Read Roman Urdu Geo 1-salātīn 21 Bible Online

1-salātīn 21 - Roman Urdu Geo bible

1-salātīn 21

¹is ke bād ek aur qābil-e-zikr bāt huī. yazrael meṅ sāmariyya ke bādshāh aḳhiyab kā ek mahal thā. mahal kī zamīn ke sāth sāth angūr kā bāġh thā. mālik kā nām nabot thā.

²ek din aḳhiyab ne nabot se bāt kī, “angūr kā āp kā bāġh mere mahal ke qarīb hī hai. use mujhe de deṅ, kyūṅki maiṅ us meṅ sabziyāṅ lagānā chāhtā hūṅ. muāwaze meṅ maiṅ āp ko us se achchhā angūr kā bāġh de dūṅgā. lekin agar āp paise ko tarjīh deṅ to āp ko us kī pūrī raqm adā kar dūṅgā.”

³lekin nabot ne jawāb diyā, “allāh na kare ki maiṅ āp ko wuh maurūsī zamīn dūṅ jo mere bāpdādā ne mere sapurd kī hai!”

⁴aḳhiyab baṛe ġhusse meṅ apne ghar wāpas chalā gayā. wuh bezār thā ki nabot apne bāpdādā kī maurūsī zamīn bechnā nahīṅ chāhtā. wuh palang par leṭ gayā aur apnā muṅh dīwār kī taraf karke khānā khāne se inkār kiyā.

⁵us kī bīwī īzabil us ke pās āī aur pūchhne lagī, “kyā bāt hai? āp kyūṅ itne bezār haiṅ ki khānā bhī nahīṅ khānā chāhte?”

⁶aḳhiyab ne jawāb diyā, “yazrael kā rahne wālā nabot mujhe angūr kā bāġh nahīṅ denā chāhtā. go maiṅ use paise denā chāhtā thā balki use is kī jagah koī aur bāġh dene ke lie tayyār thā to bhī wuh bazid rahā.”

⁷īzabil bolī, “kyā āp isrāīl ke bādshāh haiṅ ki nahīṅ? ab uṭheṅ! khāeṅ, pieṅ aur apnā dil bahlāeṅ. maiṅ hī āp ko nabot yazraelī kā angūr kā bāġh dilā dūṅgī.”

⁸us ne aḳhiyab ke nām se ḳhutūt likh kar un par bādshāh kī muhr lagāī aur unheṅ nabot ke shahr ke buzurgoṅ aur shurafā ko bhej diyā.

⁹ḳhatoṅ meṅ zail kī ḳhabar likhī thī, “shahr meṅ elān kareṅ ki ek din kā rozā rakhā jāe. jab log us din jamā ho jāeṅge to nabot ko logoṅ ke sāmne izzat kī kursī par biṭhā deṅ.

¹⁰lekin us ke muqābil do badmāshoṅ ko biṭhā denā. ijtimā ke daurān yih ādmī sab ke sāmne nabot par ilzām lagāeṅ, ‘is shaḳhs ne allāh aur bādshāh par lānat bhejī hai! ham is ke gawāh haiṅ.’ phir use shahr se bāhar le jā kar sangsār kareṅ.”

¹¹yazrael ke buzurgoṅ aur shurafā ne aisā hī kiyā.

¹²unhoṅ ne roze ke din kā elān kiyā. jab log muqarrarā din jamā hue to nabot ko logoṅ ke sāmne izzat kī kursī par biṭhā diyā gayā.

¹³phir do badmāsh āe aur us ke muqābil baiṭh gae. ijtimā ke daurān yih ādmī sab ke sāmne nabot par ilzām lagāne lage, “is shaḳhs ne allāh aur bādshāh par lānat bhejī hai! ham is ke gawāh haiṅ.” tab nabot ko shahr se bāhar le jā kar sangsār kar diyā gayā.

¹⁴phir shahr ke buzurgoṅ ne īzabil ko ittilā dī, “nabot mar gayā hai, use sangsār kiyā gayā hai.”

