Read Roman Urdu Geo 1-salātīn 15 Bible Online

1-salātīn 15 - Roman Urdu Geo bible

1-salātīn 15

¹abiyāh isrāīl ke bādshāh yarubiām bin nabāt kī hukūmat ke 18weṅ sāl meṅ yahūdāh kā bādshāh banā.

²wuh tīn sāl bādshāh rahā, aur us kā dār-ul-hukūmat yarūshalam thā. us kī māṅ mākā bint abīsalūm thī.

³abiyāh se wuhī gunāh sarzad hue jo us ke bāp ne kie the, aur wuh pūre dil se rab apne ḳhudā kā wafādār na rahā. go wuh is meṅ apne pardādā dāūd se farq thā

⁴to bhī rab us ke ḳhudā ne abiyāh kā yarūshalam meṅ charāġh jalne diyā. dāūd kī ḳhātir us ne use jānashīn atā kiyā aur yarūshalam ko qāim rakhā,

⁵kyūṅki dāūd ne wuh kuchh kiyā thā jo rab ko pasand thā. jīte jī wuh rab ke ahkām ke tābe rahā, siwāe us jurm ke jab us ne ūriyāh hittī ke silsile meṅ ġhalat qadam uṭhāe the.

⁶rahubiām aur yarubiām ke darmiyān kī jang abiyāh kī hukūmat ke daurān bhī jārī rahī.

⁷bāqī jo kuchh abiyāh kī hukūmat ke daurān huā aur jo kuchh us ne kiyā wuh ‘shāhān-e-yahūdāh kī tārīḳh’ kī kitāb meṅ darj hai.

⁸jab wuh mar kar apne bāpdādā se jā milā to use yarūshalam ke us hisse meṅ dafn kiyā gayā jo ‘dāūd kā shahr’ kahlātā hai. phir us kā beṭā āsā taḳhtnashīn huā.

⁹āsā isrāīl ke bādshāh yarubiām ke 20weṅ sāl meṅ yahūdāh kā bādshāh ban gayā.

¹⁰us kī hukūmat kā daurāniyā 41 sāl thā, aur us kā dār-ul-hukūmat yarūshalam thā. māṅ kā nām mākā thā, aur wuh abīsalūm kī beṭī thī.

¹¹apne pardādā dāūd kī tarah āsā bhī wuh kuchh kartā rahā jo rab ko pasand thā.

¹²us ne un jismfarosh mardoṅ aur auratoṅ ko nikāl diyā jo mandiroṅ meṅ nām-nihād ḳhidmat karte the aur un tamām butoṅ ko tabāh kar diyā jo us ke bāpdādā ne banāe the.

¹³aur go us kī māṅ bādshāh kī māṅ hone ke bāis bahut asar-o-rasūḳh rakhtī thī, tāham āsā ne yih uhdā ḳhatm kar diyā jab māṅ ne yasīrat dewī kā ghinaunā khambā banwā liyā. āsā ne yih but kaṭwā kar wādī-e-qidron meṅ jalā diyā.

¹⁴afsos ki us ne ūṅchī jaghoṅ ke mandiroṅ ko dūr na kiyā. to bhī āsā jīte jī pūre dil se rab kā wafādār rahā.

¹⁵sonā-chāṅdī aur bāqī jitnī chīzeṅ us ke bāp aur us ne rab ke lie maḳhsūs kī thīṅ un sab ko wuh rab ke ghar meṅ lāyā.

¹⁶yahūdāh ke bādshāh āsā aur isrāīl ke bādshāh bāshā ke darmiyān zindagī bhar jang jārī rahī.

¹⁷ek din bāshā bādshāh ne yahūdāh par hamlā karke rāmā shahr kī qilābandī kī. maqsad yih thā ki na koī yahūdāh ke mulk meṅ dāḳhil ho sake, na koī wahāṅ se nikal sake.

¹⁸jawāb meṅ āsā ne shām ke bādshāh bin-hasad ke pās wafd bhejā. bin-hasad kā bāp tābrimmon bin hazyūn thā, aur us kā dār-ul-hukūmat damishq thā. āsā ne rab ke ghar aur shāhī mahal ke ḳhazānoṅ kā tamām bachā huā sonā aur chāṅdī wafd ke sapurd karke damishq ke bādshāh ko paiġhām bhejā,

¹⁹“merā āp ke sāth ahd hai jis tarah mere bāp kā āp ke bāp ke sāth ahd thā. guzārish hai ki āp sone-chāṅdī kā yih tohfā qabūl karke isrāīl ke bādshāh bāshā ke sāth apnā ahd mansūḳh kar deṅ tāki wuh mere mulk se nikal jāe.”

