Read Roman Urdu Geo 1-salātīn 4 Bible Online

1-salātīn 4 - Roman Urdu Geo bible

1-salātīn 4

¹ab sulaimān pūre isrāīl par hukūmat kartā thā.

²yih us ke ālā afsar the: imām-e-āzam: azariyāh bin sadoq,

³mīrmunshī: sīsā ke beṭe ilīhūrif aur aḳhiyāh, bādshāh kā mushīr-e-ḳhās: yahūsafat bin aḳhīlūd,

⁴fauj kā kamānḍar: bināyāh bin yahoyadā, imām: sadoq aur abiyātar,

⁵zil'oṅ par muqarrar afsaroṅ kā sardār: azariyāh bin nātan, bādshāh kā qarībī mushīr: imām zabūd bin nātan,

⁶mahal kā inchārj: aḳhīsar, begāriyoṅ kā inchārj: adūnīrām bin abdā

⁷sulaimān ne mulk-e-isrāīl ko bārah zil'oṅ meṅ taqsīm karke har zilā par ek afsar muqarrar kiyā thā. in afsaroṅ kī ek zimmādārī yih thī ki darbār kī zarūriyāt pūrī kareṅ. har afsar ko sāl meṅ ek māh kī zarūriyāt pūrī karnī thīṅ.

⁸darj-e-zail in afsaroṅ aur un ke ilāqoṅ kī fahrist hai. bin hūr: ifrāīm kā pahāṛī ilāqā,

⁹bin diqar: maqas, sālbīm, bait-shams aur ailon-bait-hanān,

¹⁰bin hasad: arubbot, sokā aur hifar kā ilāqā,

¹¹sulaimān kī beṭī tāfat kā shauhar bin abīnadāb: sāhilī shahr dor kā pahāṛī ilāqā,

¹²bānā bin aḳhīlūd: tānak, majiddo aur us bait-shān kā pūrā ilāqā jo zartān ke paṛos meṅ yazrael ke nīche wāqe hai, nīz bait-shān se le kar abīl-mahūlā tak kā pūrā ilāqā bashamūl yuqmiām,

¹³bin jabar: jiliād meṅ rāmāt kā ilāqā bashamūl yāīr bin manassī kī bastiyāṅ, phir basan meṅ arjūb kā ilāqā. is meṅ 60 aise fasīldār shahr shāmil the jin ke darwāzoṅ par pītal ke kunḍe lage the,

¹⁴aḳhīnadāb bin iddū: mahanāim,

¹⁵sulaimān kī beṭī bāsamat kā shauhar aḳhīmāz: naftālī kā qabāilī ilāqā,

¹⁶bānā bin hūsī: āshar kā qabāilī ilāqā aur bālot,

¹⁷yahūsafat bin farūh: ishkār kā qabāilī ilāqā,

¹⁸simaī bin ailā: binyamīn kā qabāilī ilāqā,

¹⁹jabar bin ūrī jiliād kā wuh ilāqā jis par pahle amorī bādshāh sīhon aur basan ke bādshāh oj kī hukūmat thī. is pūre ilāqe par sirf yihī ek afsar muqarrar thā.

²⁰us zamāne meṅ isrāīl aur yahūdāh ke log sāhil kī ret kī mānind beshumār the. logoṅ ko khāne aur pīne kī sab chīzeṅ dastyāb thīṅ, aur wuh ḳhush the.

²¹sulaimān daryā-e-furāt se le kar filistiyoṅ ke ilāqe aur misrī sarhad tak tamām mamālik par hukūmat kartā thā. us ke jīte jī yih mamālik us ke tābe rahe aur use ḳharāj dete the.

²²sulaimān ke darbār kī rozānā zarūriyāt yih thīṅ: taqrīban 5,000 kilogrām bārīk maidā, taqrīban 10,000 kilogrām ām maidā,

²³10 moṭe-tāze bail, charāgāhoṅ meṅ pale hue 20 ām bail, 100 bheṛ-bakriyāṅ, aur is ke ilāwā hiran, ġhazāl, mrig aur muḳhtalif qism ke moṭe-tāze murġh.

²⁴jitne mamālik daryā-e-furāt ke maġhrib meṅ the un sab par sulaimān kī hukūmat thī, yānī tifsah se le kar ġhazzā tak. kisī bhī paṛosī mulk se us kā jhagaṛā nahīṅ thā, balki sab ke sāth sulah thī.

²⁵us ke jīte jī pūre yahūdāh aur isrāīl meṅ sulah-salāmatī rahī. shimāl meṅ dān se le kar junūb meṅ bair-sabā tak har ek salāmatī se angūr kī apnī bel aur anjīr ke apne daraḳht ke sāy meṅ baiṭh saktā thā.

²⁶apne rathoṅ ke ghoṛoṅ ke lie sulaimān ne 4,000 thān banwāe. us ke 12,000 ghoṛe the.

²⁷bārah zil'oṅ par muqarrar afsar bāqāidagī se sulaimān bādshāh aur us ke darbār kī zarūriyāt pūrī karte rahe. har ek ko sāl meṅ ek māh ke lie sab kuchh muhayyā karnā thā. un kī mehnat kī wajah se darbār meṅ koī kamī na huī.

²⁸bādshāh kī hidāyat ke mutābiq wuh rathoṅ ke ghoṛoṅ aur dūsre ghoṛoṅ ke lie darkār jau aur bhūsā barāh-e-rāst un ke thānoṅ tak pahuṅchāte the.

²⁹allāh ne sulaimān ko bahut zyādā hikmat aur samajh atā kī. use sāhil kī ret jaisā wasī ilm hāsil huā.

³⁰us kī hikmat isrāīl ke mashriq meṅ rahne wāle aur misr ke ālimoṅ se kahīṅ zyādā thī.

³¹is lihāz se koī bhī us ke barābar nahīṅ thā. wuh aitān izrāhī aur mahol ke beṭoṅ haimān, kalkūl aur dardā par bhī sabqat le gayā thā. us kī shohrat irdgird ke tamām mamālik meṅ phail gaī.

³²us ne 3,000 kahāwateṅ aur 1,005 gīt likh die.

³³wuh tafsīl se muḳhtalif qism ke paudoṅ ke bāre meṅ bāt kar saktā thā, lubnān meṅ deodār ke baṛe daraḳht se le kar chhoṭe paude zūfā tak jo dīwār kī darāṛoṅ meṅ ugtā hai. wuh mahārat se chaupāiyoṅ, parindoṅ, reṅgne wāle jānwaroṅ aur machhliyoṅ kī tafsīlāt bhī bayān kar saktā thā.

³⁴chunāṅche tamām mamālik ke bādshāhoṅ ne apne safīroṅ ko sulaimān ke pās bhej diyā tāki us kī hikmat suneṅ.