Read Roman Urdu Geo 2-samūel 5 Bible Online

2-samūel 5 - Roman Urdu Geo bible

2-samūel 5

¹us waqt isrāīl ke tamām qabīle habrūn meṅ dāūd ke pās āe aur kahā, “ham āp hī kī qaum aur āp hī ke rishtedār haiṅ.

²māzī meṅ bhī jab sāūl bādshāh thā to āp hī faujī muhimmoṅ meṅ isrāīl kī qiyādat karte rahe. aur rab ne āp se wādā bhī kiyā hai ki tū merī qaum isrāīl kā charwāhā ban kar us par hukūmat karegā.”

³jab isrāīl ke tamām buzurg habrūn pahuṅche to dāūd bādshāh ne rab ke huzūr un ke sāth ahd bāndhā, aur unhoṅ ne use masah karke isrāīl kā bādshāh banā diyā.

⁴dāūd 30 sāl kī umr meṅ bādshāh ban gayā. us kī hukūmat 40 sāl tak jārī rahī.

⁵pahle sāṛhe sāt sāl wuh sirf yahūdāh kā bādshāh thā aur us kā dār-ul-hukūmat habrūn rahā. bāqī 33 sāl wuh yarūshalam meṅ rah kar yahūdāh aur isrāīl donoṅ par hukūmat kartā rahā.

⁶bādshāh banane ke bād dāūd apne faujiyoṅ ke sāth yarūshalam gayā tāki us par hamlā kare. wahāṅ ab tak yabūsī ābād the. dāūd ko dekh kar yabūsiyoṅ ne us kā mazāq uṛāyā, “āp hamāre shahr meṅ kabhī dāḳhil nahīṅ ho pāeṅge! āp ko rokne ke lie hamāre langaṛe aur andhe kāfī haiṅ.” unheṅ pūrā yaqīn thā ki dāūd shahr meṅ kisī bhī tarīqe se nahīṅ ā sakegā.

⁷to bhī dāūd ne siyyūn ke qile par qabzā kar liyā jo ājkal ‘dāūd kā shahr’ kahlātā hai.

⁸jis din unhoṅ ne shahr par hamlā kiyā us ne elān kiyā, “jo bhī yabūsiyoṅ par fath pānā chāhe use pānī kī surang meṅ se guzar kar shahr meṅ ghusnā paṛegā tāki un langaṛoṅ aur andhoṅ ko māre jin se merī jān nafrat kartī hai.” is lie āj tak kahā jātā hai, “langaṛoṅ aur andhoṅ ko ghar meṅ jāne kī ijāzat nahīṅ.”

⁹yarūshalam par fath pāne ke bād dāūd qile meṅ rahne lagā. us ne use ‘dāūd kā shahr’ qarār diyā aur us ke irdgird shahr ko baṛhāne lagā. yih tāmīrī kām irdgird ke chabūtaroṅ se shurū huā aur hote hote qile tak pahuṅch gayā.

¹⁰yūṅ dāūd zor pakaṛtā gayā, kyūṅki rabb-ul-afwāj us ke sāth thā.

¹¹ek din sūr ke bādshāh hīrām ne dāūd ke pās wafd bhejā. baṛhaī aur rāj bhī sāth the. un ke pās deodār kī lakaṛī thī, aur unhoṅ ne dāūd ke lie mahal banā diyā.

¹²yūṅ dāūd ne jān liyā ki rab ne mujhe isrāīl kā bādshāh banā kar merī bādshāhī apnī qaum isrāīl kī ḳhātir sarfarāz kar dī hai.

¹³habrūn se yarūshalam meṅ muntaqil hone ke bād dāūd ne mazīd bīwiyoṅ aur dāshtāoṅ se shādī kī. natīje meṅ yarūshalam meṅ us ke kaī beṭe-beṭiyāṅ paidā hue.

¹⁴jo beṭe wahāṅ paidā hue wuh yih the: sammūa, sobāb, nātan, sulaimān,

¹⁵ibhār, ilīsūa, nafaj, yafīa,

¹⁶ilīsamā, ilyadā aur ilīfalat.

¹⁷jab filistiyoṅ ko ittilā milī ki dāūd ko masah karke isrāīl kā bādshāh banāyā gayā hai to unhoṅ ne apne faujiyoṅ ko isrāīl meṅ bhej diyā tāki use pakaṛ leṅ. lekin dāūd ko patā chal gayā, aur us ne ek pahāṛī qile meṅ panāh le lī.

¹⁸jab filistī isrāīl meṅ pahuṅch kar wādī-e-rafāīm meṅ phail gae

¹⁹to dāūd ne rab se daryāft kiyā, “kyā maiṅ filistiyoṅ par hamlā karūṅ? kyā tū mujhe un par fath baḳhshegā?” rab ne jawāb diyā, “hāṅ, un par hamlā kar! maiṅ unheṅ zarūr tere qabze meṅ kar dūṅgā.”

²⁰chunāṅche dāūd apne faujiyoṅ ko le kar bāl-parāzīm gayā. wahāṅ us ne filistiyoṅ ko shikast dī. bād meṅ us ne gawāhī dī, “jitne zor se band ke ṭūṭ jāne par pānī us se phūṭ nikaltā hai utne zor se āj rab mere deḳhte deḳhte dushman kī safoṅ meṅ se phūṭ niklā hai.” chunāṅche us jagah kā nām bāl-parāzīm yānī ‘phūṭ nikalne kā mālik’ paṛ gayā.

²¹filistī apne but chhoṛ kar bhāg gae. aur wuh dāūd aur us ke ādmiyoṅ ke qabze meṅ ā gae.

²²ek bār phir filistī ā kar wādī-e-rafāīm meṅ phail gae.

²³jab dāūd ne rab se daryāft kiyā to us ne jawāb diyā, “is martabā un kā sāmnā mat karnā balki un ke pīchhe jā kar bakā ke daraḳhtoṅ ke sāmne un par hamlā kar.

²⁴jab un daraḳhtoṅ kī choṭiyoṅ se qadmoṅ kī chāp sunāī de to ḳhabardār! yih is kā ishārā hogā ki rab ḳhud tere āge āge chal kar filistiyoṅ ko mārne ke lie nikal āyā hai.”

²⁵dāūd ne aisā hī kiyā aur natīje meṅ filistiyoṅ ko shikast de kar jibaūn se le kar jazr tak un kā tāqqub kiyā.