Read Roman Urdu Geo 2-salātīn 1 Bible Online

2-salātīn 1 - Roman Urdu Geo bible

2-salātīn 1

¹aḳhiyab kī maut ke bād moāb kā mulk bāġhī ho kar isrāīl ke tābe na rahā.

²sāmariyya ke shāhī mahal ke bālāḳhāne kī ek dīwār meṅ janglā lagā thā. ek din aḳhaziyāh bādshāh jangle ke sāth lag gayā to wuh ṭūṭ gayā aur bādshāh zamīn par gir kar bahut zaḳhmī huā. us ne qāsidoṅ ko filistī shahr aqrūn bhej kar kahā, “jā kar aqrūn ke dewatā bāl-zabūb se patā kareṅ ki merī sehhat bahāl ho jāegī ki nahīṅ.”

³tab rab ke farishte ne ilyās tishbī ko hukm diyā, “uṭh, sāmariyya ke bādshāh ke qāsidoṅ se milne jā. un se pūchh, ‘āp daryāft karne ke lie aqrūn ke dewatā bāl-zabūb ke pās kyūṅ jā rahe haiṅ? kyā isrāīl meṅ koī ḳhudā nahīṅ hai?

⁴chunāṅche rab farmātā hai ki ai aḳhaziyāh, jis bistar par tū paṛā hai us se tū kabhī nahīṅ uṭhne kā. tū yaqīnan mar jāegā’.” ilyās jā kar qāsidoṅ se milā.

⁵us kā paiġhām sun kar qāsid bādshāh ke pās wāpas gae. us ne pūchhā, “āp itnī jaldī wāpas kyūṅ āe?”

⁶unhoṅ ne jawāb diyā, “ek ādmī ham se milne āyā jis ne hameṅ āp ke pās wāpas bhej kar āp ko yih ḳhabar pahuṅchāne ko kahā, ‘rab farmātā hai ki tū apne bāre meṅ daryāft karne ke lie apne bandoṅ ko aqrūn ke dewatā bāl-zabūb ke pās kyūṅ bhej rahā hai? kyā isrāīl meṅ koī ḳhudā nahīṅ hai? chūṅki tū ne yih kiyā hai is lie jis bistar par tū paṛā hai us se tū kabhī nahīṅ uṭhne kā. tū yaqīnan mar jāegā’.”

⁷aḳhaziyāh ne pūchhā, “yih kis qism kā ādmī thā jis ne āp se mil kar āp ko yih bāt batāī?”

⁸unhoṅ ne jawāb diyā, “us ke lambe bāl the, aur kamr meṅ chamṛe kī peṭī bandhī huī thī.” bādshāh bol uṭhā, “yih to ilyās tishbī thā!”

⁹fauran us ne ek afsar ko 50 faujiyoṅ samet ilyās ke pās bhej diyā. jab faujī ilyās ke pās pahuṅche to wuh ek pahāṛī kī choṭī par baiṭhā thā. afsar bolā, “ai mard-e-ḳhudā, bādshāh kahte haiṅ ki nīche utar āeṅ!”

¹⁰ilyās ne jawāb diyā, “agar maiṅ mard-e-ḳhudā hūṅ to āsmān se āg nāzil ho kar āp aur āp ke 50 faujiyoṅ ko bhasm kar de.” fauran āsmān se āg nāzil huī aur afsar ko us ke logoṅ samet bhasm kar diyā.

¹¹bādshāh ne ek aur afsar ko ilyās ke pās bhej diyā. us ke sāth bhī 50 faujī the. us ke pās pahuṅch kar afsar bolā, “ai mard-e-ḳhudā, bādshāh kahte haiṅ ki fauran utar āeṅ.”

¹²ilyās ne dubārā pukārā, “agar maiṅ mard-e-ḳhudā hūṅ to āsmān se āg nāzil ho kar āp aur āp ke 50 faujiyoṅ ko bhasm kar de.” fauran āsmān se allāh kī āg nāzil huī aur afsar ko us ke 50 faujiyoṅ samet bhasm kar diyā.

¹³phir bādshāh ne tīsrī bār ek afsar ko 50 faujiyoṅ ke sāth ilyās ke pās bhej diyā. lekin yih afsar ilyās ke pās ūpar chaṛh āyā aur us ke sāmne ghuṭne ṭek kar iltimās karne lagā, “ai mard-e-ḳhudā, merī aur apne in 50 ḳhādimoṅ kī jānoṅ kī qadar kareṅ.

¹⁴dekheṅ, āg ne āsmān se nāzil ho kar pahle do afsaroṅ ko un ke ādmiyoṅ samet bhasm kar diyā hai. lekin barāh-e-karm hamāre sāth aisā na kareṅ. merī jān kī qadar kareṅ.”

¹⁵tab rab ke farishte ne ilyās se kahā, “is se mat ḍarnā balki is ke sāth utar jā!” chunāṅche ilyās uṭhā aur afsar ke sāth utar kar bādshāh ke pās gayā.

¹⁶us ne bādshāh se kahā, “rab farmātā hai, ‘tū ne apne qāsidoṅ ko aqrūn ke dewatā bāl-zabūb se daryāft karne ke lie kyūṅ bhejā? kyā isrāīl meṅ koī ḳhudā nahīṅ hai? chūṅki tū ne yih kiyā hai is lie jis bistar par tū paṛā hai us se tū kabhī nahīṅ uṭhne kā. tū yaqīnan mar jāegā’.”

¹⁷waisā hī huā jaisā rab ne ilyās kī mārifat farmāyā thā, aḳhaziyāh mar gayā. chūṅki us kā beṭā nahīṅ thā is lie us kā bhāī yahūrām yahūdāh ke bādshāh yūrām bin yahūsafat kī hukūmat ke dūsre sāl meṅ taḳhtnashīn huā.

¹⁸bāqī jo kuchh aḳhaziyāh kī hukūmat ke daurān huā aur jo kuchh us ne kiyā wuh ‘shāhān-e-isrāīl kī tārīḳh’ kī kitāb meṅ bayān kiyā gayā hai.