Read Roman Urdu Geo 1-salātīn 12 Bible Online

1-salātīn 12 - Roman Urdu Geo bible

1-salātīn 12

¹rahubiām sikam gayā, kyūṅki wahāṅ tamām isrāīlī use bādshāh muqarrar karne ke lie jamā ho gae the.

²yarubiām bin nabāt yih ḳhabar sunte hī misr se jahāṅ us ne sulaimān bādshāh se bhāg kar panāh lī thī isrāīl wāpas āyā.

³isrāīliyoṅ ne use bulāyā tāki us ke sāth sikam jāeṅ. jab pahuṅchā to isrāīl kī pūrī jamā'at yarubiām ke sāth mil kar rahubiām se milne gaī. unhoṅ ne bādshāh se kahā,

⁴“jo jūā āp ke bāp ne ham par ḍāl diyā thā use uṭhānā mushkil thā, aur jo waqt aur paise hameṅ bādshāh kī ḳhidmat meṅ sarf karne the wuh nāqābil-e-bardāsht the. ab donoṅ ko kam kar deṅ. phir ham ḳhushī se āp kī ḳhidmat kareṅge.”

⁵rahubiām ne jawāb diyā, “mujhe tīn din kī muhlat deṅ, phir dubārā mere pās āeṅ.” chunāṅche log chale gae.

⁶phir rahubiām bādshāh ne un buzurgoṅ se mashwarā kiyā jo sulaimān ke jīte jī bādshāh kī ḳhidmat karte rahe the. us ne pūchhā, “āp kā kyā ḳhayāl hai? maiṅ in logoṅ ko kyā jawāb dūṅ?”

⁷buzurgoṅ ne jawāb diyā, “hamārā mashwarā hai ki is waqt un kā ḳhādim ban kar un kī ḳhidmat kareṅ aur unheṅ narm jawāb deṅ. agar āp aisā kareṅ to wuh hameshā āp ke wafādār ḳhādim bane raheṅge.”

⁸lekin rahubiām ne buzurgoṅ kā mashwarā radd karke us kī ḳhidmat meṅ hāzir un jawānoṅ se mashwarā kiyā jo us ke sāth parwān chaṛhe the.

⁹us ne pūchhā, “maiṅ is qaum ko kyā jawāb dūṅ? yih taqāzā kar rahe haiṅ ki maiṅ wuh jūā halkā kar dūṅ jo mere bāp ne un par ḍāl diyā.”

¹⁰jo jawān us ke sāth parwān chaṛhe the unhoṅ ne kahā, “achchhā, yih log taqāzā kar rahe haiṅ ki āp ke bāp kā jūā halkā kiyā jāe? unheṅ batā denā, ‘merī chhoṭī unglī mere bāp kī kamr se zyādā moṭī hai!

¹¹beshak jo jūā us ne āp par ḍāl diyā use uṭhānā mushkil thā, lekin merā jūā aur bhī bhārī hogā. jahāṅ mere bāp ne āp ko koṛe lagāe wahāṅ maiṅ āp kī bichchhū'oṅ se tādīb karūṅga’!”

¹²tīn din ke bād jab yarubiām tamām isrāīliyoṅ ke sāth rahubiām kā faislā sunane ke lie wāpas āyā

¹³to bādshāh ne unheṅ saḳht jawāb diyā. buzurgoṅ kā mashwarā radd karke

¹⁴us ne unheṅ jawānoṅ kā jawāb diyā, “beshak jo jūā mere bāp ne āp par ḍāl diyā use uṭhānā mushkil thā, lekin merā jūā aur bhī bhārī hogā. jahāṅ mere bāp ne āp ko koṛe lagāe wahāṅ maiṅ āp kī bichchhū'oṅ se tādīb karūṅga!”

¹⁵yūṅ rab kī marzī pūrī huī ki rahubiām logoṅ kī bāt nahīṅ mānegā. kyūṅki ab rab kī wuh peshgoī pūrī huī jo sailā ke nabī aḳhiyāh ne yarubiām bin nabāt ko batāī thī.

¹⁶jab isrāīliyoṅ ne dekhā ki bādshāh hamārī bāt sunane ke lie tayyār nahīṅ hai to unhoṅ ne us se kahā, “na hameṅ dāūd se mīrās meṅ kuchh milegā, na yassī ke beṭe se kuchh milne kī ummīd hai. ai isrāīl, sab apne apne ghar wāpas chaleṅ! ai dāūd, ab apnā ghar ḳhud saṅbhāl lo!” yih kah kar wuh sab chale gae.

¹⁷sirf yahūdāh ke qabīle ke shahroṅ meṅ rahne wāle isrāīlī rahubiām ke taht rahe.

