Read Roman Urdu Geo 1-salātīn 19 Bible Online

1-salātīn 19 - Roman Urdu Geo bible

1-salātīn 19

¹aḳhiyab ne īzabil ko sab kuchh sunāyā jo ilyās ne kahā thā, yih bhī ki us ne bāl ke nabiyoṅ ko kis tarah talwār se mār diyā thā.

²tab īzabil ne qāsid ko ilyās ke pās bhej kar use ittilā dī, “dewatā mujhe saḳht sazā deṅ agar maiṅ kal is waqt tak āp ko un nabiyoṅ kī sī sazā na dūṅ.”

³ilyās saḳht ḍar gayā aur apnī jān bachāne ke lie bhāg gayā. chalte chalte wuh yahūdāh ke shahr bair-sabā tak pahuṅch gayā. wahāṅ wuh apne naukar ko chhoṛ kar

⁴āge registān meṅ jā niklā. ek din ke safar ke bād wuh sīṅk kī jhāṛī ke pās pahuṅch gayā aur us ke sāy meṅ baiṭh kar duā karne lagā, “ai rab, mujhe marne de. bas ab kāfī hai. merī jān le le, kyūṅki maiṅ apne bāpdādā se behtar nahīṅ hūṅ.”

⁵phir wuh jhāṛī ke sāy meṅ leṭ kar so gayā. achānak ek farishte ne use chhū kar kahā, “uṭh, khānā khā le!”

⁶jab us ne apnī āṅkheṅ kholīṅ to dekhā ki sirhāne ke qarīb koeloṅ par banāī gaī roṭī aur pānī kī surāhī paṛī hai. us ne roṭī khāī, pānī piyā aur dubārā so gayā.

⁷lekin rab kā farishtā ek bār phir āyā aur use hāth lagā kar kahā, “uṭh, khānā khā le, warnā āge kā lambā safar tere bas kī bāt nahīṅ hogī.”

⁸tab ilyās ne uṭh kar dubārā khānā khāyā aur pānī piyā. is ḳhurāk ne use itnī taqwiyat dī ki wuh chālīs din aur chālīs rāt safar karte karte allāh ke pahāṛ horib yānī sīnā tak pahuṅch gayā.

⁹wahāṅ wuh rāt guzārne ke lie ek ġhār meṅ chalā gayā. ġhār meṅ rab us se hamkalām huā. us ne pūchhā, “ilyās, tū yahāṅ kyā kar rahā hai?”

¹⁰ilyās ne jawāb diyā, “maiṅ ne rab, āsmānī lashkaroṅ ke ḳhudā kī ḳhidmat karne kī sirtoṛ koshish kī hai, kyūṅki isrāīliyoṅ ne tere ahd ko tark kar diyā hai. unhoṅ ne terī qurbāngāhoṅ ko girā kar tere nabiyoṅ ko talwār se qatl kar diyā hai. maiṅ akelā hī bachā hūṅ, aur wuh mujhe bhī mār ḍālne ke darpai haiṅ.”

¹¹jawāb meṅ rab ne farmāyā, “ġhār se nikal kar pahāṛ par rab ke sāmne khaṛā ho jā!” phir rab wahāṅ se guzarā. us ke āge āge baṛī aur zabardast āṅdhī āī jis ne pahāṛoṅ ko chīr kar chaṭānoṅ ko ṭukṛe ṭukṛe kar diyā. lekin rab āṅdhī meṅ nahīṅ thā.

¹²is ke bād zalzalā āyā, lekin rab zalzale meṅ nahīṅ thā.

¹³zalzale ke bād bhaṛaktī huī āg wahāṅ se guzarī, lekin rab āg meṅ bhī nahīṅ thā. phir narm hawā kī dhīmī dhīmī āwāz sunāī dī. yih āwāz sun kar ilyās ne apne chehre ko chādar se ḍhāṅp liyā aur nikal kar ġhār ke muṅh par khaṛā ho gayā. ek āwāz us se muḳhātib huī, “ilyās, tū yahāṅ kyā kar rahā hai?”

¹⁴ilyās ne jawāb diyā, “maiṅ ne rab, āsmānī lashkaroṅ ke ḳhudā kī ḳhidmat karne kī sirtoṛ koshish kī hai, kyūṅki isrāīliyoṅ ne tere ahd ko tark kar diyā hai. unhoṅ ne terī qurbāngāhoṅ ko girā kar tere nabiyoṅ ko talwār se qatl kar diyā hai. maiṅ akelā hī bachā hūṅ, aur wuh mujhe bhī mār ḍālne ke darpai haiṅ.”

¹⁵rab ne jawāb meṅ kahā, “registān meṅ us rāste se ho kar wāpas jā jis ne tujhe yahāṅ pahuṅchāyā hai. phir damishq chalā jā. wahāṅ hazāel ko tel se masah karke shām kā bādshāh qarār de.

¹⁶isī tarah yāhū bin nimsī ko masah karke isrāīl kā bādshāh qarār de aur abīl-mahūlā ke rahne wāle ilīshā bin sāfat ko masah karke apnā jānashīn muqarrar kar.

¹⁷jo hazāel kī talwār se bach jāegā use yāhū mār degā, aur jo yāhū kī talwār se bach jāegā use ilīshā mār degā.

¹⁸lekin maiṅ ne apne lie isrāīl meṅ 7,000 afrād ko bachā liyā hai, un tamām logoṅ ko jo ab tak na bāl dewatā ke sāmne jhuke, na us ke but ko bosā diyā hai.”

¹⁹ilyās wahāṅ se chalā gayā. isrāīl meṅ wāpas ā kar use ilīshā bin sāfat milā jo bailoṅ kī bārah joṛiyoṅ kī madad se hal chalā rahā thā. ḳhud wuh bārhwīṅ joṛī ke sāth chal rahā thā. ilyās ne us ke pās ā kar apnī chādar us ke kandhoṅ par ḍāl dī aur ruke baġhair āge nikal gayā.

²⁰ilīshā fauran apne bailoṅ ko chhoṛ kar ilyās ke pīchhe bhāgā. us ne kahā, “pahle mujhe apne māṅ-bāp ko bosā de kar ḳhairbād kahne dījie. phir maiṅ āp ke pīchhe ho lūṅgā.” ilyās ne jawāb diyā, “chaleṅ, wāpas jāeṅ. lekin wuh kuchh yād rahe jo maiṅ ne āp ke sāth kiyā hai.”

²¹tab ilīshā wāpas chalā gayā. bailoṅ kī ek joṛī ko le kar us ne donoṅ ko zabah kiyā. hal chalāne kā sāmān us ne gosht pakāne ke lie jalā diyā. jab gosht tayyār thā to us ne use logoṅ meṅ taqsīm karke unheṅ khilā diyā. is ke bād ilīshā ilyās ke pīchhe ho kar us kī ḳhidmat karne lagā.