Read Roman Urdu Geo 2-samūel 19 Bible Online

2-samūel 19 - Roman Urdu Geo bible

2-samūel 19

¹yoāb ko ittilā dī gaī, “bādshāh rote rote abīsalūm kā mātam kar rahā hai.”

²jab faujiyoṅ ko ḳhabar milī ki bādshāh apne beṭe kā mātam kar rahā hai to fath pāne par un kī sārī ḳhushī kāfūr ho gaī. har taraf mātam aur ġham kā samāṅ thā.

³us din dāūd ke ādmī chorī chorī shahr meṅ ghus āe, aise logoṅ kī tarah jo maidān-e-jang se farār hone par sharmāte hue chupke se shahr meṅ ā jāte haiṅ.

⁴bādshāh abhī kamre meṅ baiṭhā thā. apne muṅh ko ḍhāṅp kar wuh chīḳhtā chillātā rahā, “hāy mere beṭe abīsalūm! hāy abīsalūm, mere beṭe, mere beṭe!”

⁵tab yoāb us ke pās jā kar use samjhāne lagā, “āj āp ke ḳhādimoṅ ne na sirf āp kī jān bachāī hai balki āp ke beṭoṅ, beṭiyoṅ, bīwiyoṅ aur dāshtāoṅ kī jān bhī. to bhī āp ne un kā muṅh kālā kar diyā hai.

⁶jo āp se nafrat karte haiṅ un se āp muhabbat rakhte haiṅ jabki jo āp se pyār karte haiṅ un se āp nafrat karte haiṅ. āj āp ne sāf zāhir kar diyā hai ki āp ke kamānḍar aur daste āp kī nazar meṅ koī haisiyat nahīṅ rakhte. hāṅ, āj maiṅ ne jān liyā hai ki agar abīsalūm zindā hotā to āp ḳhush hote, ḳhwāh ham bāqī tamām log halāk kyūṅ na ho jāte.

⁷ab uṭh kar bāhar jāeṅ aur apne ḳhādimoṅ kī hauslā-afzāī kareṅ. rab kī qasam, agar āp bāhar na nikleṅge to rāt tak ek bhī āp ke sāth nahīṅ rahegā. phir āp par aisī musībat āegī jo āp kī jawānī se le kar āj tak āp par nahīṅ āī hai.”

⁸tab dāūd uṭhā aur shahr ke darwāze ke pās utar āyā. jab faujiyoṅ ko batāyā gayā ki bādshāh shahr ke darwāze meṅ baiṭhā hai to wuh sab us ke sāmne jamā hue. itne meṅ isrāīlī apne ghar bhāg gae the.

⁹isrāīl ke tamām qabīloṅ meṅ log āpas meṅ bahs-mubāhasā karne lage, “dāūd bādshāh ne hameṅ hamāre dushmanoṅ se bachāyā, aur usī ne hameṅ filistiyoṅ ke hāth se āzād kar diyā. lekin abīsalūm kī wajah se wuh mulk se hijrat kar gayā hai.

¹⁰ab jab abīsalūm jise ham ne masah karke bādshāh banāyā thā mar gayā hai to āp bādshāh ko wāpas lāne se kyūṅ jhijakte haiṅ?”

¹¹dāūd ne sadoq aur abiyātar imāmoṅ kī mārifat yahūdāh ke buzurgoṅ ko ittilā dī, “yih bāt mujh tak pahuṅch gaī hai ki tamām isrāīl apne bādshāh kā istiqbāl karke use mahal meṅ wāpas lānā chāhtā hai. to phir āp kyūṅ der kar rahe haiṅ? kyā āp mujhe wāpas lāne meṅ sab se āḳhir meṅ ānā chāhte haiṅ?

¹²āp mere bhāī, mere qarībī rishtedār haiṅ. to phir āp bādshāh ko wāpas lāne meṅ āḳhir meṅ kyūṅ ā rahe haiṅ?”

¹³aur abīsalūm ke kamānḍar amāsā ko donoṅ imāmoṅ ne dāūd kā yih paiġhām pahuṅchāyā, “suneṅ, āp mere bhatīje haiṅ, is lie ab se āp hī yoāb kī jagah merī fauj ke kamānḍar hoṅge. allāh mujhe saḳht sazā de agar maiṅ apnā yih wādā pūrā na karūṅ.”

