Read Roman Urdu Geo 1-salātīn 18 Bible Online

1-salātīn 18 - Roman Urdu Geo bible

1-salātīn 18

¹bahut din guzar gae. phir kāl ke tīsre sāl meṅ rab ilyās se hamkalām huā, “ab jā kar apne āp ko aḳhiyab ke sāmne pesh kar. maiṅ bārish kā silsilā dubārā shurū kar dūṅgā.”

²chunāṅche ilyās aḳhiyab se milne ke lie isrāīl chalā gayā. us waqt sāmariyya kāl kī saḳht girift meṅ thā,

³is lie aḳhiyab ne mahal ke inchārj abadiyāh ko bulāyā. (abadiyāh rab kā ḳhauf māntā thā.

⁴jab īzabil ne rab ke tamām nabiyoṅ ko qatl karne kī koshish kī thī to abadiyāh ne 100 nabiyoṅ ko do ġhāroṅ meṅ chhupā diyā thā. har ġhār meṅ 50 nabī rahte the, aur abadiyāh unheṅ khāne-pīne kī chīzeṅ pahuṅchātā rahtā thā.)

⁵ab aḳhiyab ne abadiyāh ko hukm diyā, “pūre mulk meṅ se guzar kar tamām chashmoṅ aur wādiyoṅ kā muāinā kareṅ. shāyad kahīṅ kuchh ghās mil jāe jo ham apne ghoṛoṅ aur ḳhachcharoṅ ko khilā kar unheṅ bachā sakeṅ. aisā na ho ki hameṅ khāne kī qillat ke bāis kuchh jānwaroṅ ko zabah karnā paṛe.”

⁶unhoṅ ne muqarrar kiyā ki aḳhiyab kahāṅ jāegā aur abadiyāh kahāṅ, phir donoṅ ek dūsre se alag ho gae.

⁷chalte chalte abadiyāh ko achānak ilyās us kī taraf āte hue nazar āyā. jab abadiyāh ne use pahchānā to wuh muṅh ke bal jhuk kar bolā, “mere āqā ilyās, kyā āp hī haiṅ?”

⁸ilyās ne jawāb diyā, “jī, maiṅ hī hūṅ. jāeṅ, apne mālik ko ittilā deṅ ki ilyās ā gayā hai.”

⁹abadiyāh ne etirāz kiyā, “mujh se kyā ġhaltī huī hai ki āp mujhe aḳhiyab se marwānā chāhte haiṅ?

¹⁰rab āp ke ḳhudā kī qasam, bādshāh ne apne bandoṅ ko har qaum aur mulk meṅ bhej diyā hai tāki āp ko ḍhūnḍ nikāleṅ. aur jahāṅ jawāb milā ki ilyās yahāṅ nahīṅ hai wahāṅ logoṅ ko qasam khānī paṛī ki ham ilyās kā khoj lagāne meṅ nākām rahe haiṅ.

¹¹aur ab āp chāhte haiṅ ki maiṅ bādshāh ke pās jā kar use batāūṅ ki ilyās yahāṅ hai?

¹²ain mumkin hai ki jab maiṅ āp ko chhoṛ kar chalā jāūṅ to rab kā rūh āp ko uṭhā kar kisī nāmālūm jagah le jāe. agar bādshāh merī yih ittilā sun kar yahāṅ āe aur āp ko na pāe to mujhe mār ḍālegā. yād rahe ki maiṅ jawānī se le kar āj tak rab kā ḳhauf māntā āyā hūṅ.

¹³kyā mere āqā tak yih ḳhabar nahīṅ pahuṅchī ki jab īzabil rab ke nabiyoṅ ko qatl kar rahī thī to maiṅ ne kyā kiyā? maiṅ do ġhāroṅ meṅ pachās pachās nabiyoṅ ko chhupā kar unheṅ khāne-pīne kī chīzeṅ pahuṅchātā rahā.

¹⁴aur ab āp chāhte haiṅ ki maiṅ aḳhiyab ke pās jā kar use ittilā dūṅ ki ilyās yahāṅ ā gayā hai? wuh mujhe zarūr mār ḍālegā.”

¹⁵ilyās ne kahā, “rabb-ul-afwāj kī hayāt kī qasam jis kī ḳhidmat maiṅ kartā hūṅ, āj maiṅ apne āp ko zarūr bādshāh ko pesh karūṅga.”

¹⁶tab abadiyāh chalā gayā aur bādshāh ko ilyās kī ḳhabar pahuṅchāī. yih sun kar aḳhiyab ilyās se milne ke lie āyā.

