Read Roman Urdu Geo 1-salātīn 22 Bible Online

1-salātīn 22 - Roman Urdu Geo bible

1-salātīn 22

¹tīn sāl tak shām aur isrāīl ke darmiyān sulah rahī.

²tīsre sāl yahūdāh kā bādshāh yahūsafat isrāīl ke bādshāh aḳhiyab se milne gayā.

³us waqt isrāīl ke bādshāh ne apne afsaroṅ se bāt kī, “dekheṅ, rāmāt-jiliād hamārā hī shahr hai. to phir ham kyūṅ kuchh nahīṅ kar rahe? hameṅ use shām ke bādshāh ke qabze se chhuṛwānā chāhie.”

⁴us ne yahūsafat se sawāl kiyā, “kyā āp mere sāth rāmāt-jiliād jāeṅge tāki us par qabzā kareṅ?” yahūsafat ne jawāb diyā, “jī zarūr. ham to bhāī haiṅ. merī qaum ko apnī qaum aur mere ghoṛoṅ ko apne ghoṛe samjheṅ!

⁵lekin mehrbānī karke pahle rab kī marzī mālūm kar leṅ.”

⁶isrāīl ke bādshāh ne taqrīban 400 nabiyoṅ ko bulā kar un se pūchhā, “kyā maiṅ rāmāt-jiliād par hamlā karūṅ yā is irāde se bāz rahūṅ?” nabiyoṅ ne jawāb diyā, “jī kareṅ, kyūṅki rab use bādshāh ke hawāle kar degā.”

⁷lekin yahūsafat mutma'in na huā. us ne pūchhā, “kyā yahāṅ rab kā koī nabī nahīṅ jis se ham daryāft kar sakeṅ?”

⁸isrāīl kā bādshāh bolā, “hāṅ, ek to hai jis ke zarī'e ham rab kī marzī mālūm kar sakte haiṅ. lekin maiṅ us se nafrat kartā hūṅ, kyūṅki wuh mere bāre meṅ kabhī bhī achchhī peshgoī nahīṅ kartā. wuh hameshā burī peshgoiyāṅ sunātā hai. us kā nām mīkāyāh bin imlā hai.” yahūsafat ne etirāz kiyā, “bādshāh aisī bāt na kahe!”

⁹tab isrāīl ke bādshāh ne kisī mulāzim ko bulā kar hukm diyā, “mīkāyāh bin imlā ko fauran hamāre pās pahuṅchā denā!”

¹⁰aḳhiyab aur yahūsafat apne shāhī libās pahne hue sāmariyya ke darwāze ke qarīb apne apne taḳht par baiṭhe the. yih aisī khulī jagah thī jahāṅ anāj gāhā jātā thā. tamām 400 nabī wahāṅ un ke sāmne apnī peshgoiyāṅ pesh kar rahe the.

¹¹ek nabī banām sidqiyāh bin kan'ānā ne apne lie lohe ke sīṅg banā kar elān kiyā, “rab farmātā hai ki in sīṅgoṅ se tū shām ke faujiyoṅ ko mār mār kar halāk kar degā.”

¹²dūsre nabī bhī is qism kī peshgoiyāṅ kar rahe the, “rāmāt-jiliād par hamlā kareṅ, kyūṅki āp zarūr kāmyāb ho jāeṅge. rab shahr ko āp ke hawāle kar degā.”

¹³jis mulāzim ko mīkāyāh ko bulāne ke lie bhejā gayā thā us ne rāste meṅ use samjhāyā, “dekheṅ, bāqī tamām nabī mil kar kah rahe haiṅ ki bādshāh ko kāmyābī hāsil hogī. āp bhī aisī hī bāteṅ kareṅ, āp bhī fath kī peshgoī kareṅ!”

¹⁴lekin mīkāyāh ne etirāz kiyā, “rab kī hayāt kī qasam, maiṅ bādshāh ko sirf wuhī kuchh batāūṅgā jo rab mujhe farmāegā.”

¹⁵jab mīkāyāh aḳhiyab ke sāmne khaṛā huā to bādshāh ne pūchhā, “mīkāyāh, kyā ham rāmāt-jiliād par hamlā kareṅ yā maiṅ is irāde se bāz rahūṅ?” mīkāyāh ne jawāb diyā, “us par hamlā kareṅ, kyūṅki rab shahr ko āp ke hawāle karke āp ko kāmyābī baḳhshegā.”

¹⁶bādshāh nārāz huā, “mujhe kitnī dafā āp ko samjhānā paṛegā ki āp qasam khā kar mujhe rab ke nām meṅ sirf wuh kuchh sunāeṅ jo haqīqat hai.”