¹⁴is tarah dāūd yahūdāh ke tamām diloṅ ko jīt sakā, aur sab ke sab us ke pīchhe lag gae. unhoṅ ne use paiġhām bhejā, “wāpas āeṅ, āp bhī aur āp ke tamām log bhī.”

¹⁵tab dāūd yarūshalam wāpas chalne lagā. jab wuh daryā-e-yardan tak pahuṅchā to yahūdāh ke log jiljāl meṅ āe tāki us se mileṅ aur use daryā ke dūsre kināre tak pahuṅchāeṅ.

¹⁶binyamīnī shahr bahūrīm kā simaī bin jīrā bhī bhāg kar yahūdāh ke ādmiyoṅ ke sāth dāūd se milne āyā.

¹⁷binyamīn ke qabīle ke hazār ādmī us ke sāth the. sāūl kā purānā naukar zībā bhī apne 15 beṭoṅ aur 20 naukaroṅ samet un meṅ shāmil thā. bādshāh ke yardan ke kināre tak pahuṅchne se pahle pahle

¹⁸wuh jaldī se daryā ko ubūr karke us ke pās āe tāki bādshāh ke gharāne ko daryā ke dūsre kināre tak pahuṅchāeṅ aur har tarah se bādshāh ko ḳhush rakheṅ. dāūd daryā ko pār karne ko thā ki simaī aundhe muṅh us ke sāmne gir gayā.

¹⁹us ne iltimās kī, “mere āqā, mujhe muāf kareṅ. jo ziyādatī maiṅ ne us din āp se kī jab āp ko yarūshalam ko chhoṛnā paṛā wuh yād na kareṅ. barāh-e-karm yih bāt apne zahan se nikāl deṅ.

²⁰maiṅ ne jān liyā hai ki mujh se baṛā jurm sarzad huā hai, is lie āj maiṅ yūsuf ke gharāne ke tamām afrād se pahle hī apne āqā aur bādshāh ke huzūr ā gayā hūṅ.”

²¹abīshai bin zarūyāh bolā, “simaī sazā-e-maut ke lāiq hai! us ne rab ke masah kie hue bādshāh par lānat kī hai.”

²²lekin dāūd ne use ḍānṭā, “merā āp aur āp ke bhāī yoāb ke sāth kyā wāstā? aisī bātoṅ se āp is din mere muḳhālif ban gae haiṅ! āj to isrāīl meṅ kisī ko sazā-e-maut dene kā nahīṅ balki ḳhushī kā din hai. dekheṅ, is din maiṅ dubārā isrāīl kā bādshāh ban gayā hūṅ!”

²³phir bādshāh simaī se muḳhātib huā, “rab kī qasam, āp nahīṅ mareṅge.”

²⁴sāūl kā potā mifībosat bhī bādshāh se milne āyā. us din se jab dāūd ko yarūshalam ko chhoṛnā paṛā āj tak jab wuh salāmatī se wāpas pahuṅchā mifībosat mātam kī hālat meṅ rahā thā. na us ne apne pāoṅ na apne kapṛe dhoe the, na apnī mūṅchhoṅ kī kāṅṭ-chhāṅṭ kī thī.

²⁵jab wuh bādshāh se milne ke lie yarūshalam se niklā to bādshāh ne us se sawāl kiyā, “mifībosat, āp mere sāth kyūṅ nahīṅ gae the?”

²⁶us ne jawāb diyā, “mere āqā aur bādshāh, maiṅ jāne ke lie tayyār thā, lekin merā naukar zībā mujhe dhokā de kar akelā hī chalā gayā. maiṅ ne to use batāyā thā, ‘mere gadhe par zīn kaso tāki maiṅ bādshāh ke sāth rawānā ho sakūṅ.’ aur merā jāne kā koī aur wasīlā thā nahīṅ, kyūṅki maiṅ donoṅ ṭāṅgoṅ se māzūr hūṅ.

²⁷zībā ne mujh par tohmat lagāī hai. lekin mere āqā aur bādshāh allāh ke farishte jaise haiṅ. mere sāth wuhī kuchh kareṅ jo āp ko munāsib lage.

²⁸mere dādā ke pūre gharāne ko āp halāk kar sakte the, lekin phir bhī āp ne merī izzat karke un mehmānoṅ meṅ shāmil kar liyā jo rozānā āp kī mez par khānā khāte haiṅ. chunāṅche merā kyā haq hai ki maiṅ bādshāh se mazīd apīl karūṅ.”

