Read Roman Urdu Geo 1-salātīn 9 Bible Online

1-salātīn 9 - Roman Urdu Geo bible

1-salātīn 9

¹chunāṅche sulaimān ne rab ke ghar aur shāhī mahal ko takmīl tak pahuṅchāyā. jo kuchh bhī us ne ṭhān liyā thā wuh pūrā huā.

²us waqt rab dubārā us par zāhir huā, us tarah jis tarah wuh jibaūn meṅ us par zāhir huā thā.

³us ne sulaimān se kahā, “jo duā aur iltijā tū ne mere huzūr kī use maiṅ ne sun kar is imārat ko jo tū ne banāī hai apne lie maḳhsūs-o-muqaddas kar liyā hai. us meṅ maiṅ apnā nām abad tak qāim rakhūṅgā. merī āṅkheṅ aur dil abad tak wahāṅ hāzir raheṅge.

⁴jahāṅ tak terā tālluq hai, apne bāp dāūd kī tarah diyānatdārī aur rāstī se mere huzūr chaltā rah. kyūṅki agar tū mere tamām ahkām aur hidāyāt kī pairawī kartā rahe

⁵to maiṅ terī isrāīl par hukūmat hameshā tak qāim rakhūṅgā. phir merā wuh wādā qāim rahegā jo maiṅ ne tere bāp dāūd se kiyā thā ki isrāīl par terī aulād kī hukūmat hameshā tak qāim rahegī.

⁶lekin ḳhabardār! agar tū yā terī aulād mujh se dūr ho kar mere die gae ahkām aur hidāyāt ke tābe na rahe balki dīgar mābūdoṅ kī taraf rujū karke un kī ḳhidmat aur parastish kare

⁷to maiṅ isrāīl ko us mulk meṅ se miṭā dūṅgā jo maiṅ ne un ko de diyā thā. na sirf yih balki maiṅ is ghar ko bhī radd kar dūṅgā jo maiṅ ne apne nām ke lie maḳhsūs-o-muqaddas kar liyā hai. us waqt isrāīl tamām aqwām meṅ mazāq aur lān-tān kā nishānā ban jāegā.

⁸is shāndār ghar kī burī hālat dekh kar yahāṅ se guzarne wāle tamām logoṅ ke roṅgṭe khaṛe ho jāeṅge, aur wuh apnī hiqārat kā izhār karke pūchheṅge, ‘rab ne is mulk aur is ghar se aisā sulūk kyūṅ kiyā?’

⁹tab log jawāb deṅge, ‘is lie ki go rab un kā ḳhudā un ke bāpdādā ko misr se nikāl kar yahāṅ lāyā to bhī yih log use tark karke dīgar mābūdoṅ se chimaṭ gae haiṅ. chūṅki wuh un kī parastish aur ḳhidmat karne se bāz na āe is lie rab ne unheṅ is sārī musībat meṅ ḍāl diyā hai’.”

¹⁰rab ke ghar aur shāhī mahal ko tāmīr karne meṅ 20 sāl sarf hue the.

¹¹us daurān sūr kā bādshāh hīrām sulaimān ko deodār aur jūnīpar kī utnī lakaṛī aur utnā sonā bhejtā rahā jitnā sulaimān chāhtā thā. jab imārateṅ takmīl tak pahuṅch gaīṅ to sulaimān ne hīrām ko muāwaze meṅ galīl ke 20 shahr de die.

¹²lekin jab hīrām un kā muāinā karne ke lie sūr se galīl āyā to wuh use pasand na āe.

¹³us ne sawāl kiyā, “mere bhāī, yih kaise shahr haiṅ jo āp ne mujhe die haiṅ?” aur us ne us ilāqe kā nām kābūl yānī ‘kuchh bhī nahīṅ’ rakhā. yih nām āj tak rāij hai.

