ne use jāne diyā. aḳhīmāz ne daryā-e-yardan ke khule maidān kā rāstā liyā, is lie wuh ethūpiyā ke ādmī se pahle bādshāh ke pās pahuṅch gayā.

²⁴us waqt dāūd shahr ke bāhar aur andar wāle darwāzoṅ ke darmiyān baiṭhā intizār kar rahā thā. jab pahredār darwāze ke ūpar kī fasīl par chaṛhā to use ek tanhā ādmī nazar āyā jo dauṛtā huā un kī taraf ā rahā thā.

²⁵pahredār ne āwāz de kar bādshāh ko ittilā dī. dāūd bolā, “agar akelā ho to zarūr ḳhushḳhabrī le kar ā rahā hogā.” yih ādmī bhāgtā bhāgtā qarīb ā gayā,

²⁶lekin itne meṅ pahredār ko ek aur ādmī nazar āyā jo shahr kī taraf dauṛtā huā ā rahā thā. us ne shahr ke darwāze ke darbān ko āwāz dī, “ek aur ādmī dauṛtā huā dikhāī de rahā hai. wuh bhī akelā hī ā rahā hai.” dāūd ne kahā, “wuh bhī achchhī ḳhabar le kar ā rahā hai.”

²⁷phir pahredār pukārā, “lagtā hai ki pahlā ādmī aḳhīmāz bin sadoq hai, kyūṅki wuhī yūṅ chaltā hai.” dāūd ko tasallī huī, “aḳhīmāz achchhā bandā hai. wuh zarūr achchhī ḳhabar le kar ā rahā hogā.”

²⁸dūr se aḳhīmāz ne bādshāh ko āwāz dī, “bādshāh kī salāmatī ho!” wuh aundhe muṅh bādshāh ke sāmne jhuk kar bolā, “rab āp ke ḳhudā kī tamjīd ho! us ne āp ko un logoṅ se bachā liyā hai jo mere āqā aur bādshāh ke ḳhilāf uṭh khaṛe hue the.”

²⁹dāūd ne pūchhā, “aur merā beṭā abīsalūm? kyā wuh mahfūz hai?” aḳhīmāz ne jawāb diyā, “jab yoāb ne mujhe aur bādshāh ke dūsre ḳhādim ko āp ke pās ruḳhsat kiyā to us waqt baṛī afrā-tafrī thī. mujhe tafsīl se mālūm na huā ki kyā ho rahā hai.”

³⁰bādshāh ne hukm diyā, “ek taraf ho kar mere pās khaṛe ho jāeṅ!” aḳhīmāz ne aisā hī kiyā.

³¹phir ethūpiyā kā ādmī pahuṅch gayā. us ne kahā, “mere bādshāh, merī ḳhushḳhabrī suneṅ! āj rab ne āp ko un sab logoṅ se najāt dilāī hai jo āp ke ḳhilāf uṭh khaṛe hue the.”

³²bādshāh ne sawāl kiyā, “aur merā beṭā abīsalūm? kyā wuh mahfūz hai?” ethūpiyā ke ādmī ne jawāb diyā, “mere āqā, jis tarah us ke sāth huā hai, us tarah āp ke tamām dushmanoṅ ke sāth ho jāe, un sab ke sāth jo āp ko nuqsān pahuṅchānā chāhte haiṅ!”

³³yih sun kar bādshāh laraz uṭhā. shahr ke darwāze ke ūpar kī fasīl par ek kamrā thā. ab bādshāh rote rote sīṛhiyoṅ par chaṛhnī lagā aur chīḳhte chillāte us kamre meṅ chalā gayā, “hāy mere beṭe abīsalūm! mere beṭe, mere beṭe abīsalūm! kāsh maiṅ hī terī jagah mar jātā. hāy abīsalūm, mere beṭe, mere beṭe!”