Read Roman Urdu Geo 2-samūel 8 Bible Online

2-samūel 8 - Roman Urdu Geo bible

2-samūel 8

¹phir aisā waqt āyā ki dāūd ne filistiyoṅ ko shikast de kar unheṅ apne tābe kar liyā aur hukūmat kī bāgḍor un ke hāthoṅ se chhīn lī.

²us ne moābiyoṅ par bhī fath pāī. moābī qaidiyoṅ kī qatār banā kar us ne unheṅ zamīn par liṭā diyā. phir rassī kā ṭukṛā le kar us ne qatār kā nāp liyā. jitne log rassī kī lambāī meṅ ā gae wuh ek guroh ban gae. yūṅ dāūd ne logoṅ ko gurohoṅ meṅ taqsīm kiyā. phir us ne gurohoṅ ke tīn hisse banā kar do hissoṅ ke sar qalam kie aur ek hisse ko zindā chhoṛ diyā. lekin jitne qaidī chhūṭ gae wuh dāūd ke tābe rah kar use ḳharāj dete rahe.

³dāūd ne shimālī shām ke shahr zobāh ke bādshāh hadadazar bin rahob ko bhī harā diyā jab hadadazar daryā-e-furāt par dubārā qābū pāne ke lie nikal āyā thā.

⁴dāūd ne 1,700 ghuṛsawāroṅ aur 20,000 piyādā sipāhiyoṅ ko giriftār kar liyā. rathoṅ ke 100 ghoṛoṅ ko us ne apne lie mahfūz rakhā, jabki bāqiyoṅ kī us ne koṅcheṅ kāṭ dīṅ tāki wuh āindā jang ke lie istemāl na ho sakeṅ.

⁵jab damishq ke arāmī bāshinde zobāh ke bādshāh hadadazar kī madad karne āe to dāūd ne un ke 22,000 afrād halāk kar die.

⁶phir us ne damishq ke ilāqe meṅ apnī faujī chaukiyāṅ qāim kīṅ. arāmī us ke tābe ho gae aur use ḳharāj dete rahe. jahāṅ bhī dāūd gayā wahāṅ rab ne use kāmyābī baḳhshī.

⁷sone kī jo ḍhāleṅ hadadazar ke afsaroṅ ke pās thīṅ unheṅ dāūd yarūshalam le gayā.

⁸hadadazar ke do shahroṅ batāh aur berotī se us ne kasrat kā pītal chhīn liyā.

⁹jab hamāt ke bādshāh tūī ko ittilā milī ki dāūd ne hadadazar kī pūrī fauj par fath pāī hai

¹⁰to us ne apne beṭe yūrām ko dāūd ke pās bhejā tāki use salām kahe. yūrām ne dāūd ko hadadazar par fath ke lie mubārakbād dī, kyūṅki hadadazar tūī kā dushman thā, aur un ke darmiyān jang rahī thī. yūrām ne dāūd ko sone, chāṅdī aur pītal ke tohfe bhī pesh kie.

¹¹dāūd ne yih chīzeṅ rab ke lie maḳhsūs kar dīṅ. jahāṅ bhī wuh dūsrī qaumoṅ par ġhālib āyā wahāṅ kī sonā-chāṅdī us ne rab ke lie maḳhsūs kar dī.

¹²yūṅ adom, moāb, ammon, filistiyā, amālīq aur zobāh ke bādshāh hadadazar bin rahob kī sonā-chāṅdī rab ko pesh kī gaī.

¹³jab dāūd ne namak kī wādī meṅ adomiyoṅ par fath pāī to us kī shohrat mazīd phail gaī. us jang meṅ dushman ke 18,000 afrād halāk hue.

¹⁴dāūd ne adom ke pūre mulk meṅ apnī faujī chaukiyāṅ qāim kīṅ, aur tamām adomī dāūd ke tābe ho gae. dāūd jahāṅ bhī jātā rab us kī madad karke use fath baḳhshtā.

¹⁵jitnī der dāūd pūre isrāīl par hukūmat kartā rahā utnī der tak us ne dhyān diyā ki qaum ke har ek shaḳhs ko insāf mil jāe.

¹⁶yoāb bin zarūyāh fauj par muqarrar thā. yahūsafat bin aḳhīlūd bādshāh kā mushīr-e-ḳhās thā.

¹⁷sadoq bin aḳhītūb aur aḳhīmalik bin abiyātar imām the. sirāyāh mīrmunshī thā.

¹⁸bināyāh bin yahoyadā dāūd ke ḳhās daste banām karetī-o-faletī kā kaptān thā. dāūd ke beṭe imām the.