¹⁷tab mīkāyāh ne jawāb meṅ kahā, “mujhe tamām isrāīl gallābān se mahrūm bheṛ-bakriyoṅ kī tarah pahāṛoṅ par bikhrā huā nazar āyā. phir rab mujh se hamkalām huā, ‘in kā koī mālik nahīṅ hai. har ek salāmatī se apne ghar wāpas chalā jāe’.”

¹⁸isrāīl ke bādshāh ne yahūsafat se kahā, “lo, kyā maiṅ ne āp ko nahīṅ batāyā thā ki yih shaḳhs hameshā mere bāre meṅ burī peshgoiyāṅ kartā hai?”

¹⁹lekin mīkāyāh ne apnī bāt jārī rakhī, “rab kā farmān suneṅ! maiṅ ne rab ko us ke taḳht par baiṭhe dekhā. āsmān kī pūrī fauj us ke dāeṅ aur bāeṅ hāth khaṛī thī.

²⁰rab ne pūchhā, ‘kaun aḳhiyab ko rāmāt-jiliād par hamlā karne par uksāegā tāki wuh wahāṅ jā kar mar jāe?’ ek ne yih mashwarā diyā, dūsre ne wuh.

²¹āḳhirkār ek rūh rab ke sāmne khaṛī huī aur kahne lagī, ‘maiṅ use uksāūṅgī.’

²²rab ne sawāl kiyā, ‘kis tarah?’ rūh ne jawāb diyā, ‘maiṅ nikal kar us ke tamām nabiyoṅ par yūṅ qābū pāūṅgī ki wuh jhūṭ hī boleṅge.’ rab ne farmāyā, ‘tū kāmyāb hogī. jā aur yūṅ hī kar!’

²³ai bādshāh, rab ne āp par āfat lāne kā faislā kar liyā hai, is lie us ne jhūṭī rūh ko āp ke in tamām nabiyoṅ ke muṅh meṅ ḍāl diyā hai.”

²⁴tab sidqiyāh bin kan'ānā ne āge baṛh kar mīkāyāh ke muṅh par thappaṛ mārā aur bolā, “rab kā rūh kis tarah mujh se nikal gayā tāki tujh se bāt kare?”

²⁵mīkāyāh ne jawāb diyā, “jis din āp kabhī is kamre meṅ, kabhī us meṅ khisak kar chhupne kī koshish kareṅge us din āp ko patā chalegā.”

²⁶tab aḳhiyab bādshāh ne hukm diyā, “mīkāyāh ko shahr par muqarrar afsar amūn aur mere beṭe yūās ke pās wāpas bhej do!

²⁷unheṅ batā denā, ‘is ādmī ko jel meṅ ḍāl kar mere sahīh-salāmat wāpas āne tak kam se kam roṭī aur pānī diyā kareṅ’.”

²⁸mīkāyāh bolā, “agar āp sahīh-salāmat wāpas āeṅ to matlab hogā ki rab ne merī mārifat bāt nahīṅ kī.” phir wuh sāth khaṛe logoṅ se muḳhātib huā, “tamām log dhyān deṅ!”

²⁹is ke bād isrāīl kā bādshāh aḳhiyab aur yahūdāh kā bādshāh yahūsafat mil kar rāmāt-jiliād par hamlā karne ke lie rawānā hue.

³⁰jang se pahle aḳhiyab ne yahūsafat se kahā, “maiṅ apnā bhes badal kar maidān-e-jang meṅ jāūṅgā. lekin āp apnā shāhī libās na utāreṅ.” chunāṅche isrāīl kā bādshāh apnā bhes badal kar maidān-e-jang meṅ āyā.

³¹shām ke bādshāh ne rathoṅ par muqarrar apne 32 afsaroṅ ko hukm diyā thā, “sirf aur sirf bādshāh par hamlā kareṅ. kisī aur se mat laṛnā, ḳhwāh wuh chhoṭā ho yā baṛā.”

³²jab laṛāī chhiṛ gaī to rathoṅ ke afsar yahūsafat par ṭūṭ paṛe, kyūṅki unhoṅ ne kahā, “yaqīnan yihī isrāīl kā bādshāh hai!” lekin jab yahūsafat madad ke lie chillā uṭhā

³³to dushmanoṅ ko mālūm huā ki yih aḳhiyab bādshāh nahīṅ hai, aur wuh us kā tāqqub karne se bāz āe.

³⁴lekin kisī ne ḳhās nishānā bāndhe baġhair apnā tīr chalāyā to wuh aḳhiyab ko aisī jagah jā lagā jahāṅ zirābaktar kā joṛ thā. bādshāh ne apne rathbān ko hukm diyā, “rath ko moṛ kar mujhe maidān-e-jang se bāhar le jāo! mujhe choṭ lag gaī hai.”

