Read Roman Urdu Geo 1-salātīn 16 Bible Online

1-salātīn 16 - Roman Urdu Geo bible

1-salātīn 16

¹ek din rab ne yāhū bin hanānī ko bāshā ke pās bhej kar farmāyā,

²“pahle tū kuchh nahīṅ thā, lekin maiṅ ne tujhe ḳhāk meṅ se uṭhā kar apnī qaum isrāīl kā hukmrān banā diyā. to bhī tū ne yarubiām ke namūne par chal kar merī qaum isrāīl ko gunāh karne par uksāyā aur mujhe taish dilāyā hai.

³is lie maiṅ tere gharāne ke sāth wuhī kuchh karūṅga jo yarubiām bin nabāt ke gharāne ke sāth kiyā thā. bāshā kī pūrī nasl halāk ho jāegī.

⁴ḳhāndān ke jo afrād shahr meṅ mareṅge unheṅ kutte khā jāeṅge, aur jo khule maidān meṅ mareṅge unheṅ parinde chaṭ kar jāeṅge.”

⁵bāqī jo kuchh bāshā kī hukūmat ke daurān huā, jo kuchh us ne kiyā aur jo kāmyābiyāṅ use hāsil huīṅ wuh ‘shāhān-e-isrāīl kī tārīḳh’ kī kitāb meṅ darj haiṅ.

⁶jab wuh mar kar apne bāpdādā se jā milā to use tirzā meṅ dafn kiyā gayā. phir us kā beṭā ailā taḳhtnashīn huā.

⁷rab kī sazā kā jo paiġhām hanānī ke beṭe yāhū nabī ne bāshā aur us ke ḳhāndān ko sunāyā us kī do wujūhāt thīṅ. pahle, bāshā ne yarubiām ke ḳhāndān kī tarah wuh kuchh kiyā jo rab ko nāpasand thā aur use taish dilāyā. dūsre, us ne yarubiām ke pūre ḳhāndān ko halāk kar diyā thā.

⁸ailā bin bāshā yahūdāh ke bādshāh āsā kī hukūmat ke 26weṅ sāl meṅ isrāīl kā bādshāh banā. us kī hukūmat ke do sāl ke daurān us kā dār-ul-hukūmat tirzā rahā.

⁹ailā kā ek afsar banām zimrī thā. zimrī rathoṅ ke ādhe hisse par muqarrar thā. ab wuh bādshāh ke ḳhilāf sāzisheṅ karne lagā. ek din ailā tirzā meṅ mahal ke inchārj arzā ke ghar meṅ baiṭhā mai pī rahā thā. jab nashe meṅ dhut huā

¹⁰to zimrī ne andar jā kar use mār ḍālā. phir wuh ḳhud taḳht par baiṭh gayā. yih yahūdāh ke bādshāh āsā kī hukūmat ke 27weṅ sāl meṅ huā.

¹¹taḳht par baiṭhte hī zimrī ne bāshā ke pūre ḳhāndān ko halāk kar diyā. us ne kisī bhī mard ko zindā na chhoṛā, ḳhwāh wuh dūr kā rishtedār thā, ḳhwāh dost.

¹²yūṅ wuhī kuchh huā jo rab ne yāhū nabī kī mārifat bāshā ko farmāyā thā.

¹³kyūṅki bāshā aur us ke beṭe ailā se sangīn gunāh sarzad hue the, aur sāth sāth unhoṅ ne isrāīl ko bhī yih karne par uksāyā thā. apne bātil dewatāoṅ se unhoṅ ne rab isrāīl ke ḳhudā ko taish dilāyā thā.

¹⁴bāqī jo kuchh ailā kī hukūmat ke daurān huā aur jo kuchh us ne kiyā wuh ‘shāhān-e-isrāīl kī tārīḳh’ kī kitāb meṅ darj hai.

¹⁵zimrī yahūdāh ke bādshāh āsā kī hukūmat ke 27weṅ sāl meṅ isrāīl kā bādshāh banā. lekin tirzā meṅ us kī hukūmat sirf sāt din tak qāim rahī. us waqt isrāīlī fauj filistī shahr jibbatūn kā muhāsarā kar rahī thī.

¹⁶jab fauj meṅ ḳhabar phail gaī ki zimrī ne bādshāh ke ḳhilāf sāzish karke use qatl kiyā hai to tamām isrāīliyoṅ ne lashkargāh meṅ ā kar usī din apne kamānḍar umrī ko bādshāh banā diyā.

¹⁷tab umrī tamām faujiyoṅ ke sāth jibbatūn ko chhoṛ kar tirzā kā muhāsarā karne lagā.

