Read Roman Urdu Geo 2-salātīn 13 Bible Online

2-salātīn 13 - Roman Urdu Geo bible

2-salātīn 13

¹yahūāḳhaz bin yāhū yahūdāh ke bādshāh yūās bin aḳhaziyāh kī hukūmat ke 23weṅ sāl meṅ isrāīl kā bādshāh banā. us kī hukūmat kā daurāniyā 17 sāl thā, aur us kā dār-ul-hukūmat sāmariyya rahā.

²us kā chāl-chalan rab ko nāpasand thā, kyūṅki wuh bhī yarubiām bin nabāt ke bure namūne par chaltā rahā. us ne wuh gunāh jārī rakhe jo karne par yarubiām ne isrāīl ko uksāyā thā. us butparastī se wuh kabhī bāz na āyā.

³is wajah se rab isrāīl se bahut nārāz huā, aur wuh shām ke bādshāh hazāel aur us ke beṭe bin-hasad ke wasīle se unheṅ bār bār dabātā rahā.

⁴lekin phir yahūāḳhaz ne rab kā ġhazab ṭhanḍā kiyā, aur rab ne us kī minnateṅ sunīṅ, kyūṅki use mālūm thā ki shām kā bādshāh isrāīl par kitnā zulm kar rahā hai.

⁵rab ne kisī ko bhej diyā jis ne unheṅ shām ke zulm se āzād karwāyā. is ke bād wuh pahle kī tarah sukūn ke sāth apne gharoṅ meṅ rah sakte the.

⁶to bhī wuh un gunāhoṅ se bāz na āe jo karne par yarubiām ne unheṅ uksāyā thā balki un kī yih butparastī jārī rahī. yasīrat dewī kā but bhī sāmariyya se haṭāyā na gayā.

⁷āḳhir meṅ yahūāḳhaz ke sirf 50 ghuṛsawār, 10 rath aur 10,000 piyādā sipāhī rah gae. fauj kā bāqī hissā shām ke bādshāh ne tabāh kar diyā thā. us ne isrāīlī faujiyoṅ ko kuchal kar yūṅ uṛā diyā thā jis tarah dhūl anāj ko gāhte waqt uṛ jātī hai.

⁸bāqī jo kuchh yahūāḳhaz kī hukūmat ke daurān huā, jo kuchh us ne kiyā aur jo kāmyābiyāṅ use hāsil huīṅ wuh ‘shāhān-e-isrāīl kī tārīḳh’ kī kitāb meṅ bayān kī gaī haiṅ.

⁹jab wuh mar kar apne bāpdādā se jā milā to use sāmariyya meṅ dafnāyā gayā. phir us kā beṭā yahūās taḳhtnashīn huā.

¹⁰yahūās bin yahūāḳhaz yahūdāh ke bādshāh yūās kī hukūmat ke 37weṅ sāl meṅ isrāīl kā bādshāh banā.

¹¹yahūās kā chāl-chalan rab ko nāpasand thā. wuh un gunāhoṅ se bāz na āyā jo karne par yarubiām bin nabāt ne isrāīl ko uksāyā thā balki yih butparastī jārī rahī.

¹²bāqī jo kuchh yahūās kī hukūmat ke daurān huā, jo kuchh us ne kiyā aur jo kāmyābiyāṅ use hāsil huīṅ wuh ‘shāhān-e-isrāīl kī tārīḳh’ kī kitāb meṅ darj haiṅ. us meṅ us kī yahūdāh ke bādshāh amasiyāh ke sāth jang kā zikr bhī hai.

¹³jab yahūās mar kar apne bāpdādā se jā milā to use sāmariyya meṅ shāhī qabr meṅ dafnāyā gayā. phir yarubiām duwum taḳht par baiṭh gayā.

¹⁴yahūās ke daur-e-hukūmat meṅ ilīshā shadīd bīmār ho gayā. jab wuh marne ko thā to isrāīl kā bādshāh yahūās us se milne gayā. us ke ūpar jhuk kar wuh ḳhūb ro paṛā aur chillāyā, “hāy, mere bāp, mere bāp. isrāīl ke rath aur us ke ghoṛe!”

¹⁵ilīshā ne use hukm diyā, “ek kamān aur kuchh tīr le āeṅ.” bādshāh kamān aur tīr ilīshā ke pās le āyā.

¹⁶phir ilīshā bolā, “kamān ko pakaṛeṅ.” jab bādshāh ne kamān ko pakaṛ liyā to ilīshā ne apne hāth us ke hāthoṅ par rakh die.

¹⁷phir us ne hukm diyā, “mashriqī khiṛkī ko khol deṅ.” bādshāh ne use khol diyā. ilīshā ne kahā, “tīr chalāeṅ!” bādshāh ne tīr chalāyā. ilīshā pukārā, “yih rab kā fath dilāne wālā tīr hai, shām par fath kā tīr! āp afīq ke pās shām kī fauj ko mukammal taur par tabāh kar deṅge.”

¹⁸phir us ne bādshāh ko hukm diyā, “ab bāqī tīroṅ ko pakaṛeṅ.” bādshāh ne unheṅ pakaṛ liyā. phir ilīshā bolā, “in ko zamīn par paṭaḳh deṅ.” bādshāh ne tīn martabā tīroṅ ko zamīn par paṭaḳh diyā aur phir ruk gayā.

¹⁹yih dekh kar mard-e-ḳhudā ġhusse ho gayā aur bolā, “āp ko tīroṅ ko pāṅch yā chhih martabā zamīn par paṭaḳhnā chāhie thā. agar aisā karte to shām kī fauj ko shikast de kar mukammal taur par tabāh kar dete. lekin ab āp use sirf tīn martabā shikast deṅge.”

²⁰thoṛī der ke bād ilīshā faut huā aur use dafn kiyā gayā. un dinoṅ meṅ moābī luṭere har sāl mausam-e-bahār ke daurān mulk meṅ ghus āte the.

²¹ek din kisī kā janāzā ho rahā thā to achānak yih luṭere nazar āe. mātam karne wāle lāsh ko qarīb kī ilīshā kī qabr meṅ phaiṅk kar bhāg gae. lekin jūṅ hī lāsh ilīshā kī haḍḍiyoṅ se ṭakrāī us meṅ jān ā gaī aur wuh ādmī khaṛā ho gayā.

²²yahūāḳhaz ke jīte jī shām kā bādshāh hazāel isrāīl ko dabātā rahā.

²³to bhī rab ko apnī qaum par tars āyā. us ne un par rahm kiyā, kyūṅki use wuh ahd yād rahā jo us ne ibrāhīm, is'hāq aur yāqūb se bāndhā thā. āj tak wuh unheṅ tabāh karne yā apne huzūr se ḳhārij karne ke lie tayyār nahīṅ huā.

²⁴jab shām kā bādshāh hazāel faut huā to us kā beṭā bin-hasad taḳhtnashīn huā.

²⁵tab yahūās bin yahūāḳhaz ne bin-hasad se wuh isrāīlī shahr dubārā chhīn lie jin par bin-hasad ke bāp hazāel ne qabzā kar liyā thā. tīn bār yahūās ne bin-hasad ko shikast de kar isrāīlī shahr wāpas le lie.