¹⁷ilyās ko deḳhte hī aḳhiyab bolā, “ai isrāīl ko musībat meṅ ḍālne wāle, kyā āp wāpas ā gae haiṅ?”

¹⁸ilyās ne etirāz kiyā, “maiṅ to isrāīl ke lie musībat kā bāis nahīṅ banā balki āp aur āp ke bāp kā gharānā. āp rab ke ahkām chhoṛ kar bāl ke butoṅ ke pīchhe lag gae haiṅ.

¹⁹ab maiṅ āp ko chaileṅj detā hūṅ, tamām isrāīl ko bulā kar karmil pahāṛ par jamā kareṅ. sāth sāth bāl dewatā ke 450 nabiyoṅ ko aur īzabil kī mez par sharīk hone wāle yasīrat dewī ke 400 nabiyoṅ ko bhī bulāeṅ.”

²⁰aḳhiyab mān gayā. us ne tamām isrāīliyoṅ aur nabiyoṅ ko bulāyā. jab wuh karmil pahāṛ par jamā ho gae

²¹to ilyās un ke sāmne jā khaṛā huā aur kahā, “āp kab tak kabhī is taraf, kabhī us taraf langaṛāte raheṅge? [3] agar rab ḳhudā hai to sirf usī kī pairawī kareṅ, lekin agar bāl wāhid ḳhudā hai to usī ke pīchhe lag jāeṅ.” log ḳhāmosh rahe.

²²ilyās ne bāt jārī rakhī, “rab ke nabiyoṅ meṅ se sirf maiṅ hī bāqī rah gayā hūṅ. dūsrī taraf bāl dewatā ke yih 450 nabī khaṛe haiṅ.

²³ab do bail le āeṅ. bāl ke nabī ek ko pasand kareṅ aur phir use ṭukṛe ṭukṛe karke apnī qurbāngāh kī lakaṛiyoṅ par rakh deṅ. lekin wuh lakaṛiyoṅ ko āg na lagāeṅ. maiṅ dūsre bail ko tayyār karke apnī qurbāngāh kī lakaṛiyoṅ par rakh dūṅgā. lekin maiṅ bhī unheṅ āg nahīṅ lagāūṅgā.

²⁴phir āp apne dewatā kā nām pukāreṅ jabki maiṅ rab kā nām pukārūṅga. jo mābūd qurbānī ko jalā kar jawāb degā wuhī ḳhudā hai.” tamām log bole, “āp ṭhīk kahte haiṅ.”

²⁵phir ilyās ne bāl ke nabiyoṅ se kahā, “shurū kareṅ, kyūṅki āp bahut haiṅ. ek bail ko chun kar use tayyār kareṅ. lekin use āg mat lagānā balki apne dewatā kā nām pukāreṅ tāki wuh āg bhej de.”

²⁶unhoṅ ne bailoṅ meṅ se ek ko chun kar use tayyār kiyā, phir bāl kā nām pukārne lage. subh se le kar dopahar tak wuh musalsal chīḳhte chillāte rahe, “ai bāl, hamārī sun!” sāth sāth wuh us qurbāngāh ke irdgird nāchte rahe [4] jo unhoṅ ne banāī thī. lekin na koī āwāz sunāī dī, na kisī ne jawāb diyā.

²⁷dopahar ke waqt ilyās un kā mazāq uṛāne lagā, “zyādā ūṅchī āwāz se boleṅ! shāyad wuh sochoṅ meṅ ġharq ho yā apnī hājat rafā karne ke lie ek taraf gayā ho. yih bhī ho saktā hai ki wuh kahīṅ safar kar rahā ho. yā shāyad wuh gahrī nīnd so gayā ho aur use jagāne kī zarūrat hai.”

²⁸tab wuh mazīd ūṅchī āwāz se chīḳhne-chillāne lage. māmūl ke mutābiq wuh chhuriyoṅ aur nezoṅ se apne āp ko zaḳhmī karne lage, yahāṅ tak ki ḳhūn bahne lagā.

²⁹dopahar guzar gaī, aur wuh shām ke us waqt tak wajd meṅ rahe jab ġhallā kī nazar pesh kī jātī hai. lekin koī āwāz na sunāī dī. na kisī ne jawāb diyā, na un ke tamāshe par tawajjuh dī.

³⁰phir ilyās isrāīliyoṅ se muḳhātib huā, “āeṅ, sab yahāṅ mere pās āeṅ!” sab qarīb āe. wahāṅ rab kī ek qurbāngāh thī jo girāī gaī thī. ab ilyās ne wuh dubārā khaṛī kī.

³¹us ne yāqūb se nikle har qabīle ke lie ek ek patthar chun liyā. (bād meṅ rab ne yāqūb kā nām isrāīl rakhā thā).