¹⁵yih ḳhabar milte hī īzabil ne aḳhiyab se bāt kī, “jāeṅ, nabot yazraelī ke us bāġh par qabzā kareṅ jo wuh āp ko bechne se inkār kar rahā thā. ab wuh ādmī zindā nahīṅ rahā balki mar gayā hai.”

¹⁶yih sun kar aḳhiyab fauran nabot ke angūr ke bāġh par qabzā karne ke lie rawānā huā.

¹⁷tab rab ilyās tishbī se hamkalām huā,

¹⁸“isrāīl ke bādshāh aḳhiyab se jo sāmariyya meṅ rahtā hai milne jā. is waqt wuh nabot ke angūr ke bāġh meṅ hai, kyūṅki wuh us par qabzā karne ke lie wahāṅ pahuṅchā hai.

¹⁹use batā denā, ‘rab farmātā hai ki tū ne ek ādmī ko bilāwajah qatl karke us kī milkiyat par qabzā kar liyā hai. rab farmātā hai ki jahāṅ kuttoṅ ne nabot kā ḳhūn chāṭā hai wahāṅ wuh terā ḳhūn bhī chāṭeṅge’.”

²⁰jab ilyās aḳhiyab ke pās pahuṅchā to bādshāh bolā, “mere dushman, kyā āp ne mujhe ḍhūnḍ nikālā hai?” ilyās ne jawāb diyā, “jī, maiṅ ne āp ko ḍhūnḍ nikālā hai, kyūṅki āp ne apne āp ko badī ke hāth meṅ bech kar aisā kām kiyā hai jo rab ko nāpasand hai.

²¹ab suneṅ rab kā farmān, ‘maiṅ tujhe yūṅ musībat meṅ ḍāl dūṅgā ki terā nām-o-nishān tak nahīṅ rahegā. maiṅ isrāīl meṅ se tere ḳhāndān ke har mard ko miṭā dūṅgā, ḳhwāh wuh bāliġh ho yā bachchā.

²²tū ne mujhe baṛā taish dilāyā aur isrāīl ko gunāh karne par uksāyā hai. is lie merā tere gharāne ke sāth wuhī sulūk hogā jo maiṅ ne yarubiām bin nabāt aur bāshā bin aḳhiyāh ke sāth kiyā hai.’

²³īzabil par bhī rab kī sazā āegī. rab farmātā hai, ‘kutte yazrael kī fasīl ke pās īzabil ko khā jāeṅge.

²⁴aḳhiyab ke ḳhāndān meṅ se jo shahr meṅ mareṅge unheṅ kutte khā jāeṅge, aur jo khule maidān meṅ mareṅge unheṅ parinde chaṭ kar jāeṅge’.”

²⁵aur yih haqīqat hai ki aḳhiyab jaisā ḳharāb shaḳhs koī nahīṅ thā. kyūṅki īzabil ke uksāne par us ne apne āp ko badī ke hāth meṅ bech kar aisā kām kiyā jo rab ko nāpasand thā.

²⁶sab se ghinaunī bāt yih thī ki wuh butoṅ ke pīchhe lagā rahā, bilkul un amoriyoṅ kī tarah jinheṅ rab ne isrāīl se nikāl diyā thā.

²⁷jab aḳhiyab ne ilyās kī yih bāteṅ sunīṅ to us ne apne kapṛe phāṛ kar ṭāṭ oṛh liyā. rozā rakh kar wuh ġhamgīn hālat meṅ phirtā rahā. ṭāṭ us ne sote waqt bhī na utārā.

²⁸tab rab dubārā ilyās tishbī se hamkalām huā,

²⁹“kyā tū ne ġhaur kiyā hai ki aḳhiyab ne apne āp ko mere sāmne kitnā past kar diyā hai? chūṅki us ne apnī ājizī kā izhār kiyā hai is lie maiṅ us ke jīte jī us ke ḳhāndān ko mazkūrā musībat meṅ nahīṅ ḍālūṅgā balki us waqt jab us kā beṭā taḳht par baiṭhegā.”