Read Roman Urdu Geo 2-salātīn 16 Bible Online

2-salātīn 16 - Roman Urdu Geo bible

2-salātīn 16

¹āḳhaz bin yūtām isrāīl ke bādshāh fiqah bin ramaliyāh kī hukūmat ke 17weṅ sāl meṅ yahūdāh kā bādshāh banā.

²us waqt āḳhaz 20 sāl kā thā, aur wuh yarūshalam meṅ rah kar 16 sāl hukūmat kartā rahā. wuh apne bāp dāūd ke namūne par na chalā balki wuh kuchh kartā rahā jo rab ko nāpasand thā.

³kyūṅki us ne isrāīl ke bādshāhoṅ kā chāl-chalan apnāyā, yahāṅ tak ki us ne apne beṭe ko qurbānī ke taur par jalā diyā. yūṅ wuh un qaumoṅ ke ghinaune rasm-o-riwāj adā karne lagā jinheṅ rab ne isrāīliyoṅ ke āge mulk se nikāl diyā thā.

⁴āḳhaz baḳhūr jalā kar apnī qurbāniyāṅ ūṅche maqāmoṅ, pahāṛiyoṅ kī choṭiyoṅ aur har ghane daraḳht ke sāy meṅ chaṛhātā thā.

⁵ek din shām kā bādshāh razīn aur isrāīl kā bādshāh fiqah bin ramaliyāh yarūshalam par hamlā karne ke lie yahūdāh meṅ ghus āe. unhoṅ ne shahr kā muhāsarā to kiyā lekin us par qabzā karne meṅ nākām rahe.

⁶un hī dinoṅ meṅ razīn ne ailāt par dubārā qabzā karke shām kā hissā banā liyā. yahūdāh ke logoṅ ko wahāṅ se nikāl kar us ne wahāṅ adomiyoṅ ko basā diyā. yih adomī āj tak wahāṅ ābād haiṅ.

⁷āḳhaz ne apne qāsidoṅ ko asūr ke bādshāh tiglat-pilesar ke pās bhej kar use ittilā dī, “maiṅ āp kā ḳhādim aur beṭā hūṅ. mehrbānī karke āeṅ aur mujhe shām aur isrāīl ke bādshāhoṅ se bachāeṅ jo mujh par hamlā kar rahe haiṅ.”

⁸sāth sāth āḳhaz ne wuh chāṅdī aur sonā jamā kiyā jo rab ke ghar aur shāhī mahal ke ḳhazānoṅ meṅ thā aur use tohfe ke taur par asūr ke bādshāh ko bhej diyā.

⁹tiglat-pilesar rāzī ho gayā. us ne damishq par hamlā karke shahr par qabzā kar liyā aur us ke bāshindoṅ ko giriftār karke qīr ko le gayā. razīn ko us ne qatl kar diyā.

¹⁰āḳhaz bādshāh asūr ke bādshāh tiglat-pilesar se milne ke lie damishq gayā. wahāṅ ek qurbāngāh thī jis kā namūnā āḳhaz ne banā kar ūriyāh imām ko bhej diyā. sāth sāth us ne ḍizāin kī tamām tafsīlāt bhī yarūshalam bhej dīṅ.

¹¹jab ūriyāh ko hidāyāt milīṅ to us ne un hī ke mutābiq yarūshalam meṅ ek qurbāngāh banāī. āḳhaz ke damishq se wāpas āne se pahle pahle use tayyār kar liyā gayā.

¹²jab bādshāh wāpas āyā to us ne naī qurbāngāh kā muāinā kiyā. phir us kī sīṛhī par chaṛh kar

¹³us ne ḳhud qurbāniyāṅ us par pesh kīṅ. bhasm hone wālī qurbānī aur ġhallā kī nazar jalā kar us ne mai kī nazar qurbāngāh par unḍel dī aur salāmatī kī qurbāniyoṅ kā ḳhūn us par chhiṛak diyā.

¹⁴rab ke ghar aur naī qurbāngāh ke darmiyān ab tak pītal kī purānī qurbāngāh thī. ab āḳhaz ne use uṭhā kar rab ke ghar ke sāmne se muntaqil karke naī qurbāngāh ke pīchhe yānī shimāl kī taraf rakhwā diyā.

¹⁵ūriyāh imām ko us ne hukm diyā, “ab se āp ko tamām qurbāniyoṅ ko naī qurbāngāh par pesh karnā hai. in meṅ subho-shām kī rozānā qurbāniyāṅ bhī shāmil haiṅ aur bādshāh aur ummat kī muḳhtalif qurbāniyāṅ bhī, masalan bhasm hone wālī qurbāniyāṅ aur ġhallā aur mai kī nazareṅ. qurbāniyoṅ ke tamām ḳhūn ko bhī sirf naī qurbāngāh par chhiṛaknā hai. āindā pītal kī purānī qurbāngāh sirf mere zātī istemāl ke lie hogī jab mujhe allāh se kuchh daryāft karnā hogā.”

¹⁶ūriyāh imām ne waisā hī kiyā jaisā bādshāh ne use hukm diyā.

¹⁷lekin āḳhaz bādshāh rab ke ghar meṅ mazīd tabdīliyāṅ bhī lāyā. hathgāṛiyoṅ ke jin fremoṅ par bāsan rakhe jāte the unheṅ toṛ kar us ne bāsanoṅ ko dūr kar diyā. is ke ilāwā us ne ‘samundar’ nāmī baṛe hauz ko pītal ke un bailoṅ se utār diyā jin par wuh shurū se paṛā thā aur use patthar ke ek chabūtare par rakhwā diyā.

¹⁸us ne asūr ke bādshāh ko ḳhush rakhne ke lie ek aur kām bhī kiyā. us ne rab ke ghar se wuh chabūtarā dūr kar diyā jis par bādshāh kā taḳht rakhā jātā thā aur wuh darwāzā band kar diyā jo bādshāh rab ke ghar meṅ dāḳhil hone ke lie istemāl kartā thā.

¹⁹bāqī jo kuchh āḳhaz kī hukūmat ke daurān huā aur jo kuchh us ne kiyā wuh ‘shāhān-e-yahūdāh kī tārīḳh’ kī kitāb meṅ darj hai.

²⁰jab wuh mar kar apne bāpdādā se jā milā to use yarūshalam ke us hisse meṅ jo ‘dāūd kā shahr’ kahlātā hai ḳhāndānī qabr meṅ dafnāyā gayā. phir us kā beṭā hizqiyāh taḳhtnashīn huā.