Read Roman Urdu Geo 2-samūel 9 Bible Online

2-samūel 9 - Roman Urdu Geo bible

2-samūel 9

¹ek din dāūd pūchhne lagā, “kyā sāūl ke ḳhāndān kā koī fard bach gayā hai? maiṅ yūnatan kī ḳhātir us par apnī mehrbānī kā izhār karnā chāhtā hūṅ.”

²ek ādmī ko bulāyā gayā jo sāūl ke gharāne kā mulāzim thā. us kā nām zībā thā. dāūd ne sawāl kiyā, “kyā āp zībā haiṅ?” zībā ne jawāb diyā, “jī, āp kā ḳhādim hāzir hai.”

³bādshāh ne daryāft kiyā, “kyā sāūl ke ḳhāndān kā koī fard zindā rah gayā hai? maiṅ us par allāh kī mehrbānī kā izhār karnā chāhtā hūṅ.” zībā ne kahā, “yūnatan kā ek beṭā ab tak zindā hai. wuh donoṅ ṭāṅgoṅ se maflūj hai.”

⁴dāūd ne pūchhā, “wuh kahāṅ hai?” zībā ne jawāb diyā, “wuh lo-dibār meṅ makīr bin ammī'el ke hāṅ rahtā hai.”

⁵dāūd ne use fauran darbār meṅ bulā liyā.

⁶yūnatan ke jis beṭe kā zikr zībā ne kiyā wuh mifībosat thā. jab use dāūd ke sāmne lāyā gayā to us ne muṅh ke bal jhuk kar us kī izzat kī. dāūd ne kahā, “mifībosat!” us ne jawāb diyā, “jī, āp kā ḳhādim hāzir hai.”

⁷dāūd bolā, “ḍareṅ mat. āj maiṅ āp ke bāp yūnatan ke sāth kiyā huā wādā pūrā karke āp par apnī mehrbānī kā izhār karnā chāhtā hūṅ. ab suneṅ! maiṅ āp ko āp ke dādā sāūl kī tamām zamīneṅ wāpas kar detā hūṅ. is ke ilāwā maiṅ chāhtā hūṅ ki āp rozānā mere sāth khānā khāyā kareṅ.”

⁸mifībosat ne dubārā jhuk kar bādshāh kī tāzīm kī, “maiṅ kaun hūṅ ki āp mujh jaise murdā kutte par dhyān de kar aisī mehrbānī farmāeṅ!”

⁹dāūd ne sāūl ke purāne mulāzim zībā ko bulā kar use hidāyat dī, “maiṅ ne āp ke mālik ke pote ko sāūl aur us ke ḳhāndān kī tamām milkiyat de dī hai.

¹⁰ab āp kī zimmādārī yih hai ki āp apne beṭoṅ aur naukaroṅ ke sāth us ke khetoṅ ko saṅbhāleṅ tāki us kā ḳhāndān zamīnoṅ kī paidāwār se guzārā kar sake. lekin mifībosat ḳhud yahāṅ rah kar mere beṭoṅ kī tarah mere sāth khānā khāyā karegā.” (zībā ke 15 beṭe aur 20 naukar the).

¹¹zībā ne jawāb diyā, “maiṅ āp kī ḳhidmat meṅ hāzir hūṅ. jo bhī hukm āp deṅge maiṅ karne ke lie tayyār hūṅ.”

¹²us din se zībā ke gharāne ke tamām afrād mifībosat ke mulāzim ho gae. mifībosat ḳhud jo donoṅ ṭāṅgoṅ se maflūj thā yarūshalam meṅ rihāishpazīr huā aur rozānā dāūd bādshāh ke sāth khānā khātā rahā. us kā ek chhoṭā beṭā thā jis kā nām mīkā thā.