³⁵lekin chūṅki us pūre din shadīd qism kī laṛāī jārī rahī, is lie bādshāh apne rath meṅ ṭek lagā kar dushman ke muqābil khaṛā rahā. ḳhūn zaḳhm se rath ke farsh par ṭapaktā rahā, aur shām ke waqt aḳhiyab mar gayā.

³⁶jab sūraj ġhurūb hone lagā to isrāīlī fauj meṅ buland āwāz se elān kiyā gayā, “har ek apne shahr aur apne ilāqe meṅ wāpas chalā jāe!”

³⁷bādshāh kī maut ke bād us kī lāsh ko sāmariyya lā kar dafnāyā gayā.

³⁸shāhī rath ko sāmariyya ke ek tālāb ke pās lāyā gayā jahāṅ kasbiyoṅ kī nahāne kī jagah thī. wahāṅ use dhoyā gayā. kutte bhī ā kar ḳhūn ko chāṭne lage. yūṅ rab kā farmān pūrā huā.

³⁹bāqī jo kuchh aḳhiyab kī hukūmat ke daurān huā wuh ‘shāhān-e-isrāīl kī tārīḳh’ kī kitāb meṅ darj hai. us meṅ bādshāh kā tāmīrkardā hāthīdāṅt kā mahal aur wuh shahr bayān kie gae haiṅ jin kī qilābandī us ne kī.

⁴⁰jab wuh mar kar apne bāpdādā se jā milā to us kā beṭā aḳhaziyāh taḳhtnashīn huā.

⁴¹āsā kā beṭā yahūsafat isrāīl ke bādshāh aḳhiyab kī hukūmat ke chauthe sāl meṅ yahūdāh kā bādshāh banā.

⁴²us waqt us kī umr 35 sāl thī. us kā dār-ul-hukūmat yarūshalam rahā, aur us kī hukūmat kā daurāniyā 25 sāl thā. māṅ kā nām azūbā bint silhī thā.

⁴³wuh har kām meṅ apne bāp āsā ke namūne par chaltā aur wuh kuchh kartā rahā jo rab ko pasand thā. lekin us ne bhī ūṅche maqāmoṅ ke mandiroṅ ko ḳhatm na kiyā. aisī jaghoṅ par jānwaroṅ ko qurbān karne aur baḳhūr jalāne kā intizām jārī rahā.

⁴⁴yahūsafat aur isrāīl ke bādshāh ke darmiyān sulah qāim rahī.

⁴⁵bāqī jo kuchh yahūsafat kī hukūmat ke daurān huā wuh ‘shāhān-e-yahūdāh kī tārīḳh’ kī kitāb meṅ darj hai. us kī kāmyābiyāṅ aur jangeṅ sab us meṅ bayān kī gaī haiṅ.

⁴⁶jo jismfarosh mard aur aurateṅ āsā ke zamāne meṅ bach gae the unheṅ yahūsafat ne mulk meṅ se miṭā diyā.

⁴⁷us waqt mulk-e-adom kā bādshāh na thā balki yahūdāh kā ek afsar us par hukmrānī kartā thā.

⁴⁸yahūsafat ne bahrī jahāzoṅ kā beṛā banwāyā tāki wuh tijārat karke ofīr se sonā lāeṅ. lekin wuh kabhī istemāl na hue balki apnī hī bandargāh asyūn-jābar meṅ tabāh ho gae.

⁴⁹tabāh hone se pahle isrāīl ke bādshāh aḳhaziyāh bin aḳhiyab ne yahūsafat se darḳhwāst kī thī ki isrāīl ke kuchh log jahāzoṅ par sāth chaleṅ. lekin yahūsafat ne inkār kiyā thā.

⁵⁰jab yahūsafat mar kar apne bāpdādā se jā milā to use yarūshalam ke hisse meṅ jo ‘dāūd kā shahr’ kahlātā hai ḳhāndānī qabr meṅ dafnāyā gayā. phir us kā beṭā yahūrām taḳhtnashīn huā.

⁵¹aḳhiyab kā beṭā aḳhaziyāh yahūdāh ke bādshāh yahūsafat kī hukūmat ke 17weṅ sāl meṅ isrāīl kā bādshāh banā. wuh do sāl tak isrāīl par hukmrān rahā. sāmariyya us kā dār-ul-hukūmat thā.

⁵²jo kuchh us ne kiyā wuh rab ko nāpasand thā, kyūṅki wuh apne māṅ-bāp aur yarubiām bin nabāt ke namūne par chaltā rahā, usī yarubiām ke namūne par jis ne isrāīl ko gunāh karne par uksāyā thā.

⁵³apne bāp kī tarah bāl dewatā kī ḳhidmat aur pūjā karne se us ne rab, isrāīl ke ḳhudā ko taish dilāyā.