³²in bārah pattharoṅ ko le kar ilyās ne rab ke nām kī tāzīm meṅ qurbāngāh banāī. is ke irdgird us ne itnā chauṛā gaṛhā khodā ki us meṅ taqrīban 15 liṭar pānī samā saktā thā.

³³phir us ne qurbāngāh par lakaṛiyoṅ kā ḍher lagāyā aur bail ko ṭukṛe ṭukṛe karke lakaṛiyoṅ par rakh diyā. is ke bād us ne hukm diyā, “chār ghaṛe pānī se bhar kar qurbānī aur lakaṛiyoṅ par unḍel deṅ!”

³⁴jab unhoṅ ne aisā kiyā to us ne dubārā aisā karne kā hukm diyā, phir tīsrī bār.

³⁵āḳhirkār itnā pānī thā ki us ne chāroṅ taraf qurbāngāh se ṭapak kar gaṛhe ko bhar diyā.

³⁶shām ke waqt jab ġhallā kī nazar pesh kī jātī hai ilyās ne qurbāngāh ke pās jā kar buland āwāz se duā kī, “ai rab, ai ibrāhīm, is'hāq aur isrāīl ke ḳhudā, āj logoṅ par zāhir kar ki isrāīl meṅ tū hī ḳhudā hai aur ki maiṅ terā ḳhādim hūṅ. sābit kar ki maiṅ ne yih sab kuchh tere hukm ke mutābiq kiyā hai.

³⁷ai rab, merī duā sun! merī sun tāki yih log jān leṅ ki tū, ai rab, ḳhudā hai aur ki tū hī un ke diloṅ ko dubārā apnī taraf māil kar rahā hai.”

³⁸achānak āsmān se rab kī āg nāzil huī. āg ne na sirf qurbānī aur lakaṛī ko bhasm kar diyā balki qurbāngāh ke pattharoṅ aur us ke nīche kī miṭṭī ko bhī. gaṛhe meṅ pānī bhī ek dam sūkh gayā.

³⁹yih dekh kar isrāīlī aundhe muṅh gir kar pukārne lage, “rab hī ḳhudā hai! rab hī ḳhudā hai!”

⁴⁰phir ilyās ne unheṅ hukm diyā, “bāl ke nabiyoṅ ko pakaṛ leṅ. ek bhī bachne na pāe!” logoṅ ne unheṅ pakaṛ liyā to ilyās unheṅ nīche wādī-e-qaison meṅ le gayā aur wahāṅ sab ko maut ke ghāṭ utār diyā.

⁴¹phir ilyās ne aḳhiyab se kahā, “ab jā kar kuchh khāeṅ aur pieṅ, kyūṅki mūslādhār bārish kā shor sunāī de rahā hai.”

⁴²chunāṅche aḳhiyab khāne-pīne ke lie chalā gayā jabki ilyās karmil pahāṛ kī choṭī par chaṛh gayā. wahāṅ us ne jhuk kar apne sar ko donoṅ ghuṭnoṅ ke bīch meṅ chhupā liyā.

⁴³apne naukar ko us ne hukm diyā, “jāo, samundar kī taraf dekho.” naukar gayā aur samundar kī taraf dekhā, phir wāpas ā kar ilyās ko ittilā dī, “kuchh bhī nazar nahīṅ ātā.” lekin ilyās ne use dubārā deḳhne ke lie bhej diyā. is dafā bhī kuchh mālūm na ho sakā. sāt bār ilyās ne naukar ko deḳhne ke lie bhejā.

⁴⁴āḳhirkār jab naukar sātwīṅ dafā gayā to us ne wāpas ā kar ittilā dī, “ek chhoṭā sā bādal samundar meṅ se nikal kar ūpar chaṛh rahā hai. wuh ādmī ke hāth ke barābar hai.” tab ilyās ne hukm diyā, “jāo, aḳhiyab ko ittilā do, ‘ghoṛoṅ ko fauran rath meṅ jot kar ghar chale jāeṅ, warnā bārish āp ko rok legī’.”

⁴⁵naukar ittilā dene chalā gayā to jald hī āṅdhī āī, āsmān par kāle kāle bādal chhā gae aur mūslādhār bārish barasne lagī. aḳhiyab jaldī se rath par sawār ho kar yazrael ke lie rawānā ho gayā.

⁴⁶us waqt rab ne ilyās ko ḳhās tāqat dī. safar ke lie kamarbastā ho kar wuh aḳhiyab ke rath ke āge āge dauṛ kar us se pahle yazrael pahuṅch gayā.