Read Roman Urdu Geo 1-salātīn 14 Bible Online

1-salātīn 14 - Roman Urdu Geo bible

1-salātīn 14

¹ek din yarubiām kā beṭā abiyāh bahut bīmār huā.

²tab yarubiām ne apnī bīwī se kahā, “jā kar apnā bhes badleṅ tāki koī na pahchāne ki āp merī bīwī haiṅ. phir sailā jāeṅ. wahāṅ aḳhiyāh nabī rahtā hai jis ne mujhe ittilā dī thī ki maiṅ is qaum kā bādshāh ban jāūṅgā.

³us ke pās das roṭiyāṅ, kuchh biskuṭ aur shahd kā martabān le jāeṅ. wuh ādmī āp ko zarūr batā degā ki laṛke ke sāth kyā ho jāegā.”

⁴chunāṅche yarubiām kī bīwī apnā bhes badal kar rawānā huī aur chalte chalte sailā meṅ aḳhiyāh ke ghar pahuṅch gaī. aḳhiyāh umrrasīdā hone ke bāis dekh nahīṅ saktā thā.

⁵lekin rab ne use āgāh kar diyā, “yarubiām kī bīwī tujh se milne ā rahī hai tāki apne bīmār beṭe ke bāre meṅ mālūmāt hāsil kare. lekin wuh apnā bhes badal kar āegī tāki use pahchānā na jāe.” phir rab ne nabī ko batāyā ki use kyā jawāb denā hai.

⁶jab aḳhiyāh ne aurat ke qadmoṅ kī āhaṭ sunī to bolā, “yarubiām kī bīwī, andar āeṅ! rūp bharne kī kyā zarūrat? mujhe āp ko burī ḳhabar pahuṅchānī hai.

⁷jāeṅ, yarubiām ko rab isrāīl ke ḳhudā kī taraf se paiġhām deṅ, ‘maiṅ ne tujhe logoṅ meṅ se chun kar khaṛā kiyā aur apnī qaum isrāīl par bādshāh banā diyā.

⁸maiṅ ne bādshāhī ko dāūd ke gharāne se chhīn kar tujhe de diyā. lekin afsos, tū mere ḳhādim dāūd kī tarah zindagī nahīṅ guzārtā jo mere ahkām ke tābe rah kar pūre dil se merī pairawī kartā rahā aur hameshā wuh kuchh kartā thā jo mujhe pasand thā.

⁹jo tujh se pahle the un kī nisbat tū ne kahīṅ zyādā badī kī, kyūṅki tū ne but ḍhāl kar apne lie dīgar mābūd banāe haiṅ aur yūṅ mujhe taish dilāyā. chūṅki tū ne apnā muṅh mujh se pher liyā

¹⁰is lie maiṅ tere ḳhāndān ko musībat meṅ ḍāl dūṅgā. isrāīl meṅ maiṅ yarubiām ke tamām mardoṅ ko halāk kar dūṅgā, ḳhwāh wuh bachche hoṅ yā bāliġh. jis tarah gobar ko jhāṛū de kar dūr kiyā jātā hai usī tarah yarubiām ke gharāne kā nām-o-nishān miṭ jāegā.

¹¹tum meṅ se jo shahr meṅ mareṅge unheṅ kutte khā jāeṅge, aur jo khule maidān meṅ mareṅge unheṅ parinde chaṭ kar jāeṅge. kyūṅki yih rab kā farmān hai’.”

¹²phir aḳhiyāh ne yarubiām kī bīwī se kahā, “āp apne ghar wāpas chalī jāeṅ. jūṅ hī āp shahr meṅ dāḳhil hoṅgī laṛkā faut ho jāegā.

¹³pūrā isrāīl us kā mātam karke use dafn karegā. wuh āp ke ḳhāndān kā wāhid fard hogā jise sahīh taur se dafnāyā jāegā. kyūṅki rab isrāīl ke ḳhudā ne sirf usī meṅ kuchh pāyā jo use pasand thā.

¹⁴rab isrāīl par ek bādshāh muqarrar karegā jo yarubiām ke ḳhāndān ko halāk karegā. āj hī se yih silsilā shurū ho jāegā.

¹⁵rab isrāīl ko bhī sazā degā, kyūṅki wuh yasīrat dewī ke khambe banā kar un kī pūjā karte haiṅ. chūṅki wuh rab ko taish dilāte rahe haiṅ, is lie wuh unheṅ māregā, aur wuh pānī meṅ sarkanḍe kī tarah hil jāeṅge. rab unheṅ is achchhe mulk se ukhāṛ kar daryā-e-furāt ke pār muntashir kar degā.