²⁹bādshāh bolā, “ab bas kareṅ. maiṅ ne faislā kar liyā hai ki āp kī zamīneṅ āp aur zībā meṅ barābar taqsīm kī jāeṅ.”

³⁰mifībosat ne jawāb diyā, “wuh sab kuchh le le. mere lie yihī kāfī hai ki āj mere āqā aur bādshāh salāmatī se apne mahal meṅ wāpas ā pahuṅche haiṅ.”

³¹barzillī jiliādī rājilīm se āyā thā tāki bādshāh ke sāth daryā-e-yardan ko pār karke use ruḳhsat kare.

³²barzillī 80 sāl kā thā. mahanāim meṅ rahte waqt usī ne dāūd kī mehmān-nawāzī kī thī, kyūṅki wuh bahut amīr thā.

³³ab dāūd ne barzillī ko dāwat dī, “mere sāth yarūshalam jā kar wahāṅ raheṅ! maiṅ āp kā har tarah se ḳhayāl rakhūṅgā.”

³⁴lekin barzillī ne inkār kiyā, “merī zindagī ke thoṛe din bāqī haiṅ, maiṅ kyūṅ yarūshalam meṅ jā basūṅ?

³⁵merī umr 80 sāl hai. na maiṅ achchhī aur burī chīzoṅ meṅ imtiyāz kar saktā, na mujhe khāne-pīne kī chīzoṅ kā mazā ātā hai. gīt gāne wāloṅ kī āwāzeṅ bhī mujh se sunī nahīṅ jātīṅ. nahīṅ mere āqā aur bādshāh, agar maiṅ āp ke sāth jāūṅ to āp ke lie sirf bojh kā bāis hūṅgā.

³⁶is kī zarūrat nahīṅ ki āp mujhe is qism kā muāwazā deṅ. maiṅ bas āp ke sāth daryā-e-yardan ko pār karūṅga

³⁷aur phir agar ijāzat ho to wāpas chalā jāūṅgā. maiṅ apne hī shahr meṅ marnā chāhtā hūṅ, jahāṅ mere māṅ-bāp kī qabr hai. lekin merā beṭā kimhām āp kī ḳhidmat meṅ hāzir hai. wuh āp ke sāth chalā jāe to āp us ke lie wuh kuchh kareṅ jo āp ko munāsib lage.”

³⁸dāūd ne jawāb diyā, “ṭhīk hai, kimhām mere sāth jāe. aur jo kuchh bhī āp chāheṅge maiṅ us ke lie karūṅga. agar koī kām hai jo maiṅ āp ke lie kar saktā hūṅ to maiṅ hāzir hūṅ.”

³⁹phir dāūd ne apne sāthiyoṅ samet daryā ko ubūr kiyā. barzillī ko bosā de kar us ne use barkat dī. barzillī apne shahr wāpas chal paṛā

⁴⁰jabki dāūd jiljāl kī taraf baṛh gayā. kimhām bhī sāth gayā. is ke ilāwā yahūdāh ke sab aur isrāīl ke ādhe log us ke sāth chale.

⁴¹rāste meṅ isrāīl ke mard bādshāh ke pās ā kar shikāyat karne lage, “hamāre bhāiyoṅ yahūdāh ke logoṅ ne āp ko āp ke gharāne aur faujiyoṅ samet chorī chorī kyūṅ daryā-e-yardan ke maġhribī kināre tak pahuṅchāyā? yih ṭhīk nahīṅ hai.”

⁴²yahūdāh ke mardoṅ ne jawāb diyā, “bāt yih hai ki ham bādshāh ke qarībī rishtedār haiṅ. āp ko yih dekh kar ġhussā kyūṅ ā gayā hai? na ham ne bādshāh kā khānā khāyā, na us se koī tohfā pāyā hai.”

⁴³to bhī isrāīl ke mardoṅ ne etirāz kiyā, “hamāre das qabīle haiṅ, is lie hamārā bādshāh kī ḳhidmat karne kā das gunā zyādā haq hai. to phir āp hameṅ haqīr kyūṅ jānte haiṅ? ham ne to pahle apne bādshāh ko wāpas lāne kī bāt kī thī.” yūṅ bahs-mubāhasā jārī rahā, lekin yahūdāh ke mardoṅ kī bāteṅ zyādā saḳht thīṅ.