¹⁸jab zimrī ko patā chalā ki shahr dūsroṅ ke qabze meṅ ā gayā hai to us ne mahal ke burj meṅ jā kar use āg lagāī. yūṅ wuh jal kar mar gayā.

¹⁹is tarah use bhī munāsib sazā mil gaī, kyūṅki us ne bhī wuh kuchh kiyā thā jo rab ko nāpasand thā. yarubiām ke namūne par chal kar us ne wuh tamām gunāh kie jo yarubiām ne kie aur isrāīl ko karne par uksāyā thā.

²⁰jo kuchh zimrī kī hukūmat ke daurān huā aur jo sāzisheṅ us ne kīṅ wuh ‘shāhān-e-isrāīl kī tārīḳh’ kī kitāb meṅ darj haiṅ.

²¹zimrī kī maut ke bād isrāīlī do firqoṅ meṅ baṭ gae. ek firqā tibnī bin jīnat ko bādshāh banānā chāhtā thā, dūsrā umrī ko.

²²lekin umrī kā firqā tibnī ke firqe kī nisbat zyādā tāqatwar niklā. chunāṅche tibnī mar gayā aur umrī pūrī qaum par bādshāh ban gayā.

²³umrī yahūdāh ke bādshāh āsā kī hukūmat ke 31weṅ sāl meṅ isrāīl kā bādshāh banā. us kī hukūmat kā daurāniyā 12 sāl thā. pahle chhih sāl dār-ul-hukūmat tirzā rahā.

²⁴is ke bād us ne ek ādmī banām samar ko chāṅdī ke 6,000 sikke de kar us se sāmariyya pahāṛī ḳharīd lī aur wahāṅ apnā nayā dār-ul-hukūmat tāmīr kiyā. pahle mālik samar kī yād meṅ us ne shahr kā nām sāmariyya rakhā.

²⁵lekin umrī ne bhī wuhī kuchh kiyā jo rab ko nāpasand thā, balki us ne māzī ke bādshāhoṅ kī nisbat zyādā badī kī.

²⁶us ne yarubiām bin nabāt ke namūne par chal kar wuh tamām gunāh kie jo yarubiām ne kie aur isrāīl ko karne par uksāyā thā. natīje meṅ isrāīlī rab apne ḳhudā ko apne bātil dewatāoṅ se taish dilāte rahe.

²⁷bāqī jo kuchh umrī kī hukūmat ke daurān huā, jo kuchh us ne kiyā aur jo kāmyābiyāṅ use hāsil huīṅ wuh ‘shāhān-e-isrāīl kī tārīḳh’ kī kitāb meṅ bayān kī gaī haiṅ.

²⁸jab umrī mar kar apne bāpdādā se jā milā to use sāmariyya meṅ dafnāyā gayā. phir us kā beṭā aḳhiyab taḳhtnashīn huā.

²⁹aḳhiyab ban umrī yahūdāh ke bādshāh āsā ke 38weṅ sāl meṅ isrāīl kā bādshāh banā. us kī hukūmat kā daurāniyā 22 sāl thā, aur us kā dār-ul-hukūmat sāmariyya rahā.

³⁰aḳhiyab ne bhī aise kām kie jo rab ko nāpasand the, balki māzī ke bādshāhoṅ kī nisbat us ke gunāh zyādā sangīn the.

³¹yarubiām ke namūne par chalnā us ke lie kāfī nahīṅ thā balki us ne is se baṛh kar saidā ke bādshāh itba'āl kī beṭī īzabil se shādī bhī kī. natīje meṅ wuh us ke dewatā bāl ke sāmne jhuk kar us kī pūjā karne lagā.

³²sāmariyya meṅ us ne bāl kā mandir tāmīr kiyā aur dewatā ke lie qurbāngāh banā kar us meṅ rakh diyā.

³³aḳhiyab ne yasīrat dewī kā but bhī banwā diyā. yūṅ us ne apne ghinaune kāmoṅ se māzī ke tamām isrāīlī bādshāhoṅ kī nisbat kahīṅ zyādā rab isrāīl ke ḳhudā ko taish dilāyā.

³⁴aḳhiyab kī hukūmat ke daurān bait-el ke rahne wāle hī'el ne yarīhū shahr ko nae sire se tāmīr kiyā. jab us kī bunyād rakhī gaī to us kā sab se baṛā beṭā abīrām mar gayā, aur jab us ne shahr ke darwāze lagā die to us ke sab se chhoṭe beṭe sajūb ko apnī jān denī paṛī. yūṅ rab kī wuh bāt pūrī huī jo us ne yashūa bin nūn kī mārifat farmāī thī.