Read Roman Urdu Geo 2-samūel 2 Bible Online

2-samūel 2 - Roman Urdu Geo bible

2-samūel 2

¹is ke bād dāūd ne rab se daryāft kiyā, “kyā maiṅ yahūdāh ke kisī shahr meṅ wāpas chalā jāūṅ?” rab ne jawāb diyā, “hāṅ, wāpas jā.” dāūd ne sawāl kiyā, “maiṅ kis shahr meṅ jāūṅ?” rab ne jawāb diyā, “habrūn meṅ.”

²chunāṅche dāūd apnī do bīwiyoṅ aḳhīnūsam yazraelī aur nābāl kī bewā abījel karmilī ke sāth habrūn meṅ jā basā.

³dāūd ne apne ādmiyoṅ ko bhī un ke ḳhāndānoṅ samet habrūn aur gird-o-nawāh kī ābādiyoṅ meṅ muntaqil kar diyā.

⁴ek din yahūdāh ke ādmī habrūn meṅ āe aur dāūd ko masah karke apnā bādshāh banā liyā. jab dāūd ko ḳhabar mil gaī ki yabīs-jiliād ke mardoṅ ne sāūl ko dafnā diyā hai

⁵to us ne unheṅ paiġhām bhejā, “rab āp ko is ke lie barkat de ki āp ne apne mālik sāūl ko dafn karke us par mehrbānī kī hai.

⁶jawāb meṅ rab āp par apnī mehrbānī aur wafādārī kā izhār kare. maiṅ bhī is nek amal kā ajr dūṅgā.

⁷ab mazbūt aur diler hoṅ. āp kā āqā sāūl to faut huā hai, lekin yahūdāh ke qabīle ne mujhe us kī jagah chun liyā hai.”

⁸itne meṅ sāūl kī fauj ke kamānḍar abinair bin nair ne sāūl ke beṭe ishbosat ko mahanāim shahr meṅ le jā kar

⁹bādshāh muqarrar kar diyā. jiliād, yazrael, āshar, ifrāīm, binyamīn aur tamām isrāīl us ke qabze meṅ rahe.

¹⁰sirf yahūdāh kā qabīlā dāūd ke sāth rahā. ishbosat 40 sāl kī umr meṅ bādshāh banā, aur us kī hukūmat do sāl qāim rahī.

¹¹dāūd habrūn meṅ yahūdāh par sāṛhe sāt sāl hukūmat kartā rahā.

¹²ek din abinair ishbosat bin sāūl ke mulāzimoṅ ke sāth mahanāim se nikal kar jibaūn āyā.

¹³yih dekh kar dāūd kī fauj yoāb bin zarūyāh kī rāhnumāī meṅ un se laṛne ke lie niklī. donoṅ faujoṅ kī mulāqāt jibaūn ke tālāb par huī. abinair kī fauj tālāb kī urlī taraf ruk gaī aur yoāb kī fauj parlī taraf.

¹⁴abinair ne yoāb se kahā, “āo, hamāre chand jawān hamāre sāmne ek dūsre kā muqābalā kareṅ.” yoāb bolā, “ṭhīk hai.”

¹⁵chunāṅche har fauj ne bārah jawānoṅ ko chun kar muqābale ke lie pesh kiyā. ishbosat aur binyamīn ke qabīle ke bārah jawān dāūd ke bārah jawānoṅ ke muqābale meṅ khaṛe ho gae.

¹⁶jab muqābalā shurū huā to har ek ne ek hāth se apne muḳhālif ke bāloṅ ko pakaṛ kar dūsre hāth se apnī talwār us ke peṭ meṅ ghoṅp dī. sab ke sab ek sāth mar gae. bād meṅ jibaūn kī is jagah kā nām ḳhilqat-hazzūrīm paṛ gayā.

¹⁷phir donoṅ faujoṅ ke darmiyān nihāyat saḳht laṛāī chhiṛ gaī. laṛte laṛte abinair aur us ke mard hār gae.