¹⁶yūṅ wuh isrāīl ko un gunāhoṅ ke bāis tark karegā jo yarubiām ne kie aur isrāīl ko karne par uksāyā hai.”

¹⁷yarubiām kī bīwī tirzā meṅ apne ghar wāpas chalī gaī. aur ghar ke darwāze meṅ dāḳhil hote hī us kā beṭā mar gayā.

¹⁸tamām isrāīl ne use dafnā kar us kā mātam kiyā. sab kuchh waise huā jaise rab ne apne ḳhādim aḳhiyāh nabī kī mārifat farmāyā thā.

¹⁹bāqī jo kuchh yarubiām kī zindagī ke bāre meṅ likhā hai wuh ‘shāhān-e-isrāīl kī tārīḳh’ kī kitāb meṅ darj hai. us kitāb meṅ paṛhā jā saktā hai ki wuh kis tarah hukūmat kartā thā aur us ne kaun kaun sī jangeṅ kīṅ.

²⁰yarubiām 22 sāl bādshāh rahā. jab wuh mar kar apne bāpdādā se jā milā to us kā beṭā nadab taḳhtnashīn huā.

²¹yahūdāh meṅ rahubiām bin sulaimān hukūmat kartā thā. us kī māṅ nāmā ammonī thī. 41 sāl kī umr meṅ wuh taḳhtnashīn huā aur 17 sāl bādshāh rahā. us kā dār-ul-hukūmat yarūshalam thā, wuh shahr jise rab ne tamām isrāīlī qabīloṅ meṅ se chun liyā tāki us meṅ apnā nām qāim kare.

²²lekin yahūdāh ke bāshinde bhī aisī harkateṅ karte the jo rab ko nāpasand thīṅ. apne gunāhoṅ se wuh use taish dilāte rahe, kyūṅki un ke yih gunāh un ke bāpdādā ke gunāhoṅ se kahīṅ zyādā sangīn the.

²³unhoṅ ne bhī ūṅchī jaghoṅ par mandir banāe. har ūṅchī pahāṛī par aur har ghane daraḳht ke sāy meṅ unhoṅ ne maḳhsūs patthar yā yasīrat dewī ke khambe khaṛe kie,

²⁴yahāṅ tak ki mandiroṅ meṅ jismfarosh mard aur aurateṅ the. ġharz, unhoṅ ne un qaumoṅ ke tamām ghinaune rasm-o-riwāj apnā lie jin ko rab ne isrāīliyoṅ ke āge āge nikāl diyā thā.

²⁵rahubiām bādshāh kī hukūmat ke pāṅchweṅ sāl meṅ misr ke bādshāh sīsaq ne yarūshalam par hamlā karke

²⁶rab ke ghar aur shāhī mahal ke tamām ḳhazāne lūṭ lie. sone kī wuh ḍhāleṅ bhī chhīn lī gaīṅ jo sulaimān ne banwāī thīṅ.

²⁷in kī jagah rahubiām ne pītal kī ḍhāleṅ banwāīṅ aur unheṅ un muhāfizoṅ ke afsaroṅ ke sapurd kiyā jo shāhī mahal ke darwāze kī pahrādārī karte the.

²⁸jab bhī bādshāh rab ke ghar meṅ jātā tab muhāfiz yih ḍhāleṅ uṭhā kar sāth le jāte. is ke bād wuh unheṅ pahredāroṅ ke kamre meṅ wāpas le jāte the.

²⁹bāqī jo kuchh rahubiām bādshāh kī hukūmat ke daurān huā aur jo kuchh us ne kiyā wuh ‘shāhān-e-yahūdāh kī tārīḳh’ kī kitāb meṅ darj hai.

³⁰donoṅ bādshāhoṅ rahubiām aur yarubiām ke jīte jī un ke darmiyān jang jārī rahī.

³¹jab rahubiām mar kar apne bāpdādā se jā milā to use yarūshalam ke us hisse meṅ jo ‘dāūd kā shahr’ kahlātā hai ḳhāndānī qabr meṅ dafnāyā gayā. us kī māṅ nāmā ammonī thī. phir rahubiām kā beṭā abiyāh taḳhtnashīn huā.