Read Roman Urdu Geo 2-salātīn 12 Bible Online

2-salātīn 12 - Roman Urdu Geo bible

2-salātīn 12

¹wuh isrāīl ke bādshāh yāhū kī hukūmat ke sātweṅ sāl meṅ yahūdāh kā bādshāh banā, aur yarūshalam meṅ us kī hukūmat kā daurāniyā 40 sāl thā. us kī māṅ zibiyāh bair-sabā kī rahne wālī thī.

²jab tak yahoyadā us kī rāhnumāī kartā thā yūās wuh kuchh kartā rahā jo rab ko pasand thā.

³to bhī ūṅchī jaghoṅ ke mandir dūr na kie gae. awām māmūl ke mutābiq wahāṅ apnī qurbāniyāṅ pesh karte aur baḳhūr jalāte rahe.

⁴ek din yūās ne imāmoṅ ko hukm diyā, “rab ke lie maḳhsūs jitne bhī paise rab ke ghar meṅ lāe jāte haiṅ un sab ko jamā kareṅ, chāhe wuh mardumshumārī ke ṭaiks [2] yā kisī mannat ke zimn meṅ die gae hoṅ, chāhe razākārānā taur par adā kie gae hoṅ.

⁵yih tamām paise imāmoṅ ke sapurd kie jāeṅ. in se āp ko jahāṅ bhī zarūrat hai rab ke ghar kī darāṛoṅ kī marammat karwānī hai.”

⁶lekin yūās kī hukūmat ke 23weṅ sāl meṅ us ne dekhā ki ab tak rab ke ghar kī darāṛoṅ kī marammat nahīṅ huī.

⁷tab us ne yahoyadā aur bāqī imāmoṅ ko bulā kar pūchhā, “āp rab ke ghar kī marammat kyūṅ nahīṅ karā rahe? ab se āp ko in paisoṅ se āp kī apnī zarūriyāt pūrī karne kī ijāzat nahīṅ balki tamām paise rab ke ghar kī marammat ke lie istemāl karne haiṅ.”

⁸imām mān gae ki ab se ham logoṅ se hadiyā nahīṅ leṅge aur ki is ke badle hameṅ rab ke ghar kī marammat nahīṅ karwānī paṛegī.

⁹phir yahoyadā imām ne ek sandūq le kar us ke ḍhakne meṅ sūrāḳh banā diyā. is sandūq ko us ne qurbāngāh ke pās rakh diyā, us darwāze ke dahnī taraf jis meṅ se parastār rab ke ghar ke sahan meṅ dāḳhil hote the. jab log apne hadiyājāt rab ke ghar meṅ pesh karte to darwāze kī pahrādārī karne wāle imām tamām paisoṅ ko sandūq meṅ ḍāl dete.

¹⁰jab kabhī patā chaltā ki sandūq bhar gayā hai to bādshāh kā mīrmunshī aur imām-e-āzam āte aur tamām paise gin kar thailiyoṅ meṅ ḍāl dete the.

¹¹phir yih gine hue paise un ṭhekedāroṅ ko die jāte jin ke sapurd rab ke ghar kī marammat kā kām kiyā gayā thā. in paisoṅ se wuh marammat karne wāle kārīgaroṅ kī ujrat adā karte the. in meṅ baṛhaī, imārat par kām karne wāle,

¹²rāj aur patthar tarāshne wāle shāmil the. is ke ilāwā unhoṅ ne yih paise darāṛoṅ kī marammat ke lie darkār lakaṛī aur tarāshe hue pattharoṅ ke lie bhī istemāl kie. bāqī jitne aḳhrājāt rab ke ghar ko bahāl karne ke lie zarūrī the wuh sab in paisoṅ se pūre kie gae.

¹³lekin in hadiyājāt se sone yā chāṅdī kī chīzeṅ na banwāī gaīṅ, na chāṅdī ke bāsan, battī katarne ke auzār, chhiṛkāo ke kaṭore yā turam.

¹⁴yih sirf aur sirf ṭhekedāroṅ ko die gae tāki wuh rab ke ghar kī marammat kar sakeṅ.

¹⁵ṭhekedāroṅ se hisāb na liyā gayā jab unheṅ kārīgaroṅ ko paise dene the, kyūṅki wuh qābil-e-etimād the.

¹⁶mahz wuh paise jo qusūr aur gunāh kī qurbāniyoṅ ke lie milte the rab ke ghar kī marammat ke lie istemāl na hue. wuh imāmoṅ kā hissā rahe.

¹⁷un dinoṅ meṅ shām ke bādshāh hazāel ne jāt par hamlā karke us par qabzā kar liyā. is ke bād wuh muṛ kar yarūshalam kī taraf baṛhne lagā tāki us par bhī hamlā kare.

¹⁸yih dekh kar yahūdāh ke bādshāh yūās ne un tamām hadiyājāt ko ikaṭṭhā kiyā jo us ke bāpdādā yahūsafat, yahūrām aur aḳhaziyāh ne rab ke ghar ke lie maḳhsūs kie the. us ne wuh bhī jamā kie jo us ne ḳhud rab ke ghar ke lie maḳhsūs kie the. yih chīzeṅ us sāre sone ke sāth milā kar jo rab ke ghar aur shāhī mahal ke ḳhazānoṅ meṅ thā us ne sab kuchh hazāel ko bhej diyā. tab hazāel yarūshalam ko chhoṛ kar chalā gayā.

¹⁹bāqī jo kuchh yūās kī hukūmat ke daurān huā aur jo kuchh us ne kiyā us kā zikr ‘shāhān-e-yahūdāh’ kī kitāb meṅ kiyā gayā hai.

²⁰ek din us ke afsaroṅ ne us ke ḳhilāf sāzish karke use qatl kar diyā jab wuh bait-millo ke pās us rāste par thā jo sillā kī taraf utar jātā thā.

²¹qātiloṅ ke nām yūzabad bin sim'āt aur yahūzabad bin shūmīr the. yūās ko yarūshalam ke us hisse meṅ jo ‘dāūd kā shahr’ kahlātā hai ḳhāndānī qabr meṅ dafnāyā gayā. phir us kā beṭā amasiyāh taḳhtnashīn huā.