¹⁸yoāb ke do bhāī abīshai aur asāhel bhī laṛāī meṅ hissā le rahe the. asāhel ġhazāl kī tarah tez dauṛ saktā thā.

¹⁹jab abinair shikast khā kar bhāgne lagā to asāhel sīdhā us ke pīchhe paṛ gayā aur na dāīṅ, na bāīṅ taraf haṭā.

²⁰abinair ne pīchhe dekh kar pūchhā, “kyā āp hī haiṅ, asāhel?” us ne jawāb diyā, “jī, maiṅ hī hūṅ.”

²¹abinair bolā, “dāīṅ yā bāīṅ taraf haṭ kar kisī aur ko pakaṛeṅ! jawānoṅ meṅ se kisī se laṛ kar us ke hathiyār aur zirābaktar utāreṅ.” lekin asāhel us kā tāqqub karne se bāz na āyā.

²²abinair ne use āgāh kiyā, “ḳhabardār. mere pīchhe se haṭ jāeṅ, warnā āp ko mār dene par majbūr ho jāūṅgā. phir āp ke bhāī yoāb ko kis tarah muṅh dikhāūṅgā?”

²³to bhī asāhel ne pīchhā na chhoṛā. yih dekh kar abinair ne apne neze kā dastā itne zor se us ke peṭ meṅ ghoṅp diyā ki us kā sirā dūsrī taraf nikal gayā. asāhel wahīṅ gir kar jāṅ-ba-haq ho gayā. jis ne bhī wahāṅ se guzar kar yih dekhā wuh wahīṅ ruk gayā.

²⁴lekin yoāb aur abīshai abinair kā tāqqub karte rahe. jab sūraj ġhurūb hone lagā to wuh ek pahāṛī ke pās pahuṅch gae jis kā nām ammā thā. yih jiyāh ke muqābil us rāste ke pās hai jo musāfir ko jibaūn se registān meṅ pahuṅchātā hai.

²⁵binyamīn ke qabīle ke log wahāṅ pahāṛī par abinair ke pīchhe jamā ho kar dubārā laṛne ke lie tayyār ho gae.

²⁶abinair ne yoāb ko āwāz dī, “kyā yih zarūrī hai ki ham hameshā tak ek dūsre ko maut ke ghāṭ utārte jāeṅ? kyā āp ko samajh nahīṅ āī ki aisī harkateṅ sirf talḳhī paidā kartī haiṅ? āp kab apne mardoṅ ko hukm deṅge ki wuh apne isrāīlī bhāiyoṅ kā tāqqub karne se bāz āeṅ?”

²⁷yoāb ne jawāb diyā, “rab kī hayāt kī qasam, agar āp laṛne kā hukm na dete to mere log āj subh hī apne bhāiyoṅ kā tāqqub karne se bāz ā jāte.”

²⁸us ne narsingā bajā diyā, aur us ke ādmī ruk kar dūsroṅ kā tāqqub karne se bāz āe. yūṅ laṛāī ḳhatm ho gaī.

²⁹us pūrī rāt ke daurān abinair aur us ke ādmī chalte gae. daryā-e-yardan kī wādī meṅ se guzar kar unhoṅ ne daryā ko pār kiyā aur phir gahrī ghāṭī meṅ se ho kar mahanāim pahuṅch gae.

³⁰yoāb bhī abinair aur us ke logoṅ ko chhoṛ kar wāpas chalā gayā. jab us ne apne ādmiyoṅ ko jamā karke ginā to mālūm huā ki asāhel ke ilāwā dāūd ke 19 ādmī māre gae haiṅ.

³¹is ke muqābale meṅ abinair ke 360 ādmī halāk hue the. sab binyamīn ke qabīle ke the.

³²yoāb aur us ke sāthiyoṅ ne asāhel kī lāsh uṭhā kar use bait-laham meṅ us ke bāp kī qabr meṅ dafn kiyā. phir usī rāt apnā safar jārī rakh kar wuh pau phaṭte waqt habrūn pahuṅch gae.