Read Roman Urdu Geo 2-samūel 22 Bible Online

2-samūel 22 - Roman Urdu Geo bible

2-samūel 22

¹jis din rab ne dāūd ko tamām dushmanoṅ aur sāūl ke hāth se bachāyā us din bādshāh ne gīt gāyā,

²“rab merī chaṭān, merā qilā aur merā najātdahindā hai.

³merā ḳhudā merī chaṭān hai jis meṅ maiṅ panāh letā hūṅ. wuh merī ḍhāl, merī najāt kā pahāṛ, merā buland hisār aur merī panāhgāh hai. tū merā najātdahindā hai jo mujhe zulm-o-tashaddud se bachātā hai.

⁴maiṅ rab ko pukārtā hūṅ, us kī tamjīd ho! tab wuh mujhe dushmanoṅ se chhuṭkārā detā hai.

⁵maut kī maujoṅ ne mujhe gher liyā, halākat ke sailāb ne mere dil par dahshat tārī kī.

⁶pātāl ke rassoṅ ne mujhe jakaṛ liyā, maut ne mere rāste meṅ apne phande ḍāl die.

⁷jab maiṅ musībat meṅ phaṅs gayā to maiṅ ne rab ko pukārā. maiṅ ne madad ke lie apne ḳhudā se faryād kī to us ne apnī sukūnatgāh se merī āwāz sunī, merī chīḳheṅ us ke kān tak pahuṅch gaīṅ.

⁸tab zamīn laraz uṭhī aur thartharāne lagī, āsmān kī bunyādeṅ rab ke ġhazab ke sāmne kāṅpne aur jhūlne lagīṅ.

⁹us kī nāk se dhuāṅ nikal āyā, us ke muṅh se bhasm karne wāle shole aur dahakte koele bhaṛak uṭhe.

¹⁰āsmān ko jhukā kar wuh nāzil huā. jab utar āyā to us ke pāoṅ ke nīche andherā hī andherā thā.

¹¹wuh karūbī farishte par sawār huā aur uṛ kar hawā ke paroṅ par manḍlāne lagā.

¹²us ne andhere ko apnī chhupne kī jagah banāyā, bārish ke kāle aur ghane bādal ḳhaime kī tarah apne irdgird lagāe.

¹³us ke huzūr kī tez raushnī se sholāzan koele phūṭ nikle.

¹⁴rab āsmān se kaṛakne lagā, allāh t'ālā kī āwāz gūṅj uṭhī.

¹⁵us ne apne tīr chalā die to dushman titar-bitar ho gae. us kī bijlī idhar udhar girtī gaī to un meṅ halchal mach gaī.

¹⁶rab ne ḍānṭā to samundar kī wādiyāṅ zāhir huīṅ, jab wuh ġhusse meṅ garjā to us ke dam ke jhoṅkoṅ se zamīn kī bunyādeṅ nazar āīṅ.

¹⁷bulandiyoṅ par se apnā hāth baṛhā kar us ne mujhe pakaṛ liyā, gahre pānī meṅ se khaiṅch kar mujhe nikāl lāyā.

¹⁸us ne mujhe mere zabardast dushman se bachāyā, un se jo mujh se nafrat karte haiṅ, jin par maiṅ ġhālib na ā sakā.

¹⁹jis din maiṅ musībat meṅ phaṅs gayā us din unhoṅ ne mujh par hamlā kiyā, lekin rab merā sahārā banā rahā.

²⁰us ne mujhe tang jagah se nikāl kar chhuṭkārā diyā, kyūṅki wuh mujh se ḳhush thā.

²¹rab mujhe merī rāstbāzī kā ajr detā hai. mere hāth sāf haiṅ, is lie wuh mujhe barkat detā hai.

²²kyūṅki maiṅ rab kī rāhoṅ par chaltā rahā hūṅ, maiṅ badī karne se apne ḳhudā se dūr nahīṅ huā.

²³us ke tamām ahkām mere sāmne rahe haiṅ, maiṅ us ke farmānoṅ se nahīṅ haṭā.

²⁴us ke sāmne hī maiṅ be'ilzām rahā, gunāh karne se bāz rahā hūṅ.

²⁵is lie rab ne mujhe merī rāstbāzī kā ajr diyā, kyūṅki us kī āṅkhoṅ ke sāmne hī maiṅ pāk-sāf sābit huā.