¹⁴bāt yih thī ki hīrām ne isrāīl ke bādshāh ko taqrīban 4,000 kilogrām sonā bhejā thā.

¹⁵sulaimān ne apne tāmīrī kām ke lie begārī lagāe. aise hī logoṅ kī madad se us ne na sirf rab kā ghar, apnā mahal, irdgird ke chabūtare aur yarūshalam kī fasīl banwāī balki tīnoṅ shahr hasūr, majiddo aur jazr ko bhī.

¹⁶jazr shahr par misr ke bādshāh fir'aun ne hamlā karke qabzā kar liyā thā. us ke kan'ānī bāshindoṅ ko qatl karke us ne pūre shahr ko jalā diyā thā. jab sulaimān kī fir'aun kī beṭī se shādī huī to misrī bādshāh ne jahez ke taur par use yih ilāqā de diyā.

¹⁷ab sulaimān ne jazr kā shahr dubārā tāmīr kiyā. is ke ilāwā us ne nashebī bait-haurūn,

¹⁸bālāt aur registān ke shahr tadmūr meṅ bahut sā tāmīrī kām karāyā.

¹⁹sulaimān ne apne godāmoṅ ke lie aur apne rathoṅ aur ghoṛoṅ ko rakhne ke lie bhī shahr banwāe. jo kuchh bhī wuh yarūshalam, lubnān yā apnī saltanat kī kisī aur jagah banwānā chāhtā thā wuh us ne banwāyā.

²⁰jin ādmiyoṅ kī sulaimān ne begār par bhartī kī wuh isrāīlī nahīṅ the balki amorī, hittī, farizzī, hiwwī aur yabūsī yānī kan'ān ke pahle bāshindoṅ kī wuh aulād the jo bāqī rah gae the. mulk par qabzā karte waqt isrāīlī in qaumoṅ ko pūre taur par miṭā na sake, aur āj tak in kī aulād ko isrāīl ke lie begār meṅ kām karnā paṛtā hai.

²²lekin sulaimān ne isrāīliyoṅ meṅ se kisī ko bhī aise kām karne par majbūr na kiyā balki wuh us ke faujī, sarkārī afsar, fauj ke afsar aur rathoṅ ke faujī ban gae. aur unheṅ us ke rathoṅ aur ghoṛoṅ par muqarrar kiyā gayā.

²³sulaimān ke tāmīrī kām par bhī 550 isrāīlī muqarrar the jo zil'oṅ par muqarrar afsaroṅ ke tābe the. yih log tāmīrī kām karne wāloṅ kī nigarānī karte the.

²⁴jab fir'aun kī beṭī yarūshalam ke purāne hisse banām ‘dāūd kā shahr’ se us mahal meṅ muntaqil huī jo sulaimān ne us ke lie tāmīr kiyā thā to wuh irdgird ke chabūtare banwāne lagā.

²⁵sulaimān sāl meṅ tīn bār rab ko bhasm hone wālī aur salāmatī kī qurbāniyāṅ pesh kartā thā. wuh unheṅ rab ke ghar kī us qurbāngāh par chaṛhātā thā jo us ne rab ke lie banwāī thī. sāth sāth wuh baḳhūr bhī jalātā thā. yūṅ us ne rab ke ghar ko takmīl tak pahuṅchāyā.

²⁶is ke ilāwā sulaimān bādshāh ne bahrī jahāzoṅ kā beṛā bhī banwāyā. is kām kā markaz ailāt ke qarīb shahr asyūn-jābar thā. yih bandargāh mulk-e-adom meṅ bahr-e-qulzum ke sāhil par hai.

²⁷hīrām bādshāh ne use tajribākār mallāh bheje tāki wuh sulaimān ke ādmiyoṅ ke sāth mil kar jahāzoṅ ko chalāeṅ.

²⁸unhoṅ ne ofīr tak safar kiyā aur wahāṅ se taqrīban 14,000 kilogrām sonā sulaimān ke pās le āe.