¹⁸phir rahubiām bādshāh ne begāriyoṅ par muqarrar afsar adūnīrām ko shimālī qabīloṅ ke pās bhej diyā, lekin use dekh kar tamām logoṅ ne use sangsār kiyā. tab rahubiām jaldī se apne rath par sawār huā aur bhāg kar yarūshalam pahuṅch gayā.

¹⁹yūṅ isrāīl ke shimālī qabīle dāūd ke shāhī gharāne se alag ho gae aur āj tak us kī hukūmat nahīṅ mānte.

²⁰jab ḳhabar shimālī isrāīl meṅ phailī ki yarubiām misr se wāpas ā gayā hai to logoṅ ne qaumī ijlās mun'aqid karke use bulāyā aur wahāṅ use apnā bādshāh banā liyā. sirf yahūdāh kā qabīlā rahubiām aur us ke gharāne kā wafādār rahā.

²¹jab rahubiām yarūshalam pahuṅchā to us ne yahūdāh aur binyamīn ke qabīloṅ ke chīdā chīdā faujiyoṅ ko isrāīl se jang karne ke lie bulāyā. 1,80,000 mard jamā hue tāki rahubiām bin sulaimān ke lie isrāīl par dubārā qābū pāeṅ.

²²lekin ain us waqt mard-e-ḳhudā samāyāh ko allāh kī taraf se paiġhām milā,

²³“yahūdāh ke bādshāh rahubiām bin sulaimān, yahūdāh aur binyamīn ke tamām afrād aur bāqī logoṅ ko ittilā de,

²⁴‘rab farmātā hai ki apne isrāīlī bhāiyoṅ se jang mat karnā. har ek apne apne ghar wāpas chalā jāe, kyūṅki jo kuchh huā hai wuh mere hukm par huā hai’.” tab wuh rab kī sun kar apne apne ghar wāpas chale gae.

²⁵yarubiām ifrāīm ke pahāṛī ilāqe ke shahr sikam ko mazbūt karke wahāṅ ābād huā. bād meṅ us ne fanūel shahr kī bhī qilābandī kī aur wahāṅ muntaqil huā.

²⁶lekin dil meṅ andeshā rahā ki kahīṅ isrāīl dubārā dāūd ke gharāne ke hāth meṅ na ā jāe.

²⁷us ne sochā, “log bāqāidagī se yarūshalam āte jāte haiṅ tāki wahāṅ rab ke ghar meṅ apnī qurbāniyāṅ pesh kareṅ. agar yih silsilā toṛā na jāe to āhistā āhistā un ke dil dubārā yahūdāh ke bādshāh rahubiām kī taraf māil ho jāeṅge. āḳhirkār wuh mujhe qatl karke rahubiām ko apnā bādshāh banā leṅge.”

²⁸apne afsaroṅ ke mashware par us ne sone ke do bachhṛe banwāe. logoṅ ke sāmne us ne elān kiyā, “har qurbānī ke lie yarūshalam jānā mushkil hai! ai isrāīl dekh, yih tere dewatā haiṅ jo tujhe misr se nikāl lāe.”

²⁹ek but us ne junūbī shahr bait-el meṅ khaṛā kiyā aur dūsrā shimālī shahr dān meṅ.

³⁰yūṅ yarubiām ne isrāīliyoṅ ko gunāh karne par uksāyā. log dān tak safar kiyā karte the tāki wahāṅ ke but kī pūjā kareṅ.

³¹is ke ilāwā yarubiām ne bahut sī ūṅchī jaghoṅ par mandir banwāe. unheṅ saṅbhālne ke lie us ne aise log muqarrar kie jo lāwī ke qabīle ke nahīṅ balki ām log the.

³²us ne ek naī īd bhī rāij kī jo yahūdāh meṅ manāne wālī jhoṅpṛiyoṅ kī īd kī mānind thī. yih īd āṭhweṅ māh [2] ke pandrahweṅ din manāī jātī thī. bait-el meṅ us ne ḳhud qurbāngāh par jā kar apne banwāe hue bachhṛoṅ ko qurbāniyāṅ pesh kīṅ, aur wahīṅ us ne apne un mandiroṅ ke imāmoṅ ko muqarrar kiyā jo us ne ūṅchī jaghoṅ par tāmīr kie the.

³³chunāṅche yarubiām ke muqarrarkardā din yānī āṭhweṅ mahīne ke pandrahweṅ din isrāīliyoṅ ne bait-el meṅ īd manāī. tamām mehmānoṅ ke sāmne yarubiām qurbāngāh par chaṛh gayā tāki qurbāniyāṅ pesh kare.