²⁰bin-hasad muttafiq huā. us ne apne faujī afsaroṅ ko isrāīl ke shahroṅ par hamlā karne ke lie bhej diyā to unhoṅ ne aiyyūn, dān, abīl-bait-mākā, tamām kinnarat aur naftālī par qabzā kar liyā.

²¹jab bāshā ko is kī ḳhabar milī to wuh rāmā kī qilābandī karne se bāz āyā aur tirzā wāpas chalā gayā.

²²phir āsā bādshāh ne yahūdāh ke tamām mardoṅ kī bhartī karke unheṅ rāmā bhej diyā tāki wuh un tamām pattharoṅ aur shahtīroṅ ko uṭhā kar le jāeṅ jin se bāshā bādshāh rāmā kī qilābandī karnā chāhtā thā. tamām mardoṅ ko wahāṅ jānā paṛā, ek ko bhī chhuṭṭī na milī. is sāmān se āsā ne binyamīn ke shahr jibā aur misfāh kī qilābandī kī.

²³bāqī jo kuchh āsā kī hukūmat ke daurān huā aur jo kuchh us ne kiyā wuh ‘shāhān-e-yahūdāh kī tārīḳh’ kī kitāb meṅ darj hai. us meṅ us kī kāmyābiyoṅ aur us ke tāmīr kie gae shahroṅ kā zikr hai. buṛhāpe meṅ us ke pāoṅ ko bīmārī lag gaī.

²⁴jab wuh mar kar apne bāpdādā se jā milā to use yarūshalam ke us hisse meṅ jo ‘dāūd kā shahr’ kahlātā hai ḳhāndānī qabr meṅ dafnāyā gayā. phir us kā beṭā yahūsafat us kī jagah taḳhtnashīn huā.

²⁵nadab bin yarubiām yahūdāh ke bādshāh āsā kī hukūmat ke dūsre sāl meṅ isrāīl kā bādshāh banā. us kī hukūmat kā daurāniyā do sāl thā.

²⁶us kā tarz-e-zindagī rab ko pasand nahīṅ thā, kyūṅki wuh apne bāp ke namūne par chaltā rahā. jo badī yarubiām ne isrāīl ko karne par uksāyā thā us se nadab bhī dūr na huā.

²⁷ek din jab nadab isrāīlī fauj ke sāth filistī shahr jibbatūn kā muhāsarā kie hue thā to ishkār ke qabīle ke bāshā bin aḳhiyāh ne us ke ḳhilāf sāzish karke use mār ḍālā aur ḳhud isrāīl kā bādshāh ban gayā. yih yahūdāh ke bādshāh āsā kī hukūmat ke tīsre sāl meṅ huā.

²⁹taḳht par baiṭhte hī bāshā ne yarubiām ke pūre ḳhāndān ko marwā diyā. us ne ek ko bhī zindā na chhoṛā. yūṅ wuh bāt pūrī huī jo rab ne sailā ke rahne wāle apne ḳhādim aḳhiyāh kī mārifat farmāī thī.

³⁰kyūṅki jo gunāh yarubiām ne kie aur isrāīl ko karne par uksāyā thā un se us ne rab isrāīl ke ḳhudā ko taish dilāyā thā.

³¹bāqī jo kuchh nadab kī hukūmat ke daurān huā aur jo kuchh us ne kiyā wuh ‘shāhān-e-isrāīl kī tārīḳh’ kī kitāb meṅ darj hai.

³²bāshā bin aḳhiyāh yahūdāh ke bādshāh āsā kī hukūmat ke tīsre sāl meṅ isrāīl kā bādshāh banā. us kī hukūmat kā daurāniyā 24 sāl thā, aur us kā dār-ul-hukūmat tirzā rahā. us ke aur yahūdāh ke bādshāh āsā ke darmiyān zindagī bhar jang jārī rahī.

³⁴lekin wuh bhī aisā kām kartā thā jo rab ko nāpasand thā, kyūṅki us ne yarubiām ke namūne par chal kar wuh gunāh jārī rakhe jo karne par yarubiām ne isrāīl ko uksāyā thā.