²⁶ai allāh, jo wafādār hai us ke sāth terā sulūk wafādārī kā hai, jo be'ilzām hai us ke sāth terā sulūk be'ilzām hai.

²⁷jo pāk hai us ke sāth terā sulūk pāk hai. lekin jo kajrau hai us ke sāth terā sulūk bhī kajrawī kā hai.

²⁸tū pasthāloṅ ko najāt detā hai, aur terī āṅkheṅ maġhrūroṅ par lagī rahtī haiṅ tāki unheṅ past kareṅ.

²⁹ai rab, tū hī merā charāġh hai, rab hī mere andhere ko raushan kartā hai.

³⁰kyūṅki tere sāth maiṅ faujī daste par hamlā kar saktā, apne ḳhudā ke sāth dīwār ko phalāṅg saktā hūṅ.

³¹allāh kī rāh kāmil hai, rab kā farmān ḳhālis hai. jo bhī us meṅ panāh le us kī wuh ḍhāl hai.

³²kyūṅki rab ke siwā kaun ḳhudā hai? hamāre ḳhudā ke siwā kaun chaṭān hai?

³³allāh mujhe quwwat se kamarbastā kartā, wuh merī rāh ko kāmil kar detā hai.

³⁴wuh mere pāoṅ ko hiran kī sī phurtī atā kartā, mujhe mazbūtī se merī bulandiyoṅ par khaṛā kartā hai.

³⁵wuh mere hāthoṅ ko jang karne kī tarbiyat detā hai. ab mere bāzū pītal kī kamān ko bhī tān lete haiṅ.

³⁶ai rab, tū ne mujhe apnī najāt kī ḍhāl baḳhsh dī hai, terī narmī ne mujhe baṛā banā diyā hai.

³⁷tū mere qadmoṅ ke lie rāstā banā detā hai, is lie mere ṭaḳhne nahīṅ ḍagmagāte.

³⁸maiṅ ne apne dushmanoṅ kā tāqqub karke unheṅ kuchal diyā, maiṅ bāz na āyā jab tak wuh ḳhatm na ho gae.

³⁹maiṅ ne unheṅ tabāh karke yūṅ pāsh pāsh kar diyā ki dubārā uṭh na sake balki gir kar mere pāoṅ tale paṛe rahe.

⁴⁰kyūṅki tū ne mujhe jang karne ke lie quwwat se kamarbastā kar diyā, tū ne mere muḳhālifoṅ ko mere sāmne jhukā diyā.

⁴¹tū ne mere dushmanoṅ ko mere sāmne se bhagā diyā, aur maiṅ ne nafrat karne wāloṅ ko tabāh kar diyā.

⁴²wuh madad ke lie chīḳhte chillāte rahe, lekin bachāne wālā koī nahīṅ thā. wuh rab ko pukārte rahe, lekin us ne jawāb na diyā.

⁴³maiṅ ne unheṅ chūr chūr karke gard kī tarah hawā meṅ uṛā diyā. maiṅ ne unheṅ galī meṅ miṭṭī kī tarah pāoṅ tale raund kar rezā rezā kar diyā.

⁴⁴tū ne mujhe merī qaum ke jhagaṛoṅ se bachā kar aqwām par merī hukūmat qāim rakhī hai. jis qaum se maiṅ nāwāqif thā wuh merī ḳhidmat kartī hai.

⁴⁵pardesī dabak kar merī ḳhushāmad karte haiṅ. jūṅ hī maiṅ bāt kartā hūṅ to wuh merī sunte haiṅ.

⁴⁶wuh himmat hār kar kāṅpte hue apne qiloṅ se nikal āte haiṅ.

⁴⁷rab zindā hai! merī chaṭān kī tamjīd ho! mere ḳhudā kī tāzīm ho jo merī najāt kī chaṭān hai.

⁴⁸wuhī ḳhudā hai jo merā intiqām letā, aqwām ko mere tābe kar detā

⁴⁹aur mujhe mere dushmanoṅ se chhuṭkārā detā hai. yaqīnan tū mujhe mere muḳhālifoṅ par sarfarāz kartā, mujhe zālimoṅ se bachāe rakhtā hai.

⁵⁰ai rab, is lie maiṅ aqwām meṅ terī hamd-o-sanā karūṅga, tere nām kī tārīf meṅ gīt gāūṅgā.

⁵¹kyūṅki rab apne bādshāh ko baṛī najāt detā hai, wuh apne masah kie hue bādshāh dāūd aur us kī aulād par hameshā tak mehrbān rahegā.”